Skandapurāṇa: Revākhaṇḍa (revised text) · Chapter 92

iti śrīskandapurāṇe revākhaṇḍe śabarasvargārohaṇaṃ nāmaikanavatitamo 'dhyāyaḥ ||
RKS adhyāya 92
rājovāca:
tatas tayāpi deveśa bhānumatyā hi kiṃkṛtam /
etan me saṃśayaṃ deva kathayasva prasādataḥ

hara uvāca:
cintayitvā tu sā rājñī gatā kuṇḍasya sannidhau /
dṛṣṭvā tīrthasya māhātmyaṃ rājñī harṣeṇa pūritā

viprān bahūn samāhūya pūjayāmāsa tatkṣaṇāt /
dadau ca vividhaṃ dānaṃ brāhmaṇebhyo narādhipa

dattvā ca dakṣiṇām evaṃ madhumāse ca bhūmipa /
amāyāṃ ca tato rājñī gatā parvatamūrdhani

nagaśṛṅgaṃ samāruhya kṛtvā tu karasampuṭam /
vijñāpya brāhmaṇān sarvān idaṃ vacanam abravīt

mama mātā pitā bhrātā tathā 'nye caiva bāndhavāḥ /
sarve kṣamantu te sarvair idaṃ vācyaṃ tadā vacaḥ

ityuktvā śūlabhede tu tapaḥ kṛtvā sudāruṇam /
visṛjya caivam ātmānaṃ tasmiṃs tīrthe divaṃgatā

brāhmaṇā ūcuḥ:
sandeśaṃ kathayiṣyāmas tvayoktaṃ śobhanavrate /
mātāpitroś ca suśroṇi mā te 'bhūd atra saṃśayaḥ

tato visṛjya lokaṃ tu sthitā parvatasannidhau /
ardhottarīyavastraṃ tu gāḍhaṃ kṛtvā punaḥ punaḥ

tato visṛjya cātmānam ekacittā narādhipa /
nagārddhaṃ patitā yāvat tāvad dṛṣṭā surāsuraiḥ

divyaṃ vimānam āruhya kailāsaṃ sā jagāma ha /
tataḥ sā paśyatāṃ teṣāṃ janānāṃ tridivaṃ gatā