Skandapurāṇa: Revākhaṇḍa (revised text) · Chapter 56

iti śrīskandapurāṇe revākhaṇḍe godānamahimānuvarṇano nāma pañcapañcāśattamo 'dhyāyaḥ ||
RKS adhyāya 56
mārkaṇḍeya uvāca:
māhiṣmatyāḥ paścime vai tīrthaṃ pāpaharaṃ param /
aśokavanikā nāma sarvaśokavināśanam

snātvā tatrārcayed gaurīṃ yathā vibhavavistaraiḥ /
mātaṅgasyāśrama tadvat siddhagandharvasevitam

śuklakṛṣṇātṛtīyāyāṃ gandhadhūpavilepanaiḥ /
upahārair anekaiś ca dīpamālāprabodhanaiḥ

tatra yā pūjayen nārī gaurīṃ bhaktisamanvitā /
rūpasaubhāgyasampannaṃ labhate satpatiṃ tu sā

kārttikyāṃ tu gataprāṇā modamānā tu saṃyatā /
asya tīrthasya māhātmyāt prāptā māheśvaraṃ puram

mātaṅgo nāma devarṣiḥ purākalpe yudhiṣṭhira /
narmadātīramāśritya tapas tepe suduṣkaram

purā janmaniṣādaḥ sa jātiṃ smarati pūrvikām /
aghamarṣaṇadeśasthaḥ sarvadharma bubodha ca

maharṣīṇāṃ prasaṅgena narmadādarśanena ca /
pāpabuddhiṃ parityajya dharmabuddhiṃ cakāra saḥ

nirviṇṇo 'haṃ ca bhikṣuś cādhunā śvapacayoniṣu /
evam uktvā tato rājann aśokavanikāṃ gataḥ

jaṭāvalkaladhārī ca kandamūlaphalāśanaḥ /
divyaṃ varṣasahasraṃ tu śivārādhanatatparaḥ

śivadhyānaparaḥ so 'bhūd ugre tapasi saṃsthitaḥ /
divyaṃ varṣasahasraṃ hi tathā tasya tapasyataḥ

ekāśītisahasrāṇi jaṭāgrebhyo viniḥsmṛtāḥ /
svayaṃ patanti vividhā narmadātoyam adhyataḥ

tatkṣaṇād yakṣiṇīrūpā anantāś cāpramāṇikāḥ /
śyāmavarṇāḥ sutejaḥ kāḥ sarvābharaṇabhūṣitāḥ

yakṣalokaṃ vrajanty āśu tīrthasyāsya prabhāvataḥ /
mantrayantravihīno 'pi śivabhaktiparāyaṇaḥ

ṣaḍakṣaram imaṃ mantraṃ hṛdi cakre divāniśam /
oṃnamaḥ śivāya iti sarvamantrottamottamam

tasya bhaktiṃ parāṃ jñātvā devadeva umāpatiḥ /
pratyakṣarūpo bhagavān chūlapāṇiḥ samāgataḥ

uvāca vacanaṃ devo mātaṅgaṃ prati bhārata /
varaṃ vṛṇīṣva bhadraṃ te dhyānenānena suvrata

mātaṅga uvāca:
yadi tuṣṭo 'si deveśa varaṃ dātum ihecchasi /
mātaṅganāmnā vikhyātiṃ tīrtham etat prayātu vai

cāṇḍālāḥ śvapacāś caiva pāpayonigatā 'pi /
japādi rahitāś cāpi mucyante 'trāpi kilbiṣāt

mātaṅganāmaliṅgaṃ tu narmadātīram āśritam /
snātvā yo 'trārcayet tasya bhaved bandhavimokṣaṇam

idaṃ varam ahaṃ manye tvatprasādāt maheśvara /
tasya tad vacanaṃ śrutvā praty uvāca śivāpatiḥ

evam bhavatu tatsarvaṃ matprasādān na saṃśaya /
evam uktvā yayau deva kailāsaṃ parvatottamam

varaṃ samprāpya mātaṅga umāmāheśvaraṃ puram /
kāmikaṃ yānam ārūḍhaḥ sarvābharaṇabhūṣita

jagāmāśu ciraṃ bhoktuṃ bhogān snānaprabhāvataḥ /
yā caitramāse 'māvāsyā kṛṣṇapakṣe caturdaśī

tasyāṃ tatra hutaṃ dattam anantaphalam aśnute /
tilodakapradānena pāpayonigatā 'pi

saktvāḍhyaguḍapiṇḍena pitṝn modayate tu yaḥ /
pitarastasya tṛpyanti yāvadindrāś caturdaśa

tilataṇḍulamiśraṃ yaḥ kuryāl liṅgasya pūjanam /
so 'pi varṣasahasrāṇi śivaloke mahīyate

aśokavanikā nāma mātaṅgaṃ tīrtham ucyate /
revāyā uttare kūle kathitaṃ tava bhārata

athānyat kathayiṣyāmi yāmyabhāge vyavasthitam /
tīrthaṃ mṛgavanaṃ nāma sarvapāpapraṇāśanam

tatra snātvā 'rcayed viṣṇuṃ śaṅkhacakragadādharam /
ekādaśyāṃ mahārāja nirāhāro niśāṃ nayet

hariṃ mṛgavane tatra gandhapuṣpaiś ca pūjayet /
ekasmin bhojite vipre lakṣaṃ bhavatu bhojitam

tilodakapradānena pitṝṇāṃ vaiṣṇavaṃ padam /
tatraiva sanniviṣṭaṃ tu vārāhaṃ tīrthamuttamam

yatra vārāharūpeṇa dharā caiva samuddhṛtā /
viśvarūpaṃ tathā cānyaddhariṇāmitatejasā

pativratā ca nārī vai tathā māsopavāsinī /
tatra snātvā vidhānena lokaṃ prāpnoti vaiṣṇavam