Skandapurāṇa: Revākhaṇḍa (revised text) · Chapter 7

iti revākhaṇḍe narmadāmāhātye ṣaṣṭho 'dhyāyaḥ ||
RKS adhyāya 7
mārkaṇḍeya uvāca:
anyattīrthaṃ mahāpuṇyaṃ sarvapāpapraṇāśanam /
aśvamedhasamudbhūtā nadī yatra varāṅganā

snātvā ca saṅgame yatra hayamedhaphalaṃ labhet /
vyādhibhir mucyate yatra nārī vā yadi vānaraḥ

śrāddhaṃ tatra prakurvantaḥ pitṝṇāṃ prītivardhanam /
tripuryāṃ pūrvabhāge tu diśi yāmyāṃ śivaḥ sthitaḥ

anugrahārthaṃ lokānāṃ śaivakṣetraṃ vidurbudhāḥ /
pañcāśītiḥ kurukṣetre paścāśītir ivātra tu

rāhusūryasamāyoge samānaṃ kīrtitaṃ suraiḥ /
śrāddhe trīṇi ca lakṣāṇi purāṇe kīrtitāni vai

tīrthānāṃ tāni atraiva tiṣṭhanti nṛpasattama /
yatra tiṣṭhati deveśo mādhavo madhusūdanaḥ

utpalāvartanāmā ca sahasramastako hariḥ /
haraśca dvividhāve tau tṛtīyā caiva narmadā

tasyāḥ kiṃ varṇyate rājan devair api savāsavaiḥ /
tatra snātvā mahārāja sambhavo na punar bhavet

pāpayoniṃ ca na viśed yamalokaṃ na paśyati /
arcanād devadevasya gāṇapatyam avāpyate

utpanno hi harir yatra śaṅkhacakragadādharaḥ /
upāsyate suraiḥ sarvair brahmaśakrapurogamaiḥ

krośamātraṃ harikṣetraṃ kathaṃ śocanti mānavāḥ /
atrāntare mṛtā ye ca kṛmikīṭapataṅgamāḥ

te 'pi yānti harer lokaṃ kiṃ punarvaiṣṇavā nṛpa /
avaśaḥ svavaśo 'pi syāt prāṇatyāgaṃ karoti yaḥ

daśavarṣasahasrāṇi rājā vaidyādhare pure /
tilodakapradānena piṇḍadānena bhārata

pitaras tasya tṛpyanti tṛptā yānti parā gatim /
ekādaśyāṃ nirāhāro gandhapuṣpaiḥ samarcayet

rātrau jāgaraṇaṃ kṛtvā dīpamālāṃ prabodhayet /
dvādaśyāṃ pañcagavyaṃ tu haviṣyānnena pāraṇam

bhaktyā tu bhojayed viprān sahasraṃ ca sadakṣiṇām /
oṃ namo bhagavate vāsudevāya ||
imaṃ mantraṃ japan yastu śucir bhūtvā samāhitaḥ

na tasya punarādhānaṃ janma caiva yudhiṣṭhira /
anekabhāvikaṃ ghoraṃ tūlarāśim ivānalaḥ

tatkṣaṇād dahate kṛtsnamedhāṃsīvahutāśanaḥ /
kalpakalpānugau devau nārāyaṇamaheśvarau

dakṣiṇāṃ diśamāsthāya revātīre vyavasthitau /
arcitau ca tau deveśau surāsuragaṇais tathā

siddhavidyādharair yakṣair gandharvaiḥ kinnarair naraiḥ /
sthāṇuḥ puṇyajalāvarte hyavatāra purākṛtaḥ

anugrahāya lokānāṃ devānāṃ hitakāmyayā /
nanāda sumahānādaṃ ghorarūpaṃ bhayānakam

pinākinā ca śūlena bhittvā caiva rasātalam /
samānītā ca sāvitrī svargasopānapaddhatiḥ

mānavāḥ kṣīṇapāpāś ca tathā yānti parāṃ gatim /
ajñānatama sā dhvastā nāvarohānti ye janāḥ

ātmānaṃ nāvamanyante pāpopahatacetasaḥ /
kalpagāṃ ye na sevante teṣāṃ janma nirarthakam

aṣṭāviṃśatir atraiva liṅgānāṃ tu svayambhuvām /
pūjane saṃsthitā rājan chivasya ca mahātmanaḥ

sthāneśvaraṃ mahādevaṃ śūlapāṇiṃ tathā param /
sapteśvaraṃ ca kalpeśaṃ hiraṇyaṃ jātavedasam

prājāpatyaṃ siddhanāthaṃ śaśāṅkanayanaṃ tathā /
anukeśaṃ tathā skandam āśvinaṃ taijasaṃ tathā

brahmeśvaraṃ cāgnigarbhaṃ śrīkaṇṭhaṃ ca umāpatim /
nīlakaṇṭhaṃ ca khaṭvāṅgaṃ mahākālaṃ ghaṭeśvaram

trilocanaṃ tryambakaṃ ca devadevaṃ maheśvaram /
etāny anyāni caiveha siddhaliṅgāni bhārata

anaṅgaṃ kāmadevaṃ ca ratiprītisamanvitam /
siddhamanvantaraṃ caiva yatrānaṅgatrayodaśī

rambhātṛtīya tatraiva tathā kṛṣṇāṣṭamī nṛpa /
vidyādharī ca tatraiva urvaśī ca tilottamā

ahalyā menakā caiva tathā 'nyāś ca varāṅganāḥ /
dākṣāyaṇī cānumatī campakā saṃbharāyaṇī

etāścā 'nyāśca tatraiva bahvyaḥ siddhā viśāmpate /
keśavasya purī ramyā puṇyā pāpaharā nṛpa

surāsurāṇāṃ sarveṣāṃ dānavānāṃ ca bhārata /
svargamārgapradā devī tathā hariharātmikā

etat te kīrtitaṃ rājan yathā vṛṣṭaṃ purātanam /
snānāvagāhanāt pānācchravaṇāt kīrtanād api

anekabhāvikaṃ ghoramaghaṃ naśyati tatkṣaṇāt /
tatas tasmin mahābhāga kapilātīrthamuttamam

revāyā uttare kūle sarvapāpaharaṃ param /
tatra snātvā naro rājan nārī vāpi jitendriyā

tarpayitvā pitṝn devān mucyate ca ṛṇatrayāt /
brāhmaṇān bhojayitvā tu labhate paramāṅgatim