Skandapurāṇa: Revākhaṇḍa (revised text) · Chapter 64

iti śrīskandapurāṇe revākhaṇḍe kubjāmāhātmye triṣaṣṭitamo 'dhyāyaḥ ||
RKS adhyāya 64
mārkaṇḍeya uvāca:
athānyat kathayiṣyāmi tīrthaṃ tīrthavaraṃ śubham /
yāmyapradeśe revāyā āśramaḥ surapūjitaḥ

suvarṇadvīpapavikhyāto devadroṇīsamāvṛtaḥ /
hārīto gautamo viṣṇuḥ sāvarṇiḥ kauśikas tathā

ete cānye ca bahavo munayaḥ śaṃsitavratāḥ /
māsopavāsinaḥ kecid anye pakṣopavāsinaḥ

cāndrāyaṇaparāś cānye tathānye kṛcchracāriṇaḥ /
phalamūlāśinaḥ kecit tathānye vāyubhakṣakāḥ

kaṇadhūmaṃ pibanty anye jalāhārās tathā pare /
ekapādāḥ sthitāḥ kecid anye cārdhapadāḥ sthitāḥ

dantolūkhalinaḥ kecidanye sūryāvalokinaḥ /
brāhmaṇāś ca brahmavidaḥ śrutismṛtiviśāradāḥ

itihāsapurāṇāni mokṣopāyavicintakāḥ /
agnihotraparā nityaṃ japayajñakriyāparāḥ

vedadhvanitanirghoṣais tārayanti jagattrayam /
na tasmin saṃcaret pāpaṃ tamaḥ sūryodaye yathā

mekalādakṣiṇe tīre brahmaloka iva sthitaḥ /
āmrajambūkadambaiś ca kapitthair bilvadāḍimaiḥ

kadalībījapūrādyair jambīraiḥ panasais tathā /
nyagrodhabadarair mukhyair bahuvṛkṣavibhūṣitam

punnāgair nāgabakulair aśokais tilakais tathā /
mandāraiś campakaiś cāmrātakair nīlotpalotpalaiḥ

patrapuṣpaphalopetair vṛkṣaiḥ sarvair alaṃkṛtam /
nānāpakṣigaṇopetaṃ siddhagandharvasevitam

vyāharatyaṇḍajāḥ sarve mānuṣāṇāṃ girā nṛpa /
etad guṇasamāyuktaṃ suvarṇadvīpam uttamam

svāyambhuve 'ntare rājann ādikalpe kṛte yuge /
arcanād devadevasya suvarṇadvīpavāsinaḥ

apahāya tamaḥ kṛtsnaṃ loke krīḍanti śāṅkare /
pitṝṇām annadānena tilatoyapradānataḥ

malāpakarṣaṇaṃ kṛtvā vasanti brahmaṇaḥ pure /
puṇyāyāṃ bhūpakārtikyāṃ sarvatīrthaphalapradaḥ

naitat paśyanti manujāḥ kalau māyāvimohitāḥ /
kalpagā yāmyabhāge tu tīrthakoṭiranekadhā

prasiddhaṃ siddhamunibhir jñāyate kevalaṃ hi tat /
nāstikair bhinnamaryādaiḥ purāṇasmṛtinindakaiḥ

tailābhyaktair na vedoktakarai revātaṭe tathā /
kalimāyāvimūḍhaiś ca sthānaṃ tanna pradṛśyate

hiraṇyagarbhāsthāne tu yasmin vahati kalpagā /
yajñagarbheśvaraṃ nāma śivaliṅgaṃ prakīrtitam

pūjyate siddhagandharvaiḥ surāsuramahoragaiḥ /
yatra vaivasvato rājā sūryaputro mahāyaśāḥ

tasya tīrthasya māhātmyāc candrabimbānano 'bhavat /
caitrasyaiva tu māsasya śuklapakṣe narādhipa

caturdaśyāṃ paurṇamāsyāṃ yatra sannihito haraḥ /
tilodakapradānena piṇḍadānena bhārata

pitṝn samuddharet tatra narakād bhūridakṣiṇaḥ /
nivased vaiṣṇave loke yāvac candrārkadarśanam

tatra yaddīyate dānaṃ kurukṣetrasamaṃ hi tat /
prāṇatyāge kṛte tatra na paśyanti yamālayam

revāyā uttare kūle paryaṅko nāma parvataḥ /
sa ca vindhyasutaḥ śrīmān sarvadevamayaḥ śubhaḥ

tatra pāpaharo viṣṇuḥ svayaṃ tiṣṭhati keśavaḥ /
narapāpaharo yas tu narmadātaṭam āśritaḥ

tatra snātvā mahārāja gosahasraphalaṃ labhet /
tarpitāḥ pitaras tasya tṛptā yānti hareḥ puram

ekādaśīṃ dvādaśīṃ vā tatra yaḥ kurute naraḥ /
na tasya punarāvṛttir martyaloke durāsade

krośamātrapramāṇaṃ ca harikṣetraṃ prakīrtitam /
apamṛtyumṛtā ye ca te yānti paramāṃ gatim