Scripture Library

Skandapurāṇa: Revākhaṇḍa (revised text) · Chapter 59

#
iti śrīskandapurāṇe revākhaṇḍe śivalokavarṇano nāmāṣṭapañcāśattamo 'dhyāyaḥ ||
RKS adhyāya 59
yudhiṣṭhira uvāca:
dānadharmavidhānaṃ ca śrotum icchāmi kalpaga /
daridrā bhikṣavo vāpi kathaṃ yānti śivālayam

59.2

vidhinā kena dānena mucyate duṣkṛtaṃ tathā /
lokānāṃ ca hitārthāya kathayasva mahāmune

59.3

mārkaṇḍeya uvāca:
śṛṇu rājan yathā nyāyaṃ kathayāmi tavānagha /
puṣkaraṃ bilvapatraṃ ca kuśāstoyaṃ ca nārmadam

59.4

svayambhūr bhagavān āha sāmānyaṃ dharmakāraṇam /
śraddhāpūtāḥ sarvadharmāḥ purāṇaṃ śrutayas tathā

59.5

tasyopadeśadharmeṇa narā yānti triviṣṭapam /
yas tūlapūrṇavistīrṇaṃ raktavastraṃ sasūtrakam

59.6

vyāghracarmakṛtaṃ vāpi navavastrāvaguṇṭhitam /
kṛṣṇājinopavītaṃ ca puṇyadhūpādhivāsitam

59.7

śivadhyānābhiyuktāya śraddhayā vinivedayet /
tat tūlavastratantūnāṃ romasaṃkhyāsti yāvatī

59.8

tāvad varṣasahasrāṇi śivaloke mahīyate /
modate sarvalokeṣu bhuktvā bhogān anekaśaḥ

59.9

punaś ca kṣitimāsādya siṃhāsanapatir bhavet /
tṛṇavalkalaparṇāni śayyā prāvaraṇādikam

59.10

dattvā tadarthine bhūmau śivaloke mahīyate /
śivamuddiśya naivedyaṃ yo dadyāc chivadarśine

59.11

śākaṃ mūlaṃ phalaṃ vāpi tasya puṇyaphalaṃ śṛṇu /
yāvat syāt taṇḍulādīnāṃ saṃkhyāphaladaleṣu ca

59.12

tāvad varṣasahasrāṇi śivaloke mahīyate /
bhikṣāṃ savyañjanāṃ dattvā śivabhaktāya bhaktitaḥ

59.13

varṣalakṣaṃ mahābhāga śivaloke mahīyate /
dadhibhaktaṃ susampūrṇaṃ bhikṣāpātraṃ suśobhanam

59.14

dadyād yaḥ śivabhaktāya tasya puṇyaphalaṃ śṛṇu /
varṣakoṭisamaṃ divyaṃ mahābhogaiḥ samanvitam

59.15

sthitvā śivapure divye tasyānte ca mahīpatiḥ /
suśītalena toyena śivabhaktaṃ sitāyujā

59.16

tarpayitvā śambhuloke varṣalakṣaṃ ca modate /
kalaśaṃ śarkaropetaṃ vastrapūtāmbupūritam

59.17

dadyād yaḥ śivabhaktāya tasya puṇyaphalaṃ śṛṇu /
śuddhasphaṭikasaṃkāśaṃ vimānaṃ sarvakāmikam

59.18

saṃprāpya śivaloke tu varṣakoṭiṃ sa modate /
palāśaparṇaiḥ patrair vā yaḥ kuryāt puṭakāni tu

59.19

pradadyācchivayogibhyas tāmrapātraprado hi saḥ /
yas tāmrapātraṃ sukṛtaṃ pradadyāc chivayogine

59.20

koṭiṣaṭ kaṃ sa kalpānāṃ śivaloke mahīyate /
śūlaṃ vahati yaḥ pāṇau śaktiṃ pṛṣṭhe kamaṇḍalum

59.21

taṃ bhojayitvā yatnena śivalokam avāpnuyāt /
bhojayec ca yathā śaktyā yaḥ śivavratacāriṇam

59.22

bhogaiḥ sa krīḍati śreṣṭhaiḥ śivaloke vyavasthitaḥ /
yaḥ śivāśramadharmaṃ ca gṛhasthaṃ bhojayed budhaḥ

59.23

vipulaiḥ sa mahābhogaiḥ śivaloke mahīyate /
śivāśramavratasthaṃ yaḥ kandādyair bhojayet naraḥ

59.24

sa divyānāpnuyād bhogān īśvarasya pure sthitaḥ /
evaṃ pāśupataṃ bhaktaṃ bhojayitvā praṇamya ca

59.25

nānāvidhair mahābhogaiḥ śivaloke mahīyate /
mahāvratadharāyaiva bhikṣāṃ yaḥ pratipādayet

59.26

sa divyaiḥ śobhanair bhogaiḥ śivaloke mahīyate /
sayamaniyam ācāraṃ śivabhaktiparaṃ naram

59.27

bhojayitvā yathāśaktyā śivaloke mahīyate /
jñānayogabahiḥsthā ye lokasāmānyadharmiṇaḥ

59.28

pūjayanti śivaṃ bhaktyā śivalokaṃ vrajanti te /
anāśikenāpi karīṣavahṇinā payaḥ pradānena tapobhir ugraiḥ

