Skandapurāṇa: Revākhaṇḍa (revised text) · Chapter 75
iti śrīskandapurāṇe revākhaṇḍe dārutīrthatamahimānuvarṇano nāma catuḥsaptatitamo 'dhyāyaḥ ||
RKS adhyāya 75
mārkaṇḍeya uvāca:
tato gacchec ca rājendra devatīrtham anuttamam /
yatra devās trayastriṃśat taptvā siddhiṃ parāṃ gatāḥ
purā devāsure yuddhe dānavair baladarpitaiḥ /
indro devagaṇaiḥ sārddhaṃ svarājyāc cyāvito bhṛśam
hastyaśvarathayānaughair mardayitvā ca vāhinīm /
viśaktā bhejire mārgaṃ prahārair jarjarīkṛtāḥ
jambhaśumbhaniśumbhādyais tu huṇḍagrahakaiḥ saha /
balibhir bādhitāḥ sarve brahmāṇam upatasthire
praṇamya śirasā devaṃ brahmāṇaṃ parameṣṭhinam /
vyajñāpayanta deveśam indrāgnikapurogamāḥ
paśya paśya mahābhāga dānavair ākulīkṛtāḥ /
bādhitāḥ putradārābhyāṃ tvām eva śaraṇaṃ gatāḥ
paritrāyasva deveśa sarvalokapitāmaha /
nānyā gatiḥ sureśāna muktvā tvāṃ parameṣṭhinam
brahmovāca:
dānavānāṃ vighātārthaṃ narmadātaṭam āśritāḥ /
tapaḥ kuruta bho devās tapo hi paramaṃ balam
nānyopāyo na vai mantro na vidyā na ca vikramaḥ /
vinā revājalaṃ puṇyaṃ sarvapāpakṣayaṃ karam
dāridryavyādhimaraṇabandhanavyasanāni ca /
etāni caiva pāpasya phalānīti matir mama
evaṃ jñātvā vidhānena tapaḥ kuruta duṣkaram /
pūjyate śāmbhavaṃ sarvaiḥ prāpnuyātābhayaṃ tataḥ
tacchrutvā vacanaṃ devā brahmaṇaḥ parameṣṭhinaḥ /
narmadāmāgatāḥ sarve tadendrāgnipurogamāḥ
vicerus tatra vipulaṃ tapaḥ paramaduḥsaham /
sakalpaiḥ paramāṃ rājaṃs tat te siddhim avāpnuvan
tadā prabhṛti tat tīrthaṃ devatīrtham iti śrutam /
gīyate sarvalokeṣu sarvapāpakṣayaṃkaram
tatra śraddhātmanā yo 'pi vidhināpi samanvitaḥ /
snānaṃ samācared bhaktyā sa labhen mauktikaṃ phalam
yas tam arcayate devaṃ sarvadevais tu pūjitam /
labhate cāśvamedhasya phalaṃ yāgasya cottamam
yas tu bhojayate viprāṃs tasmiṃs tīrthe narādhipa /
tatra devaśilā ramyā mahāpuṇyādrirvadhinī
saṃnyāsena mṛtānāṃ tu narāṇāmakṣayā gatiḥ /
agnipraveśaṃ yaḥ kuryād devatīrthe yudhiṣṭhira
rudraloke vaset tāvad yāvad āhūtasamplavam /
evaṃ snānaṃ japo homaḥ svādhyāyo devatārcanam
sukṛtaṃ duṣkṛtaṃ vāpi tatra tīrthe 'kṣayaṃ bhavet /
etāvad vidhir uddiṣṭā utpattiś caiva bhārata
devatīrthasya caritaṃ sarvatīrtheṣv anuttamam
Original text: Skandapurāṇa: Revākhaṇḍa (RKS) · Edition: Giri, Oṅkārānanda (ed.) - atha bṛhat śrīnarmadāpurāṇam revākhaṇḍam (parivardhita tṛtīya saṃskaraṇa). Jñānasatra Prakāśana Nyāsa, Hośaṅgābāda: 1994. · Data entry Jürgen Neuss · GRETIL (Göttingen) · CC BY-NC-SA 4.0