Skandapurāṇa: Revākhaṇḍa (revised text) · Chapter 96

iti śrīskandapurāṇe revākhaṇḍe 'gastyatīrthavarṇano nāma pañcanavatitamo 'dhyāyaḥ ||
RKS adhyāya 96
mārkaṇḍeya uvāca:
athānandeśvaraṃ gacchet sarvadevanamaskṛtam /
rudrasya paramānando yatra jāto yudhiṣṭhira

tattīrthaṃ kathayiṣyāmi sūryapāpakṣayaṃ karam /
yudhiṣṭhira uvāca:
ānandaś caiva saṃjāto rudrasya dvijasattama

kathayasva mahābhāga saṃkṣepān munisattama /
mārkaṇḍeya uvāca:
kathayāmi nṛpaśreṣṭha ānandeśvaram uttamam

dānavānāṃ vadhaṃ kṛtvā devadevaś ca śaṅkaraḥ /
pūjito daivataiḥ sarvaiḥ kinnarair yakṣapannagaiḥ

ānandaṃ paramaṃ prāpya nanarta vṛṣavāhanaḥ /
bhairavaṃ rūpam āsādya gaurī cārddhāṅgadhāritā

bhūtavetālakaṅkālair bhairavair bhairavo vṛtaḥ /
narmadāyottare tīre dakṣiṇe pāṇḍunandana

tuṣṭair marudgaṇais tatra sthāpitaḥ kamalāsanaḥ /
tadā prabhṛti vai deva ānandeśvara ucyate

aṣṭamyāṃ ca caturdaśyāṃ paurṇamāsyāṃ narādhipa /
vidhiṃ snātvārcayed devāṃ sugandhena vilepayet

brāhmaṇān pūjayet tatra yathāśaktyā yudhiṣṭhira /
godānaṃ tatra kartavyaṃ vastradānaṃ tathaiva ca

vasantasya trayodaśyāṃ śrāddhaṃ tatraiva kārayet /
iṅgudair badarair bilvair akṣatena jalena vā

pretānāṃ kārayec chrāddham ānandeśvaratīrthake /
pretā ānanditāḥ syus te yāvad āhūta samplavam

santatirdhanasaukhyaṃ ca saptajanmani jāyate /
ānandaś ca bhavet teṣāṃ janma janma yudhiṣṭhira

mārkaṇḍeya uvāca:
tato gacchet tu rājendra mātṛtīrtham anuttamam /
saṅgamasya samīpasthaṃ narmadādakṣiṇe taṭe

mātaras tatra rājendra saṃjātā narmadātaṭe /
umayā yācitas tatra vyālayajñopavītakaḥ

uvāca yoginīvṛndaṃ kaṣṭaṃ kaṣṭaṃ na śobhanam /
uvāca varadaś cāsmi yogivṛndavarapradaḥ

yoginya ūcuḥ:
ajeyāḥ sarvadevānāṃ tvat prasādān maheśvara /
tīrthānāmabhisaṃkhyāne prakhyātā vasudhātale

evaṃ bhavatu yoginyas tatraivāntaradhīyata

mārkaṇḍeya uvāca:
tasmiṃs tīrthe tu yo martyo navamyāṃ vijitendriyaḥ /
upoṣya parayā bhaktyā pūjayen mātṛmaṇḍalam

tasya tā mātaraḥ prītāḥ prīto 'yaṃ vṛṣavāhanaḥ /
bandhyāyā mṛtavatsāyā aputrāyā yudhiṣṭhira

snapanaṃ cārabhet tatra mantrajñair brāhmaṇottamaiḥ /
sahiraṇyena kumbhena pañcaratnaphalānvitam

snāpayet putrakāmā ca kāṃsyapātreṇa mantrataḥ /
putrān sā labhate nārī vīryayuktān guṇānvitān

yaṃ yaṃ kāmam abhidhyāyet taṃ taṃ sā labhate nṛpa /
mātṛtīrthāt paraṃ tīrthaṃ nāsty anyat pāṇḍunandana

tasyaivānantaraṃ tāta jalamadhyeśvaraṃ param /
liṅgeśvaramiti khyātaṃ surāsuranamaskṛtam

yudhiṣṭhira uvāca:
atyaktā sā tu revā yā kathaṃ tyaktā ca śambhunā /
jalamadhye hi tiṣṭheta śūlapāṇiḥ pinākadhṛk

tadahaṃ śrotum icchāmi tava vākyād dvijottama /
mārkaṇḍeya uvāca:
āścaryabhūtā loke 'smin pratiṣṭhā pāṇḍunandana

paṇḍito vṛddhabhāvena kathayāmi nṛpottama /
ādau kṛtayuge tāta dānavo baladarpitaḥ

kālabāṣpa iti prokto durjayo devadānavaiḥ /
tapaś cacāra vipulaṃ narmadāyā jale śubhe

