Skandapurāṇa: Revākhaṇḍa (revised text) · Chapter 82

iti śrīskandapurāṇe revākhaṇḍe pañcaliṅgamahimānuvarṇano nāmaikāśītitamo 'dhyāyaḥ ||
RKS adhyāya 82
mārkaṇḍeya uvāca:
athānyat kathayiṣyāmi tīrthaṃ pāpapraṇāśanam /
mayūrakukkuṭaṃ nāma brahmahatyā vyapohanam

mṛkaṇḍasyāśramaṃ puṇyaṃ narmadādakṣiṇe taṭe /
mṛkaṇḍo nāma bhūpāla ṛṣiḥ paramadhārmikaḥ

tapas tepe mahābhāga divyair varṣasahasrakaiḥ /
tasyāśramapade ramye munayaḥ śaṃsitavratāḥ

vasanti sma jalāhārāḥ śuṣkapatrakṛtāśanāḥ /
kecit tanna nirāhārā mokṣopāyavicintakāḥ

etasminn antare rājan gandharvau śakragāyanau /
hetiprahetināmānau gatau śakrasabhāṃ nṛpa

vadhūrapsarasāṃ śreṣṭhā dṛṣṭā tābhyāṃ yudhiṣṭhira /
dṛṣṭamātrau tu gandharvau kāmabāṇaprapīḍitau

hetiḥ kukkuṭaśabdena prahetir barhiṇas tathā /
ghoṣyamāṇau sumadhuraṃ sādayāmāsa tu ca tām

vṛtrahā tad abhiprāyaṃ jñātvā śāpaṃ dadau tavā

pūrṇe divyaśate varṣe paścād atrāgamiṣyathaḥ /
tiryagyonau tu saṃprāptau gandharvau hi yudhiṣṭhira

jātismarau durācārau pakṣiṇau priyadarśīnau /
sarvatīrthāny uttaran tau nāradaṃ ca dadarśatuḥ

gandharvāv ūcatuḥ:
bhaviṣyāvaḥ śubhācāra brahmaputra tapodhana /
karmaṇā kena cāvāṃ hi muktāvetau vadasva tat

nārada uvāca:
narmadā dakṣiṇe tīre mṛkaṇḍasyāśramaṃ śubham /
tiryagyonivimokṣaṃ ca tīrthaṃ hi paramaṃ matam

jalāplutau narmadāyāḥ sarvaṃ tatra bhaviṣyati /
tato hetiḥ prahetiś ca susnātau divyarūpiṇau

ekena snānamātreṇa pakṣiṇau divyatāṃ gatau /
snātvā tu vidhinā 'nena dhyātvā devaṃ sadāśivam

uccāryyāghoramantraṃ tau sadā dhyānasthitau nṛpa /
etasminn antare rājan pātālādutthitaṃ śubham

śatasūryaprakāśaṃ hi liṅgaṃ tatra yudhiṣṭhira /
kukkuṭeśvaram ekaṃ tu mayūreśvaram eva ca

gandharvau tu vimānasthau gatau śakrasya mandiram /
tasmiṃs tīrthe naraḥ snātvā bhave naiva punar bhavet

snātvā tilodakaṃ dattvā pitṝṇāṃ paramā gatiḥ /
avaśaḥ svavaśo 'vāpi yastu prāṇān parityajet

na tasya punarāvṛttir ghore saṃsārasāgare /
tatra kīṭāḥ pataṅgāś ca pakṣiṇo 'tha sarīsṛpāḥ

maṇḍūkāḥ pāpavṛkṣāś ca mṛtā yānti śivaṃ padam