Skandapurāṇa: Revākhaṇḍa (revised text) · Chapter 86

iti śrīskandapurāṇe revākhaṇḍe 'ndhakavarapradāno nāma pañcāśītitamo 'dhyāyaḥ ||
RKS adhyāya 86
mārkaṇḍeya uvāca:
andhakasya varaṃ dattvā tenaiva saha śaṅkaraḥ /
umayā sahitaścāpi kailāsaṃ parvataṃ gataḥ

tatas samāgatā devā brahmādyās saha vāsavāḥ /
hṛṣṭapuṣṭāś ca te sarve maheśa taṃ praṇemire

deva uvāca:
svāgataṃ vo mahābhāgā ye kecit tv iha cāgatāḥ /
nihato dānavas tatra bhavadarthe na saṃśayaḥ

raktena tasya me śūlaṃ nirmalaṃ ca na dṛśyate /
kartavyaṃ kiṃ mayā cādya kathyatāṃ hi pitāmaha

sutas tu bhavato brahman yaścā 'sau nihato mayā /
kartumicchāmyahaṃ samyak tīrthayātrāṃ na saṃśayaḥ

utthāya gamyatāṃ sarve ye kecit tv iha cāgatāḥ /
tatas sarvaiḥ suraiḥ sārdhaṃ prabhāsaṃ prati niryayau

prabhāsād yāni tīrthāni gaṅgāsāgarasaṅgame /
avagāhya tu sarvāṇi nirmalatvaṃ na vidyate

nīlībhūtaṃ yathāvastraṃ sitatvaṃ naiva gacchati /
tathā kṛṣṇatriśūlasya nirmalatvaṃ na jāyate

narmadā tu tato gatvā devo devaiḥ samanvitaḥ /
uttaraṃ dakṣiṇaṃ kūlam avagāhya prayatnataḥ

gatvā tu dakṣiṇe kūle parvate bhṛgusaṃjñite /
tatra sthitvā mahādevo devaiḥ saha dharāpate

manoharaṃ tu tatsthānaṃ sarveṣāṃ hi divaukasām /
jñātvā tīrthaviśeṣaṃ tu sthito devo maheśvaraḥ

giriṃ bibheda śūlena tena bhinnaṃ rasātalam /
nirmalaṃ cābhavac chūlaṃ na lepo dṛśyate kvacit

pātālān niḥsṛtā gaṅgā nāmnā bhogavatīti sā /
tatra tīrthaṃ samutpannaṃ śūlabhedeti viśrutam

sūrye rāhugate tatra mahāpuṇyā sarasvatī /
dvitīyaṃ saṅgamaṃ tatra yathā veṇī sitāsitam

tatra brahmā svayaṃ devo brahmeśaṃ liṅgam uttamam /
yasya yāmyadiśābhāge svayaṃ devo janārdanaḥ

vidyate ca svayaṃ tatra viṣṇuḥ pīṭheṣu saṃsthitaḥ /
śūlena ca kṛtā rekhā tatra toyavahā nṛpa

tat toyaṃ ca gataṃ tatra yatra revā nadījalam /
tatra liṅgaṃ mahāpuṇyaṃ cakratīrtheti viśrutam

śūlabhede ca deveśaḥ snānaṃ kṛtvā yathā vidhi /
ātmānaṃ manyate śuddhaṃ na kiṃcit kaluṣaṃ tanau

tasya caivottare bhāge deva devaṃ jagadgurum /
śūlapāṇiṃ tataḥ prāpya pūjayāmāsa yatnataḥ

sarvatīrtham ayaṃ tīrthaṃ sarvatīrthādhikaṃ param /
sarvapuṇyādhikaṃ puṇyaṃ sarvadruḥkhaghnam uttamam

tatra tīrthaṃ pratiṣṭhāpya devadevo jagadguruḥ /
rakṣakāṃs tu tato muktvā tatra sthāpya vināyakam

kṣetrapālaśataṃ cāṣṭau tīrthaṃ rakṣanti yatnataḥ /
vighnāni tasya kurvanti yas tatra sthātum icchati

kecit kuṭumbacintāṃ tu kecic cintāṃ kṛṣīṣu ca /
sevāṃ ca kurvate kecid dravyārjanaparāyaṇāḥ

