Skandapurāṇa: Revākhaṇḍa (revised text) · Chapter 48

iti śrīskandapurāṇe revākhaṇḍe oṃkāramahimānuvarṇano nāma saptacatvāriṃśo 'dhyāyaḥ ||
RKS adhyāya 48
mārkaṇḍeya uvāca:
brahmaṇe kathito mantra oṃkāreṇa tato 'nagha /
brahmāpi tadvacaḥ śrutvā stotrametad udāharat

oṃ vyomasaṃkhyāyite vyomaharāya sarvavyāpine /
anantāya anāthāya amṛtāya dhruvāya ca

śambhavāya śāśvatāya yogapīṭhasaṃsthitāya /
nityaṃ yogayogine vyomaharāya

oṃ namaḥ śivāya sarvaprabhavāya śivāya īśānāya

mūrdhāya tatpuruṣāya vaktrāya aghorāya hṛdayāya vāsudevāya guhyāya sadyojātāya mūrtaye oṃkārāya namo namaḥ

kalātīto 'vyayo buddho vajradehopamardanaḥ // RKS_48.6
adhyakṣaś ca vidhuḥ śāstā pinākī tridaśādhipaḥ /
agnī rudro hutāśaś ca piṅgalaḥ pāvano hara

jvalano dahano vastur bhasmāntaś ca kṣamāntakaḥ /
apamṛtyuharo dhātā vidhātā kartṛsaṃjñakaḥ

kālo dharmapatiḥ śāstā viyoktā navamaḥ priyaḥ /
nirmitto vāruṇo hantā krūradṛṣṭir bhayāvahaḥ

ūrdhvadṛṣṭir virūpākṣo daṃṣṭrāvān dhūmralocanaḥ /
vālo hyatibalaścaiva pāśahasto mahābalaḥ

śveto virūpo rudraś ca dīrghabāhurjaḍāntakaḥ /
śīghro laghurvāyuvego bhīmaś ca vaḍavāmukhaḥ

pañcaśīrṣā kapardī ca sūkṣmastīkṣṇaḥ kṣapāntakaḥ /
nidhīśo raudravān dhanvī saumyadehaḥ pramardanaḥ

anantapālako dhāraḥ pātāleśo vṛṣadhvajaḥ /
sadhūmraḥ śāśvataḥ śarvaḥ sarvapiṅgaḥ karālavān

viṣṇur īśo mahātmā ca sukho mṛtyuvivārjitaḥ /
śambhur vibhur gaṇādhyakṣas tryakṣaścaiva divaspatiḥ

saṃvādaś ca vivādaś ca prabhaviṣṇur vivardhanaḥ /
śatamekottaraṃ yāvad rudrāṇāṃ saṃkhyayā smṛtam

śatamekottaraṃ sarvam oṃkāre ca pratiṣṭhitam /
stotraṃ kṛtvā tathā brahmā devadevaṃ maheśvaram

bhūmau praṇamya sāṣṭāṅgaṃ kṛtvā caiva pradakṣiṇam /
manasā saṃsmaran devaṃ tasthau lokapitāmahaḥ

stotraṃ śrutvā bhagavato brahmaṇo lomaharṣaṇam /
devadevo 'bravīd vākyaṃ brahmāṇaṃ prati bhārata

stotreṇānena divyena tuṣṭo 'haṃ te varaṃ vṛṇu /
dadāmi te na sandeho duṣprāpyaṃ tridaśair api

brahmovāca:
yadi tuṣṭo 'si deveśa yadi deyo varo mama /
pañcavaktreṣu yajanaṃ brahma nāma bhavatv iha

hara uvāca:
evam bhavatu vai brahman satyam etat tavoditam /
brahmaṇo dharmapūjā vai tadā prabhṛti bhārata

brahmovāca:
paṭhiṣyanti stavaṃ raudram oṃkārasya tavāgrataḥ /
brāhmaṇāḥ kṣatriyā vaiśyāḥ sadā tadgatamānasāḥ

sarvakāmam avāpsyanti ceha loke paratra ca /
yaṃ yaṃ kāmayate kāmaṃ taṃ taṃ prāpnoti mānavaḥ

śatamekottaraṃ nityaṃ paṭhitvā ca divaṃ vrajet /
evam uktvā tadā brahmā namaskṛtya maheśvaram

divyayānasamārūḍho brahmalokaṃ mudā yayau /
caturyugasahasreṇa brahmaṇo 'haḥ prakīrtitam

anenaiva tu mānena śataṃ brahmā hi jīvati /
pitāmahaśataṃ yāvad viṣṇor mānaṃ vidhīyate

oṃkāranimiṣārdhena sahasrāṇi caturdaśa /
vinaśyanti paraṃ viṣṇorasaṃkhyātāḥ pitāmahāḥ

evaṃ brahmagatiṃ jñātvā śivam antaḥ sadārcayet /
śivājñā vartate liṅge tasmāl liṅgaṃ sadārcayet

dveṣṭi liṅgaṃ tu yo mohāt sarvadevanamaskṛtam /
sa yāti narakaṃ ghoraṃ śivasya vacanaṃ yathā

bauddhakṣapaṇapākhaṇḍā mithyātattvavicakṣaṇāḥ /
naṣṭās tu nāśitā ye vai śivārādhanavārjitāḥ

janmajanmāntarābhyāsāt te prayānti rasātalam /
purāṇeṣu tathā yuddhvā śivoktaṃ dharmam ācaret

saduṣṭaḥ pāpabuddhis tu yo 'nyaṃ dharmaṃ samācaret /
etat te kathitaṃ rājan purāṇaṃ skandakīrtitam

śravaṇāt kīrtanād asya śivaloke mahīyate