Skandapurāṇa: Revākhaṇḍa (revised text) · Chapter 83

iti śrīskandapurāṇe revākhaṇḍe mṛkaṇḍāśramakīrtano nāma dvyaśītitamo 'dhyāyaḥ ||
RKS adhyāya 83
mārkaṇḍeya uvāca:
tato 'nyat paramaṃ tīrthaṃ candramatyās tu saṅgame /
candreśvaraṃ siddhaliṅgaṃ tathā siddheśvaraṃ punaḥ

ghaṇṭeśvaraṃ mahiṣeśam aśvatīrtham ataḥ param /
vṛṣasenaṃ hayagrīvaṃ śukatīrtham ataḥ param

rameśvaraṃ tato gacchet tīrthaṃ pāpapraṇāśanam /
mekalāyās taṭe rājan mahāpātakanāśanam

yadā dāruvane pūrvaṃ mahādevena mohitāḥ /
brāhmaṇānāṃ striyas tatra ramamāṇāḥ samāgatāḥ

cintayantyaś ca tā mokṣaṃ mekalātīram āśritāḥ /
tābhiś ca ramamāṇābhir āvṛtaṃ śivapūjanam

nīlotpaladalair bilvair mallikājātikundakaiḥ /
śūnyaṃ prapūjitaṃ yāvattāval liṅgaṃ samutthitam

pātālādāgataṃ liṅgaṃ jvalat kālānalaprabham /
rameśvareti vikhyātaṃ ramamāṇāt samutthitam

strīṇāṃ uvāca deveśaḥ śāpamokṣo bhavatv iti /
gacchantu sarvāḥ svagṛhaṃ sāmprataṃ gatakalmaṣāḥ

ityuktvā devadeveśas tatraivāntaradhīyata /
tasmiṃs tīrthe naraḥ snātvā sa bhave na punarbhavet

anāśakena cāgnau hi ye mṛtā na punarbhavāḥ /
tilodakaṃ pitṝṇāṃ tu piṇḍadānaṃ yathāvidhi

śrāddhenaiva ca dānena pitṝṇāṃ paramā gatiḥ /
indreṇa brahmaṇā pūrvaṃ viṣṇunā dhanadena ca

rakṣasā rāvaṇenātha tathā cendrajitā nṛpa /
japo japtas tapas taptaṃ yajñāni vividhāni ca

kṛtāni nṛpaśārdūla gatā hi paramāṃ gatim /
anyac ca kathayiṣyāmi hāriṇaṃ tīrtham uttamam

hariṇeśaṃ siddhaliṅgaṃ tathā vai dhanurīśvaram /
bāṇeśvaraṃ paraviddhi tathā vai lubdhakeśvaram

liṅgarūpāṇi pūjayitvā śivaṃ vrajet /
ākhyānaṃ kathayiṣyāmi purāvṛttaṃ yudhiṣṭhira

arjuno lubdhako nāma mandajātisamudbhavaḥ /
paryaṭan mṛgayāṃ rājan narmadātīramāgataḥ

dṛṣṭvā yūthaṃ mṛgāṇāṃ tu dhāvamānaḥ punaḥ punaḥ /
palāyamānāḥ sarve te ekaḥ paścāt sthito mṛgaḥ

hato madhyadine so 'dya kuraṅgo narmadātaṭe /
patito 'sau gataprāṇo divyadehadharaḥ punaḥ

vimāne haṃsayukte vai brahmalokaṃ jagāma ha /
gate tu hariṇe so 'tha lubdhakaś cintayānvitaḥ

mahāpāpāny anekāni kṛtāni tu mayā punaḥ /
kā gatiṃ yāmyahaṃ cātha śreyase maraṇaṃ mama

cintayitvā tato rājan patito narmadājale /
tatkṣaṇād divyadeho 'sau gandharvapuram āyayau

gate tasmin devaloke dhanurbāṇau jale sthitau /
catvāry etāni liṅgāni khyātāni bhuvanatraye

hariṇeśvaraṃ ca bāṇeśaṃ lubdheśaṃ dhanurīśvaram /
rameśvaraṃ pañcamaṃ tu pañcaliṅgāni kīrtayet

na tasya punarāvṛttir ghore saṃsārasāgare /
tasmiṃs tīrthe naro rājan snātvā śivapuraṃ vrajet

brahmahatyādi pāpāni vilayaṃ yānti pārthiva /
anāśake cārdhajale mṛtaḥ śivamavāpnuyāt