parokṣavādaṃ kurvanti anye hisāratā janāḥ /
paradārān prasarpanti anye ca vittacintakāḥ

anye 'pi ca vadanty evaṃ kathaṃ tīrtheṣu gamyate /
kṣudhayā pīḍyate bhāryā hy apatyāni tathaiva ca

mohajāle nipatitāḥ pāpācārāś ca ye narāḥ /
tebhyo rakṣanti tat tīrthaṃ devasya ca gaṇāḥ śubham

puṇyā janāḥ sthirā ye ca snānaṃ teṣāṃ ca jāyate /
payoṣṇyāṃ devanadyāṃ ca bhogavatyāṃ viśeṣataḥ

etac ca saṅgamaṃ puṇyaṃ yathā veṇyāṃ sitāsite /
dṛṣṭvā tīrthaṃ tu te sarve gīrvāṇā hṛṣṭamānasāḥ

devasya sannidho bhūtvā varṇayanti parasparam /
idaṃ tīrthaṃ ca deveśa gayātīrthasamaṃ viduḥ

guhyād guhyataraṃ tīrthaṃ na bhūtaṃ na bhaviṣyati /
śūlapāṇiṃ samabhyarcya brahmādyāś ca suraiḥ saha

ye gaṇāś caiva gandharvā yamo varuṇavāsavau /
nṛtyagītais tathā stotraiḥ sarve caiva surāsurāḥ

devena bhodito yatra śūlāgreṇa nṛpottama /
trayo gartās tu saṃjātās toyapūrṇā narādhipa

āryāvartā naraśreṣṭha mahākuliśalāñchitāḥ /
sarvapāpakṣayakarāḥ sarvaduḥkhāpahārakāḥ

tasmiṃs tīrthe naraḥ snātvā upavāsaparāyaṇaḥ /
dīkṣāmantravihīno 'pi mucyate bhavabandhanāt

yaḥ punar vidhivat snātvā mantraiḥ pañcabhir eva ca /
vedoktaiḥ pañcabhir mantraiḥ sahiraṇyair ghaṭais tathā

akṣarair daśabhiś caiva pañcākṣarais tribhis tathā /
pṛthagbhūtair dvijātīnāṃ tīrthaṃ śastaṃ narādhipa

brahmakṣatraviśāṃ vāpi śūdrasyātha striyās tathā /
dhyātvā devatrayaṃ rājan snānaṃ caiva yathāvidhi

daśākṣareṇa mantreṇa toyaṃ pibati yo naraḥ /
kedāre ca yathā pītaṃ tathā kuṇḍe na saṃśayaḥ

pañcarephasamāyuktaṃ kṣakārākṣarabhūṣitam /
oṃkāradvayasaṃyuktam etad atrānukīrtanam

yas tatra kurute snānaṃ vidhiyukto jitendriya /
tilamiśreṇa toyena tarpayet pitṛdevatāḥ

kulaṃ tārayate viṃśaddaśapūrvān daśāparān /
gaṅgāyāṃ pañcatīrthe ca śrāddhaṃ vai kurute tu yaḥ

sa tatra phalam āpnoti śūlabhede na saṃśayaḥ /
yas tatra vidhinā yukto dānaṃ dadyāc ca bhaktitaḥ

tadakṣayaṃ phalaṃ tatra kṛtasya sukṛto 'thavā /
gayākṣetre yathāpuṇyaṃ sarvakāryeṣu caiva hi

śūlabhede tathā puṇyaṃ snānadānāditarpaṇaiḥ /
bhaktyā ca yo dadāt yatra kāṃcanaṃ gāṃ mahīṃ jalam

annaṃ kṛṣībhavaṃ śayyāṃ vāsāṃsi bhūṣaṇāni ca /
annādibhir dhanaiś caiva gṛhaṃ pūrṇaṃ ca sarvataḥ

yugyayuglāṅgalaṃ mukhyaṃ navaṃ caiva dhurandharau /
dānāny etāni yo dadyād brāhmaṇe vedapārage

śrotriyaṃ ca kulīnaṃ ca śuciṃ ca vijitendriyam /
jñātvā dānaṃ ca yo dadyāt tasyānto naiva vidyate

trayodaśadineṣv ekaṃ trayodaśaguṇaṃ bhavet