Skandapurāṇa: Revākhaṇḍa (revised text) · Chapter 69

iti śrīskandapurāṇe revākhaṇḍe vārāhamahimānuvarṇano nāmāṣṭaṣaṣṭitamo 'dhyāyaḥ ||
RKS adhyāya 69
mārkaṇḍeya uvāca:
tato devapathaṃ tīrthaṃ sarvadevamayaṃ śubham /
tatra snātaś ca vidhivat sarvayajñaphalaṃ labhet

māse māse kuśāgreṇa somayāgaṃ karoti yaḥ /
sa revājalapūtasya kalāṃ nārhati ṣoḍaśīm

liṅgaṃ devapathaṃ nāma surāsuranamaskṛtam /
śraddhayā tad darśanena pitṝṇāṃ paramā gatiḥ

caitre māse caturdaśyā pakṣayor ubhayor api /
snānārthaṃ sarvatīrthāni jagmuḥ kartuṃ ca satkriyām

yaddevaloke devānām īpsitaṃ ca nṛpadhvaja /
sahasrāṇi munīndrāṇāṃ tasmiṃś śivamupāsate

cāndrāyaṇaparāḥ kecid brahmakūrcaparās tathā /
kandamūlaphalāhārā jalāhārā jalapriyāḥ

agnihotraparā nityaṃ tathā hutahutāśanāḥ /
upāsate devapathaṃ saṃsiddhiṃ paramāṃ gatāḥ

athānyat saṃpravakṣyāmi tīrthaṃ pāpapraṇāśanam /
sahasrayajñaṃ paramaṃ sarvakāmaphalapradam

ekādaśyāṃ mārgaśīrṣe pūjayitvā janārdanam /
sahasrayajñasyeṣṭasya phalaṃ prāpnoti mānavaḥ

na paśyed yamalokaṃ ca tiryagyoniṃ na gacchati /
tīrthasyāsya prabhāveṇa naro vigatakalmaṣaḥ

etat te kathitaṃ rājan puṇyākhyānam anuttamam /
śravaṇāt kīrtanād asya viṣṇuloke mahīyate

śuklatīrthaṃ tato gacchet sarvatīrthamayaṃ śubham /
yatra snāto 'pi labhate daśadhenuphalaṃ naraḥ

śuklīkṛtās tena devā brahmaviṣṇumaheśvarāḥ /
sapādakoṭistīrthānāṃ śuklatīrthe vyavasthitā

aṣṭahastapramāṇaṃ ca śuklatīrthaṃ yudhiṣṭhira /
tatra kālāgnirudraś ca śrīkaṇṭhaś ca tathā paraḥ

tais tais tapobhirugraiś ca tatra siddhiṃ parā gatāḥ /
śuklatīrthaprabhāveṇa modante divi devatāḥ

śakro 'pi ca purādhyakṣaṃ devadevam umāpatim /
revātoyena saṃsnāpya bilvapatraiḥ samārcayat

paurṇamāsyām amāvasyāṃ somaḥ sūryaḥ prabhāvatīm /
tatra snāto grahaiḥ sārddhaṃ nakṣatradhruvamaṇḍalaiḥ

tena devāś ca dīvyante śuklatīrthaprabhāvataḥ /
kaśyapasyāśramaṃ puṇyaṃ surasiddhaniṣevitam

munīnām ayutaṃ tatra svayaṃ tiṣṭhati bhārata /
kandamūlaphalāhārā jalāhārās tathā pare

śākāhārā nirāhārā brahmakūrcās tathā pare /
cāndrāyaṇaparāḥ kecidanye māsopavāsinaḥ

ṛṣikoṭyas trayastriṃśac chukleśvaramupāsate /
rāhugraste tathā candre paurṇamāsyāṃ tithau tathā

