Skandapurāṇa: Revākhaṇḍa (revised text) · Chapter 77

iti śrīskandapurāṇe revākhaṇḍe dāruvanaprasaṅge narmadeśvarakīrtanaṃ nāma ṣaṭsaptatitamo 'dhyāyaḥ ||
RKS adhyāya 77
tato gacchec ca rājendra kapilātīrtham uttamam /
snānamātraḥ prasaṅgena narmadeśvarakīrtanam

tasmiṃs tīrthe tu rājendra kapilāṃ yaḥ prayacchati /
yāvanti romakūpāni tatprasūtikuleṣu ca

tāvanty abdasahasrāṇi viṣṇuloke mahīyate /
jale vāgnipraveśe vā athavānaśake naraḥ

tatra tīrthe mṛto yas tu na garbhe jāyate kvacit /
eva hi vidhir uddiṣṭaḥ sakalo nṛpasattama

tīrthasya ca phalaṃ puṇyaṃ kim anyat paripṛcchasi /
dhanyaṃ yaśasyam āyuṣyaṃ sarvaduḥkhaghnam uttamam

etac chrutvā naro rājan sarvapāpaiḥ pramucyate /
tato gacchet tu rājendra karañjeśvaram uttamam

tatra siddho mahābhāga daityo vai lokaviśrutaḥ /
yudhiṣṭhira uvāca:
ko 'sau siddho mahābhāga tatra tīrthe mahātapāḥ

kasya putro 'tha kiṃkāryaṃ kālaḥ kaḥ kathaya dvija /
mārkaṇḍeya uvāca:
purā cādiyuge rājan mānaso brahmaṇaḥ sutaḥ

vedavedāṅgatattvajño marīcir nāma nāmataḥ /
tasyā 'pi kaśyapo rājan kālena mahatānagha

putro 'tha mānaso jātaḥ sākṣād brahmeva cāparaḥ /
kṣamā damā dayā dānaṃ satyaṃ śaucam athārjavam

marīces tu guṇās tv ete santi bhānti ca bhārata /
evaṃ guṇagaṇāḥ kīrtiḥ kaśyape dvijasattame

jñātvā prajāpatir dakṣo bhāryārthe svasutāṃ dadau /
aditir vai danuś caiva tathā hyekādaśā parāḥ

yāsāṃ putrāś ca pautrāś ca jātā bhrātarasaṃkhyakāḥ /
aditir janayāmāsa putrānindrapurogamān

nāgān pretapiśācāṃś ca patatrīn yakṣarākṣasān /
siṃhavyāghravarāhāṃś ca anyā ity evam ādayaḥ

jātās tasya mahābāho kaśyapasya prajāpateḥ /
yais tu lokatrayaṃ vyāptaṃ sthāvaraṃ jaṅgamaṃ mahat

tathānyaś ca mahābhāgo danoḥ putro vyajāyata /
sarvalakṣaṇasampannaḥ karañjo nāma nāmataḥ

baler iva mahābhāga cacāra sumahat tapaḥ /
vareṇa chandayāmāsa tripurāntakaraḥ prabhuḥ

bhoḥ karañja mahāsattva parituṣṭo 'smi te 'nagha /
varaṃ vṛṇīṣva bhadraṃ te yat te manasi vartate

karañja uvāca:
yadi tuṣṭo 'si me deva tripurāntakara prabho /
tataḥ putraiś ca pautraiś ca sahitaṃ me dhanaṃ kuru

tathety uktvā mahādeva umayā sahitas tadā /
vṛṣārūḍho gaṇaiḥ sārdhaṃ tatraivāntaradhīyata

gate cādarśanaṃ deve so 'pi daityo mudānvitaḥ /
svanāmnā ca mahādevaṃ sthāpayitvā gṛhaṃ yayau

tadā prabhṛti tattīrthaṃ karañjeśvaram uttamam /
snānamātro naro rājan mucyate brahmahatyayā

tasmiṃs tīrthe mahārāja tarpayet pitṛdevatāḥ /
so 'gniṣṭomasya yatpuṇyaṃ phalaṃ prāpnoty asaṃśayam

anāśakaṃ tu yaḥ kuryāt tasmiṃs tīrthe narottama

athāgnau ca jale prāṇān bhūtale vāpi yas tyajet /
svarge sa tu vasen nūnaṃ varṣāṇām ayutadvayam

dhanavān sukule cānte jāyate vipule kule /
vedavedāṅgatattvajñaḥ sarvaśāstraviśāradaḥ

rājā vā rājatulyo vā jāyate nātra saṃśayaḥ /
putrapautrasamāyuktaḥ sarvavyādhivivarjitaḥ

etat te sarvamākhyātaṃ yat tvaṃ māṃ paripṛcchasi /
tīrthasya tu phalaṃ yuktyā sarvadāneṣu bhārata

etat puṇyaṃ pāpaharaṃ dhanyaṃ duḥkhapraṇāśanam /
paṭhatāṃ śṛṇvatāṃ caiva tīrthamāhātmyam uttamam

yas tu śrāvayate śrāddhe sa tatpitṛparāyaṇaḥ /
akṣayaṃ tasya sarvaṃ syāc chaṅkaras tv idam abravīt