Scripture Library

Skandapurāṇa: Revākhaṇḍa (revised text) · Chapter 45

iti śrīskandapurāṇe revākhaṇḍe durvāsaścaritre eraṇḍītīrthavarṇano nāma catuścatvāriṃśo 'dhyāyaḥ
RKS adhyāya 45
mārkaṇḍeya uvāca:
tato gacchet mahābhāga revāśalyāviśalyayoḥ /
tatra snātvā divaṃ yāti phalaṃ yajñeśvarājñayā

45.2

tatra yajñeśvarāṃ liṅgaṃ dhūpeśvaramanuttamam /
siddhidaṃ mokṣadaṃ viddhi na te paśyanti mānavāḥ

45.3

tilodakapradānena cānnadānena bhārata /
pitarastṛptim āyānti yāvac candrārkatārakam

45.4

paurṇamāsyāṃ tu some vai vyatīpāte ca saṃkrame /
dānaṃ yat kriyate tatra tasya puṇyaphalaṃ śṛṇu

45.5

bharatena kṛtas tatra hayamedhaḥ purā yathā /
tat te 'haṃ kathayiṣyāmi śṛṇu kaunteya sāmpratam

45.6

bharato nāma rājāsīt sūryavaṃśe viśāmpate /
praśaśāsa mahārāja kṛtsnaṃ vai sa mahītalam

45.7

yāvat tṛṇaṃ vijānīyā yāvatkīrtiś ca bhāskaraḥ /
tāvad vai bharatakṣetraṃ saśailavanakānanam

45.8

ekadā sa nṛpaśreṣṭho yajñakarmaparāyaṇaḥ /
bhṛgor dakṣiṇabhāge tu kuṇḍamaṇḍapamaṇḍitām

45.9

daśayojanavistīrṇāṃ yajñabhūmiṃ cakāra ha /
gavāṃ hi daśalakṣāṇi savatsānāṃ payomucām

45.10

lakṣam ekaṃ hayānāṃ ca dantinām ayutaṃ tathā /
maṇimāṇikyaratnāni vāsāṃsi vividhāni ca

45.11

yajñopaskaram ādāya sarvasaṃbhārasaṃvṛtaḥ /
vedadhvanininādena divaṃ bhūmiṃ ca saṃspṛśan

45.12

homena devatās tṛptāḥ saptalokanivāsinaḥ /
evaṃ pravartite yajñe rājñaś cāmitatejasaḥ

45.13

yajñavidhvaṃsanārthaṃ tu rākṣasā raudrarūpiṇaḥ /
mālyavāṃś ca sumālī ca sukeśī śaṅkhadūṣaṇau

45.14

rākṣasānā sahasrāṇi samāyātāstu satvaram /
bhagnāni yajñavastūni triṣu lokeṣu dāruṇaiḥ

45.15

praṇaṣṭā devatāḥ sarvā ṛtvijaś ca nipātitāḥ /
evaṃ vināśite yajñe rakṣobhiś ca tato 'nagha

45.16

kopāj jajvāla rājāpi hutāśana ivāhutaḥ /
jaghāna rākṣasān sarvān girīn vajradharo yathā

45.17

praṇaṣṭān bhayamītāṃś ca patitān dharaṇītale /
rākṣasair nihatān dṛṣṭvā brāhmaṇān ṛtvijas tathā

45.18

śokāviṣṭas tataḥ prāha bharato devamantriṇam /
gurus tvaṃ sarvadevānāṃ trikālajñas trivedavit

45.19

brahmahatyādikaṃ pāpaṃ mamārthe devakaṇṭakaiḥ /
prāyaścittaṃ mayā kāryaṃ kiṃ tvaṃ brūhi bṛhaspate

45.20

bṛhaspatir uvāca:
vidyāṃ saṃjīvanīṃ te 'haṃ dadāmi nṛpasattama /
jīvitā brāhmaṇā devāḥ śaśaṃsur devamantriṇam

45.21

tato nivartito yajñaḥ samagravaradakṣiṇaḥ /
yūpamūlasamudbhūtā śalyā caiva viśalyakā

45.22

praviveśa mahārāja narmadāṃ lokapāvanīm /
tato devāḥ samāruhya svaṃ svaṃ yānaṃ divaṃ yayuḥ

45.23

bharato 'pi dvijaiḥ sārddhaṃ praviveśa purīṃ tataḥ /
tena śalyā viśalyā ca vikhyātā bhuvanatraye

45.24

bharateśvaraliṅgaṃ ca brahmayonyāṃ samāsthitam /
etat te kathitaṃ rājanyathādṛṣṭaṃ yathāśrutam

45.25

śravaṇāt kīrtanād asya na viśed yonisaṅkaṭe

Original text: Skandapurāṇa: Revākhaṇḍa (RKS) · Edition: Giri, Oṅkārānanda (ed.) - atha bṛhat śrīnarmadāpurāṇam revākhaṇḍam (parivardhita tṛtīya saṃskaraṇa). Jñānasatra Prakāśana Nyāsa, Hośaṅgābāda: 1994. · Data entry Jürgen Neuss · GRETIL (Göttingen) · CC BY-NC-SA 4.0