ārādhayan mahādevam ugreṇa tapasā bhṛśam /
tatas tutoṣa bhagavān sapatnīko maheśvaraḥ

īśvara uvāca:
bho bho vatsa varaṃ brūhi tuṣṭo 'haṃ tava bhaktitaḥ /
devasya vacanaṃ śrutvā kālabāṣpo 'bravīd vacaḥ

devāś caiva mayā bhagnāḥ prasādāt tava śūlinaḥ /
saṃgrāme ca viṣaṇṇo 'haṃ tasmād ārādhanaṃ kṛtam

hastaṃ śirasi yasyaiva dāsyāmi ca maheśvara /
na sa jīvet pumāṃl loke varam etaṃ dadasva me

īśvara uvāca:
yat te 'bhilaṣitaṃ daitya tat tathaiva bhaviṣyati /
iti śrutvā vaco daityaḥ śambhum evābhidudruve

hastaṃ te mūrdhni dāsyāmi na tatsatyaṃ vacas tava /
rudraḥ palāyitas tena keśavaṃ śaraṇaṃ gataḥ

nivedya keśavaṃ sarvaṃ tasminn eva nyalīyata /
keśava uvāca:
hanmy ahaṃ taṃ mahādeva duṣṭaṃ daityajaneśvaram

hastaṃ śirasi tasyaiva dāpayāmi maheśvara /
tatas tvaritamāpannaḥ praviṣṭo namadātaṭe

kṛṣṇaḥ strīveṣadhārī ca daityasaṃmukham āgataḥ /
dvātriṃśallakṣaṇopetā niyuktā kāmasāyakaiḥ

madhumāthavake śambhuṃ dhyātvā sarvatra kaiśavī /
vanaṃ babhrāma sarvatra suśīlā vaṭapādapam

kṣobhayantīva cittāni sā reme dharmanandana /
riṅgamāṇaś ca daityo 'sau kālabāṣpaḥ sudurjanaḥ

praviṣṭaḥ sa vane ramye yatra sā śubhalocanā /
ahaṃ bhavāmi te bhartā durjayo devadānavaiḥ

trailokyasvāminī tvaṃ ca prasīda mama sundari /
śrīkṛṣṇa uvāca:
yadi māṃ manyase bhāryāṃ pratyayaś ca bhaven mama

dānava uvāca:
svayaṃ bhavāmi tanvaṅgi śapathaṃ mama sādhanam /
tad ahaṃ ca kariṣyāmi iti me satyabhāṣitam

stryuvāca:
kuruṣva tvaṃ mahābhāga śiro haste pradīyatām /
mārkaṇḍeya uvāca:
kāmāndhenaiva rājendra nikṣipto mastake karaḥ

tatkṣaṇād abhavad bhasma dagdhas tṛṇacayo yathā /
keśavasyopari tadā puṣpavṛṣṭiḥ papāta ha

gatāḥ sarve divaṃ devāḥ svasthānaṃ vigatajvarāḥ /
kṣaurābdhim agamad viṣṇuḥ kālabāṣpe nipātite

ya idaṃ śṛṇuyād bhaktyā caritaṃ dānavasya ca /
śrāddhaṃ tatraiva yaḥ kuryāt kāmakrodhavivarjitaḥ

uddhṛtās tena sarve vai narakāc ca pitāmahāḥ /
kṣetre tasmiṃs tu yo dadyād brāhmaṇe vedapārage

tasya dānaphalaṃ sarvaṃ kurukṣetrād viśiṣyate /
sparśate ya idaṃ liṅgaṃ śaṅkareṇa ca nirmitam

sparśamātro manuṣyas tu rudravāso 'bhijāyate /
etasmāt kāraṇād rājaṃl lokapālāśca devatāḥ

durgādevī tathā caiva madhuhantā caturbhujaḥ /
dānavādyāś ca sarve 'pi rakṣaṇe ceśvarasya ca

rakṣante ca sadākālaṃ gṛhavyāpārarūpataḥ /
putrabhrātṛsamā bhūtvā svāmisambandharūpiṇaḥ

liṅgeśvaraṃ tu rājendra devairadyā 'pi rakṣyate