āyānti sarvatīrthāni snātum etac chivoditam /
sthāneśvare yatphalaṃ syād rāhusūryasamāgame

tatphalaṃ prāpnuyāt sarvaṃ śuklatīrthe na saṃśayaḥ /
hemadhenudharādīni rūpyadā gajadās tathā

etad dattvā mahārāja puṇyasaṃkhyā na vidyate /
dhanadena kubereṇa devagandharvadānavaiḥ

rāhusūryasamāyoge śuklatīrthe maheśvaraḥ /
candanāgurukarpūrapuṣpamālābhir arcitaḥ

vitānadhvajamukhyaiś ca dīpamālāprabodhanaiḥ /
asya tīrthaprabhāveṇa yakṣarājo dhaneśvaraḥ

bhogā nānāvidhās tena samprāptā divi devatāḥ /
sarvatīrtham ayaṃ tīrthaṃ sarvadevam ayaṃ ca yat

api varṣasahasreṇa śuklatīrthasya varṇanam /
na śakyate suraiḥ kartuṃ purāṇe skandakīrtite

pāpayonigato yaś ca tiryagyonigataś ca yaḥ /
brahmahā ca surāpaś ca śivanirmālyabhakṣakaḥ

mucyate tena pāpena tīrthasyāsya prabhāvataḥ /
tatra snānaṃ naraḥ kṛtvā pūjayitvā vṛṣadhvajam

surāsuragaṇaiḥ sarvaiḥ pūjyate narasattama /
etat te kathitaṃ rājan mahāpātakanāśanam

pitāmahena yatreṣṭo yajñe yajñeśvaraḥ purā /
stotraṃ kṛtvā yathā nyāyaṃ devadevasya śūlinaḥ

pūjayitvā tu śukleśaṃ brahmā stotram udāharat /
namaḥ śivāya śāntāya jñānavijñānarūpiṇe

sūkṣmāya sūkṣmarūpāya sarvasūkṣmāya hetave /
sūkṣmāṇām api sūkṣmāya namaḥ sūkṣmatamāya ca

divyāya divyarūpāya divyadehāya setave /
divyānām api divyāya namo divyatamāya ca

vyomaprabhāya bhāvāya aghorāya namo namaḥ /
vyomapramāṇadhāmāya vāmeśāya namo namaḥ

parāya parameśāya pāramārthikahetave /
parāya paramuktāya namaḥ paratarāya ca

ekajihvadvijahvāya bahujihvāya te namaḥ /
tathaivāsaṃkhyajihvāya triṇetrāya namo namaḥ

pūjyāya pūjyapūjyāya sarvapūjyaikahetave /
nityāyānityarūpāya nityanityaikahetave

nityānām api nityāya namo nityatamāya ca /
śaktāya śaktirūpāya sarvaśaktyekahetave

śaktānām api śaktāya namaḥ śaktatamāya ca /
śuddhāya sarvaśuddhāya sarvaśuddhyekahetave

kālāya kālarūpāya sarvakālaikahetave /
kālānām api kālāya namaḥ kālatamāya te

sarvamantraśarīrāya sarvamantraikahetave /
mantrāṇām api mantrāya namo mantratamāya ca

aprameyamaheśāya īśānāya namo namaḥ /
yogāya yogarūpāya yogapuruṣa te namaḥ

ekakaṇṭhadvikaṇṭhāya bahukaṇṭhāya te namaḥ /
asaṃkhyakaṇṭhayuktāya nīlakaṇṭhāya te namaḥ

anantāya maheśāya hartre kartre namo 'stu te /
namaste 'stu mahādeva namaste 'stu sadāśiva

namaste 'stu mahāśuddha namas tubhyaṃ namo namaḥ /
namo bhasmāṅgarāgāya namaḥ khaṭvāṅgadhāriṇe

sarvātmane namas tubhyaṃ viśveśāya namo namaḥ /
sarvajñāya namas tubhyaṃ sanāthāya namo namaḥ

avyaktāya namas tubhyaṃ śāśvatāya namo namaḥ /
kailāsavāsine tubhyaṃ namaḥ pātālavāsine

tvayā vyāptam idaṃ sarvaṃ lokālokaṃ carācaram /
api varṣasahasreṇa kaḥ stotuṃ śaktimān bhavet

iti stavena divyena yaḥ stauti parameśvaram /
vidhūya sarvapāpāni rudraloke mahīyate