Skandapurāṇa: Revākhaṇḍa (revised text) · Chapter 70

iti śrīskandapurāṇe revākhaṇḍe śambhustutirnāmaikonasaptatitamo 'dhyāyaḥ ||
RKS adhyāya 70
yudhiṣṭhira uvāca:
kimarthaṃ saṃstuto devo brahmaṇā tena tatra vai /
śuklatīrtham idaṃ kasmādāste yatra maheśvaraḥ

etat sarvaṃ samākhyāhi pṛcchato me mahāmune /
mārkaṇḍeya uvāca:
śṛṇu rājan kathāṃ divyāṃ svargārhaṇyām anuttamām

yāṃ śrutvā sarvapāpebhyas tīrthasnānena mucyate /
yayātir nāma dharmātmā satyadharmaparāyaṇaḥ

cakravartī nṛpaśreṣṭhaḥ sarvadharmabhṛtāṃ varaḥ /
iyāja sa mahāyajñaiḥ śatakratur ivāparaḥ

nadī madhumatī puṇyā revayā yatra saṅgatā /
yatra yajñaḥ samārabdha ṛtvigbhir brāhmaṇaiḥ saha

madhyeśvaraṃ yatra liṅgaṃ svayaṃdevo maheśvaraḥ /
tatra snātā divaṃ yānti ye mṛtā na punarbhavāḥ

cakreṇa viṣṇunā tatra ghātitau madhukaiṭabhau /
arcanāt tasya devasya gosahasraphalaṃ labhet

tilatoyapradānena piṇḍadānena bhārata /
pitaras tasya tṛpyanti yāvad indrāścaturdaśa

tatra yajñaḥ samārabdho hariśaṅkaravarjitaḥ /
jaṭāsuras tatra daityaś chidraṃ dṛṣṭvā samāgataḥ

tatovidhvaṃsito yajño dānavair baladarpitaiḥ /
yajñayūpā yajñapātraṃ daśa dikṣu nipātitāḥ

bhukto hutapuroḍāśaḥ somapānaṃ ca taiḥ kṛtam /
praṇaṣṭā devatāḥ sarvā dānavānāṃ bhayena ca

aṣṭottaraśataṃ devā mṛgarūpeṇa nirgatāḥ /
dhanado yakṣarūpeṇa praṇaṣṭaḥ svapurīṃ gataḥ

mahiṣārūḍho dharmarājo gajārūḍhaś śatakratuḥ /
meṣārūḍho havyavāho nirgatā vratamāsthitāḥ

varuṇaś ca samāyātaḥ praṇaṣṭaḥ svapurīṃ gataḥ /
makarāsanamārūḍho vāyuś ca mṛgam āśritaḥ

īśāna īśarūpeṇa vṛṣārūḍhaḥ palāyitaḥ /
astrāṇi lokapālānāṃ hṛtāni danusambhavaiḥ

ekākī yānam āruhya kathaṃ yāmi striyā saha /
cintayitvā nṛpaśreṣṭhaś cāstraṃ jagrāha bhārata

tiṣṭha tiṣṭheti coktvā vai daityasiṃha durāsadam /
na kṣatrakulasaṃjātā jātu dṛṣṭvā palāyitāḥ

daśa dvādaśavarṣāṇi vimukhās tava pūrvajāḥ /
na cātrāhvānito rudro rudra bhāgo na kalpitaḥ

yajñe 'smin yajñapuruṣo nāhūto bhagavān hariḥ /
tena doṣeṇa me yajño dānavaiś ca vināśitaḥ

evam uktvā nṛpaśreṣṭho rudraṃ dhyātvā maheśvaram /
raudrarūpaṃ samāsthāya jyāghoṣaṃ ghoṣarūpiṇam

jagrāha kopān nistriṃśaṃ nijaghāna ca dānavān /
āhūtāś ca punardevāḥ sarve brahmapurogamāḥ

ūcus te vacanaṃ devā rājānaṃ prati bhārata /
tvayā samo 'tra rājarṣe na bhūto na bhaviṣyati

devānāṃ vacanaṃ śrutvā yayātir vākyam abravīt /
punaḥ pravartito yajño haraviṣṇuprasādataḥ

yuktaṃ palāyanaṃ cātra kṣatriyasya na vidyate /
stutas tu tena kāryeṇa śūlapāṇiḥ pinākadhṛk

pātālād utthitaṃ tatra liṅgaṃ kālānalaprabham /
śuklīkṛtaṃ jagat sarvaṃ prabhayā tasya bhārata

varaṃ vṛṇīṣva bhadraṃ te tam uvāca vṛṣadhvajaḥ /
yayātir uvāca:
yadi tuṣṭo 'si me deva varaṃ dātuṃ mamecchasi

idaṃ sthānaṃ na moktavyam umayā saha śaṅkara /
yajñadānādikaṃ sarvam akṣayaṃ cātra sarvadā

tapohīnā narā ye ca dānahīnāḥ sakilbiṣāḥ /
te sarve tvatpuraṃ yāntu śuklatīrthaprabhāvataḥ

tam uvāca mahādevaḥ satyam etat tavoditam /
yaṃ yaṃ kāmayate kāmaṃ taṃ taṃ prāpnoti mānavaḥ

asya tīrthasya mahātmyāl liṅgasyāsya samarcanāt /
narakaṃ naiva paśyanti janmajanmani bhārata

etat te kathitaṃ rājan yathā skandaśivoditam /
tatra ye nihatā daityāḥ prāptās te 'pi śivālayam

svaṃ svaṃ yānaṃ samārūḍhā yayur devās triviṣṭapam /
mudā paramayā yuktaḥ stūyamāno nṛpottamaḥ

yayātir nāma rājarṣī rājyaṃ kṛtvā divaṃ gataḥ /
śravaṇāt kīrtanād asya śivaloke mahīyate