Skandapurāṇa: Revākhaṇḍa (revised text) · Chapter 74

iti śrīskandapurāṇe revākhaṇḍe meghanādeśvaramahimānuvarṇano nāma trisaptatitamo 'dhyāyaḥ ||
RKS adhyāya 74
mārkaṇḍeya uvāca:
tato gacchec ca rājendra dārutīrtham anuttamam /
dāruko yatra saṃsiddhim indrasya dayitaḥ sakhā

yudhiṣṭhira uvāca:
dārukeṇa kathaṃ tāta tapaścīrṇaṃ purā 'nagha /
vidhānaṃ śrotum icchāmi sarvapāpakṣayaṃ karam

mārkaṇḍeya uvāca:
ahaṃ te kathayiṣyāmi vicitraṃ yat purātanam /
vṛttaṃ samabhavat tatra ṛṣīṇāṃ bhāvitātmanām

sūto vajradharasyāsīt mātalirnāmanāmataḥ /
sa putraṃ śaptavān pūrvaṃ kathaṃcit kāraṇāntare

śāpahetor vepamāna indrasya caraṇau śubhau /
prapīḍya tatra devendraṃ vijñāpayati bhārata

mama tātābhiśaptasya anāthasya sureśvara /
karmaṇā kena śāpasya ghorasyānto bhaviṣyati

śakra uvāca:
narmadātaṭam āśritya toṣaya tvaṃ maheśvaram /
tiṣṭha yāvad yugasyāntaṃ punarjananam āpsyasi

punarbhūtvā yadukule dāruko nāma nāmataḥ /
ārohayitvā deveśaṃ śaṅkhacakragadādharam

mānuṣaṃ tatra sampannaṃ tataḥ siddhim avāpsyasi /
evam uktas tu devena sahasrākṣeṇa bhārata

praṇamya śirasā bhūmim āgato 'sau hataprabhaḥ /
narmadā taṭam āśritya karśitasvakalevaraḥ

vratopavārsair vividhair japahomaparāyaṇaḥ /
mahādevaṃ mahātmānaṃ varadaṃ śūlapāṇinam

abhajat parayā bhaktyā yāvad āhūtasamplavam /
aṃśāvataraṇe viṣṇos tato bhūtvā mahāmatiḥ

toṣayitvā jagannāthaṃ tato yātaḥ sa sadgatim /
eṣa te sambhavas tāta dārutīrthasya suvrata

kathitas tu mayā pūrvaṃ yathā me śaṅkaro 'bravīt /
tato yudhiṣṭhiro rājā vismayāviṣṭacetanaḥ

bhrānto 'valokayāmāsa stabdharomā muhur muhuḥ /
tasmiṃs tīrthe naraḥ snātvā vidhipūrvaṃ nareśvara

upāsya sabhyāṃ tatraiva saṃtarpya pitṛdevatāḥ /
dehatyāgaṃ ca tatraiva yaḥ karoti samāhitaḥ

so 'śvamedhaphalaṃ prāpya ramate śivasannidhau /
tasmiṃs tīrthe tu yo bhaktyā bhojayed brāhmaṇaṃ śuciḥ

sa tu viprasahasrasya labhate phalam uttamam /
snānaṃ dānaṃ tapo homaḥ svādhyāyaḥ pitṛtarpaṇam

yatkṛtaṃ tu śubhaṃ tatra tatsarvaṃ labhate 'kṣayam