59.29

prayānti yajñaiś ca na tāṃ gatiṃ narā /
nīco 'pi yāṃ yāti hi rudrabhaktaḥ

59.30

yathā revājalasparśāl labhante sadgatiṃ narāḥ /
na tathā yajñadānādyair upāyair bharatarṣabha

59.31

ity eṣa śivalokas tu prasaṅgāt samudāhṛtaḥ /
golokaḥ kalpagālokaḥ śivabhaktaiḥ samanvitaḥ

59.32

jñānayogena ye śāntā japanti paramaṃ śivam /
te sarvaduḥkhanirmuktā bhavanti sukhinaḥ sadā

59.33

śivalokaś ca vijñeyo maṇḍalāvaraṇātmakaḥ /
pañcabhūtānyahaṃkāraḥ sattvaṃ prakṛtiraṣṭamī

59.34

īdṛśānāṃ tu nāgānāṃ koṭyo jñeyāḥ sahasraśaḥ /
sarvāṅgatvāt pradhānasya tiryagūrdhvamadhaḥ sthitam

59.35

viṣṇulokāt paraṃ sthānaṃ kumārasya mahātmanaḥ /
svacchamauktikasaṃkāśaṃ paramā śrīsamanvitam

59.36

skandalokāt paraṃ sthānam umādevyāḥ prakīrtitam /
taptacāmīkaraprakhyam aśeṣaguṇasaṃyutam

59.37

umāsthānāt paraṃ caiva harasthānaṃ taduttamam /
sūryakoṭipratīkāśaṃ sarvakām asamanvitam

59.38

gaṇair adhyuṣitaṃ sarvair asaṃkhyair yogatatparaiḥ /
hiraṇyagarbhakūrmādyair vasurudradivākaraiḥ

59.39

stūyate bhagavān nityaṃ tasyānti pratikāṅkṣibhiḥ /
jñānadhyānaparaiḥ śāntair bhikṣāhārair jitendriyaiḥ

59.40

prāpyaṃ taiś ca paraṃ sthānaṃ sūryāyutasamaprabham /
tatsatkarmakarair nityaṃ brāhmaṇair dagdhakalmaṣaiḥ

59.41

vasanti yadṛtaṃ siddhāśayās tu kleśavarjitāḥ /
narmadā sevyamānāś ca labhante tatpadaṃ narāḥ

59.42

etat te kathitaṃ pārtha yathoddiṣṭaṃ tu śambhunā /
yan mayā kathitaṃ dānaṃ narmadātīram āśritam

59.43

gacchanti ye 'nyat tīrthaṃ tu sahasrāṃśo viśiṣyate /
sarvajñāḥ sarvagāḥ śuddhāḥ paripūrṇā bhavanti te

59.44

śuddhakarmakarā ye tu paramaiśvaryasaṃyutāḥ /
sadehāś ca videhāś ca bhavanti svecchayā punaḥ

59.45

iti nityaṃ viśuddhaṃ ca sthānam ādyam umāpateḥ /
divyaṃ śrīkaṇṭhanāthasya jagadbhartuḥ samaṃsthitam

59.46

sthānaṃ navakamity evaṃ nirgatā yatra kalpagā /
paramāṣṭaguṇaiśvaryanityam akṣayam avyayam

59.47

śaśvadgurupraṇītena dhyānayogena ye narāḥ /
dhyāyanti devatāṃ nityaṃ te siddhā yānti tatpadam

59.48

ye 'bhyasanti śivajñānaṃ narmadātīram āśritāḥ /
kāmatṛṣṇāvinirmuktās te 'pi yānti ca tatpuram

59.49

apy ekadivasaṃ yāvac chivadhyānaparāyaṇaḥ /
śivadharmaparas tasya dharmasyānto na vidyate

59.50

yogadharmasu sāratvādabhedyaṃ pāpamudgaraiḥ /
vajrataṇḍulavaj jñeyaṃ tasmāt tasya phalaṃ mahat

59.51

dehāntenaiva dharmeṇa sthānamādyaṃ śivālayam /
yatrāste vipulair bhogaiḥ krīḍan kalpāyutaṃ naraḥ

59.52

tataḥ kalpāyutasyānte sthānaṃ kaumāram āpnuyāt /
tatrārdhasammitaṃ kālaṃ sa krīḍan sasukhaṃ vaset

59.53

tadante viṣṇulokaṃ ca saṃprāpya vasate punaḥ /
brahmalokaṃ gataś cānte tatrāpi vasate naraḥ

59.54

brahmalokaparibhraṣṭo vasec chivapure sukham /
tat tasmād brahmaviṣṇvādyāṃl lokān prāpnoty anukramāt

59.55

ity evaṃ sarvalokeṣu ramitvā kramaśas tataḥ /
manuṣyalokam āsādya śivaṃ revāṃ samāśrayet

59.56

mayā te kathitā 'nyatra yāni dānāni bhārata /
tāni sarve praśaṃsanti parvate 'marakaṇṭake

Original text: Skandapurāṇa: Revākhaṇḍa (RKS) · Edition: Giri, Oṅkārānanda (ed.) - atha bṛhat śrīnarmadāpurāṇam revākhaṇḍam (parivardhita tṛtīya saṃskaraṇa). Jñānasatra Prakāśana Nyāsa, Hośaṅgābāda: 1994. · Data entry Jürgen Neuss · GRETIL (Göttingen) · CC BY-NC-SA 4.0