Skandapurāṇa: Revākhaṇḍa (revised text) · Chapter 88

iti śrīskandapurāṇe revākhaṇḍe dānamahimānuvarṇanaṃ nāma saptāśītitamo 'dhyāyaḥ ||
RKS adhyāya 88
uttānapāda uvāca:
kasmin kāle ca kriyate śrāddhaṃ dānaṃ ca śaṅkara /
tīrthayātrā kathaṃ kāryā ātithyaṃ kathayasva naḥ

śaṅkara uvāca:
piturarthaṃ yathā puṇyaṃ sārvakālikam uttamam /
idaṃ tīrthaṃ tathā puṇyaṃ snānadānāditarpaṇaiḥ

viśeṣeṇa ca kurvanti śrāddhaṃ caturyugādiṣu /
manvantarādayo vatsa śrūyatāṃ ca caturdaśa

āśvine navamī śuklā dvādaśī kārtikasya ca /
tṛtīyā caitramāse tu tathā bhādrapadasya ca

āṣāḍhadaśamī tathā māghasyaiva casaptamī /
śrāvaṇasyāṣṭamī kṛṣṇā tathāṣāḍhī tu pūrṇimā

phālgunasya amāvāsyā pauṣasyaikādaśī śubhā /
kārttikī phālgunī caitrī jyaiṣṭhī pañcadaśī sitā

manvantarādayaś caiva hyanantaphaladāḥ smṛtāḥ /
ayane tūttare caiva dakṣiṇe ca tathaiva hi

kārttikyāṃ ca tathā mādhyāṃ vaiśākhyāṃ ca tṛtīyayā /
caitryāṃ caiva tathā ṣaṣṭhyāṃ prauṣṭhapadyāṃ tathaiva ca

śrāddhakālāś ca te sarve dattaṃ bhavati cākṣayam /
madhumāse site pakṣa ekādaśyām upoṣitaḥ

kṣapājāgaraṇaṃ kuryād viṣṇoḥ padasamīpataḥ /
dadyād dānaṃ tathā śaktyā hiraṇyaṃ go 'mbarāṇi ca

dhūpaṃ dīpaṃ ca naivedyaṃ srakpuṣpacandanāni ca /
arcāṃ karoti yo viṣṇoḥ kathāṃ paurāṇakīrtanam

ṛgyajuḥsāmātharvāṇāṃ sūktaṃ taj japati dvijaḥ /
sarvapāpavinirmukto viṣṇulokaṃ sa gacchati

prabhāte kurute śrāddhaṃ dvijān bhojya prayatnataḥ /
daded dānaṃ yathā śaktyā hiraṇyaṃ go 'mbarāṇi ca

pitarastasya tṛpyanti yāvad āhūtasaṃplavam /
śrāddhadaś ca vaset tatra yatra devo janārdanaḥ

trayodaśyāṃ tato gacched guhāvāsīti tiṣṭhati /
dṛṣṭvā mārkaṇḍamīśānaṃ sarvapāpaiḥ pramucyate

uttānapāda uvāca:
guhāmadhye yathā deva liṅgaṃ paramaśobhanam /
pratiṣṭhā yena devasya tan mamākhyātum arhasi

īśvara uvāca:
triṣu lokeṣu vikhyātaṃ mārkaṇḍeśvarasaṃjñikam /
bṛhadrathāntaraṃ yac ca sāmavedaṃ dvijottamaḥ

atharvātharvaśīrṣāṇi tathā hṛcca vṛṣākapim /
śivasaṃkalpitaṃ japtvā mucyate sarvapātakaiḥ

sa yāti paramaṃ sthānaṃ yatra devo maheśvaraḥ /
pādaśaucaṃ tathā tasya kurvate ye ca bhaktitaḥ

godānenaiva yatpuṇyaṃ labhante nā 'tra saṃśayaḥ /
brāhmaṇān bhojayet tatra pāyasair madhusarpiṣā

ekena bhojitenāpi sahasraṃ tena bhojitam /
suvarṇaṃ rajataṃ vastraṃ dadyād bhaktyā dvijātiṣu

tena tṛpyanti te devā manuṣyāḥ pitaras tathā /
candrasūryagrahe bhaktyā snānaṃ kurvanti ye narāḥ

devārcanaṃ ca yaḥ kuryāj japaṃ homaṃ viśeṣataḥ /
dahyād dānaṃ yathāśaktyā brāhmaṇe vedapārage

aśvaratnaṃ gajaratnaṃ tūlāpuruṣam eva ca /
yo dadyāc chakaṭaṃ tatra saptadhānyaprapūritam

yuktaṃ ca lāṅgalaṃ dadyād yuvānau tu dhurandharau /
gobhūtilahiraṇyaṃ ca pātre dātavyam īpsitam

apātre viduṣā kiṃcit na deyaṃ śreya icchatā /
sarvabhūtāni cātmaiva yato dhārayate mahī

tato viprāya sā deyā sarvasasyānuśālinī /
anyac ca śṛṇu rājendra godānasya ca yatphalam

yāvad vatsasya pādau dvau mukhaṃ yonyāṃ ca dṛśyate /
tāvad gauḥ pṛthivī jñeyā yāvad garbhaṃ na muñcati

yena kenāpy upāyena brāhmaṇāya samarpayet /
pṛthvī dattā bhavet tena saśailavanakānanā

tārayantī ca sā dattā kulānām ekaviṃśatim /
raupyakhurīṃ kāṃsyadohāṃ savatsāṃ ca payasvinīm

prayacchanti janāḥ puṇyā rāhugraste niśākare /
sarvasyaiva tu dānasya saṃkhyā cāsti narādhipa

candrasūryoparāge ca dānasaṃkhyā na vidyate /
yatra gāvaḥ pradṛśyante sarvatīrthāni tatra vai

tatra yajñaṃ vijānīyāt nātra kāryā vicāraṇā /
punaḥ smṛtvā tu tat tīrthaṃ gamanaṃ kurute naraḥ

athavā śrūyate yas tu rudrasyānucaro bhavet