Skandapurāṇa: Revākhaṇḍa (revised text) · Chapter 78

iti śrīskandapurāṇe revākhaṇḍe karañjeśvaramahimānuvarṇano nāma saptasaptatitamo 'dhyāyaḥ ||
RKS adhyāya 78
atha aṣṭasaptatitamo 'dhyāyaḥ
mārkaṇḍeya uvāca:
tato gacchec ca rājendra kuṇḍaleśvaram uttamam /
yatra siddhiṃ gato devaḥ kuṇḍadhāro nṛpottama

tapaḥ kṛtvā tu vipulaṃ surāsurabhayaṃ karam /
kuṇḍadhāro mandarasthaḥ krīḍate sa nṛpottama

yudhiṣṭhira uvāca:
kasyānvaye samutpannaḥ kasya putro mahāmatiḥ /
tapas taptvā suvipulaṃ toṣito yena śaṅkaraḥ

etad vistaratas tāta kathayasva mamānagha /
mārkaṇḍeya uvāca:
purā tretāyuge rājan paulastyo nāma viśravāḥ

upaye me mahābhāga bharadvājasutāṃ nṛpa /
putraḥ putraguṇairyuktas tasyāṃ jāto dhanaṃ jayaḥ

jātamātraṃ sutaṃ jñātvā brahmā lokapitāmahaḥ /
cakāra nāma suprīta ṛṣidevasamanvitaḥ

yasmād viśravaso jāto mama pautratvam āgataḥ /
tasmād vaiśravaṇo nāma mayā dattaṃ tavānagha

yaḥ svayaṃ sarvadevānāṃ dhanagoptā bhaviṣyati /
caturtho lokapālānām akṣayo yakṣapo 'pi vā

yakṣo yakṣādhipaḥ śreṣṭhaḥ kuṇḍadhāro 'bhavat sutaḥ /
susvaṃrūpavayaḥ prāpya mātāpitroranujñayā

tapaś cakāra vipulaṃ narmadātīram āśritaḥ /
yatra vyāghreśvaraṃ liṅgaṃ vyāghrakheṭakam uttamam

kuṇḍadhāreṇa tatraiva tapas taptaṃ sudāruṇam /
grīṣme pañcāgnimadhyastho varṣāsvāsārathāraṇaḥ

śiśire jalamadhyastho vāyubhakṣaḥ śataṃ samāḥ /
evaṃ varṣaśate pūrṇe ekāṅguṣṭho 'bhavat tataḥ

cakravad bhramate sūryamabhito bharatarṣabha /
caturthe pañcame tāvat tutoṣa vṛṣavāhanaḥ

varaṃ vṛṇīṣva he vatsa yat te manasi rocate /
tad dadāmi na sandehas tapasā toṣito hy aham

kuṇḍadhāra uvāca:
yadi tuṣṭo 'si me deva varaditsur ihāgataḥ /
tato mannāmakaṃ liṅgaṃ tīrthaṃ caitad bhavatv iti

tathetyuktvā mahādevaḥ somo 'ntardhānamāgamat /
jagāmā kāśam āviśya kailāsaṃ dharaṇidharam

gate cādarśana deva so 'pi yakṣo mudānvitaḥ /
sthāpayāmāsa deveśaṃ kuṇḍaleśvaramuttamam

alaṃkṛtvā gajaṃ dhenuṃ dhūpapuṣpavilepanaiḥ /
vitānaiś cāmaraiś chatrais tathaiva liṅgapūjanaiḥ

tarpayitvā dvijān samyag annapānādi bhūṣaṇaiḥ /
prīṇayitvā mahādevaṃ tataḥ svabhavanaṃ yayau

tadā prabhṛti tat tīrthaṃ triṣu lokeṣu viśrutam /
yudhiṣṭhira paraṃ puṇyaṃ kuṇḍaleśvarasaṃjñakam

tatra tīrthe tu yaḥ kaścid upavāsaparāyaṇaḥ /
arcayed devam īśānaṃ sarvapāpaiḥ pramucyate

suvarṇaṃ rajataṃ vāpi maṇiṃ mauktikam eva ca /
brāhmaṇebhyo dadātyatra sa mukhyo modate divi

tatra tīrthe naraḥ snātvā ṛgyajuḥ sāmasu dvijaḥ /
ṛcam ekāṃ japitvā ca caturvedaphalaṃ labhet

tasmiṃs tīrthe tu godānam annadānam athāpi vā /
yaḥ prayacchati viprebhyas tatphalaṃ śṛṇu pāṇḍava

yāvanti tasya romāṇi tatprasūtikuleṣu ca /
tāvad varṣasahasrāṇi svargaloke mahīyate

svargavāso bhavet tasya putrapautrasamanvitaḥ /
tasmiṃs tīrthe mahābhāga vyāghraś caiva pipāsitaḥ

niṣādānāṃ bhayenaiva aṭavyāmaṭati svayam /
niṣādānāṃ bharyair naṣṭaḥ patito narmadājale

jalapluto mahābhāga liṅgarūpadharo 'bhavat /
uktaścākāśavāṇyā vai vyāghreśvaram anuttamam

pūjyaṃ vai triṣu lokeṣu khyātiṃ yāsyaty asaṃśayam /
tatra tīrthe naraḥ snātvā tal liṅgam arcayet tu yaḥ

brahmahatyādipāpebhyo mucyate nātra saṃśayaḥ /
etat te kathitaṃ rājan kuṇḍaleśvaram uttamam

śravaṇāt kīrtanād asya gosahasraphalaṃ labhet