સ્કન્દપુરાણ: રેવાખણ્ડ (સંશોધિત પાઠ) · અધ્યાય 92

ઇતિ શ્રીસ્કન્દપુરાણે રેવાખણ્ડે શબરસ્વર્ગારોહણં નામૈકનવતિતમો ઽધ્યાયઃ ॥
ર્ક્સ્ અધ્યાય 92
રાજોવાચ:
તતસ્ તયાપિ દેવેશ ભાનુમત્યા હિ કિંકૃતમ્ ।
એતન્ મે સંશયં દેવ કથયસ્વ પ્રસાદતઃ

હર ઉવાચ:
ચિન્તયિત્વા તુ સા રાજ્ઞી ગતા કુણ્ડસ્ય સન્નિધૌ ।
દૃષ્ટ્વા તીર્થસ્ય માહાત્મ્યં રાજ્ઞી હર્ષેણ પૂરિતા

વિપ્રાન્ બહૂન્ સમાહૂય પૂજયામાસ તત્ક્ષણાત્ ।
દદૌ ચ વિવિધં દાનં બ્રાહ્મણેભ્યો નરાધિપ

દત્ત્વા ચ દક્ષિણામ્ એવં મધુમાસે ચ ભૂમિપ ।
અમાયાં ચ તતો રાજ્ઞી ગતા પર્વતમૂર્ધનિ

નગશૃઙ્ગં સમારુહ્ય કૃત્વા તુ કરસમ્પુટમ્ ।
વિજ્ઞાપ્ય બ્રાહ્મણાન્ સર્વાન્ ઇદં વચનમ્ અબ્રવીત્

મમ માતા પિતા ભ્રાતા તથા ઽન્યે ચૈવ બાન્ધવાઃ ।
સર્વે ક્ષમન્તુ તે સર્વૈર્ ઇદં વાચ્યં તદા વચઃ

ઇત્યુક્ત્વા શૂલભેદે તુ તપઃ કૃત્વા સુદારુણમ્ ।
વિસૃજ્ય ચૈવમ્ આત્માનં તસ્મિંસ્ તીર્થે દિવંગતા

બ્રાહ્મણા ઊચુઃ:
સન્દેશં કથયિષ્યામસ્ ત્વયોક્તં શોભનવ્રતે ।
માતાપિત્રોશ્ ચ સુશ્રોણિ મા તે ઽભૂદ્ અત્ર સંશયઃ

તતો વિસૃજ્ય લોકં તુ સ્થિતા પર્વતસન્નિધૌ ।
અર્ધોત્તરીયવસ્ત્રં તુ ગાઢં કૃત્વા પુનઃ પુનઃ

તતો વિસૃજ્ય ચાત્માનમ્ એકચિત્તા નરાધિપ ।
નગાર્દ્ધં પતિતા યાવત્ તાવદ્ દૃષ્ટા સુરાસુરૈઃ

દિવ્યં વિમાનમ્ આરુહ્ય કૈલાસં સા જગામ હ ।
તતઃ સા પશ્યતાં તેષાં જનાનાં ત્રિદિવં ગતા