Skandapurāṇa: Revākhaṇḍa (revised text) · Chapter 40

iti śrīskandapurāṇe revākhaṇḍe vimaleśvaravarṇano nāmaikonacatvāriṃśo 'dhyāyaḥ ||
RKS adhyāya 40
yudhiṣṭhira uvāca:
manasā cintitaṃ yacca tad eva samupasthitam /
lakṣaṇaṃ sūtrayāgasya parvatasya tu veṣṭanam

kasmin kāle prakartavyaṃ vidhānāṃ vidhipūrvakam /
tvam eva vetsi sarvaṃ vai viditaṃ kuru sāmpratam

yena devāḥ sagandharvā mānuṣāḥ pāpayonayaḥ /
tatra yāgaprabhāveṇa divi devatvam āgatāḥ

mārkaṇḍeya uvāca:
śrūyatāṃ rājaśārdūla sūtrayāgasya lakṣaṇam /
candrasūryoparāge tu ṣaḍaśītimukhe tathā

yugādau viṣuve caiva vyatīpāte ca saṃkrame /
kārttikyāṃ ca tathā māghyāṃ vaiśākhyāṃ caiva bhārata

sūryoparāgatulyāyāṃ ṣaṣṭhyāṃ hi kapilasya tu

vaiśākhamāsasya tu yā tṛtīyā navamyathorjasya ca śuklapakṣe /
māghe tvamā caiva nabhasyakṛṣṇā trayodaśī ceti yugādayas tathā

parvasveteṣu kaunteya sūtrayāgaṃ tu kārayet /
anantaphalasaṃyuktaṃ śivena kathitaṃ purā

sūtreṇa veṣṭayed yas tu parvataṃ śivasannibham /
umayā sahitaṃ devaṃ gaṇeśena tathaiva ca

tāvad yugasahasrāṇi svargaloke mahīyate /
putriṇī bhartṛsaṃyuktā nārī tadveṣṭinī bhavet

kauśeyaṃ paṭṭasūtraṃ ca kārpāsaṃ ca mahīpate /
navatantuṃ ca yaḥ kuryād daśa dvādaśatantukam

aṣṭādaśa mahārāja caturviṃśati vā kramāt /
kṣālayet koṭitīrthe tu gandhadhūpena vāsayet

badhnīyāt puṣpamālāṃ ca dīpamālāṃ ca bodhayet /
rātrau jāgaraṇaṃ kṛtvā oṃkāre vidhipūrvakam

śivadhyānaparo bhūtvā nirāhāro niśāṃ nayet /
prabhāte cotsavaṃ kuryād oṃkārābhyarcanaṃ tathā

nyagrodhe bandhayet sūtraṃ samādhistho nareśvara /
koṭitīrthaṃ tato gacchet sarvatīrthamayaṃ śubham

ṛṇamokṣaṃ pāpanāśaṃ narakeśvaram uttamam /
gandharveśvaraliṅgaṃ tu gacchet paramaśobhanam

adṛśyaṃ sarvabhūtānāṃ nāgakanyābhirarcyate /
tatra snātvā naro rājan gāndharvaṃ lokamāpnuyāt

tato gacchen nṛpaśreṣṭha aṅgāreśvaram uttamam /
darśanāt tasya liṅgasya gāṇapatyam avāpyate

aṅgāreṇa tapastaptaṃ divyaṃ varṣaśataṃ tathā /
grahatvamagamat so 'pi tīrthasya 'sya prabhāvataḥ

brahmāvartaṃ tato gacchet sarvatīrtham ayaṃ śubham /
tatra snātvā naro rājan chivalokam avāpnuyāt

tilodakapradānena pitṝṇāṃ paramā gatiḥ /
divyaṃ varṣasahasraṃ tu tapas tepe suduṣkaram

brahmā caiva purākalpe lokānugrahakārakaḥ /
liṅgaṃ madhyeśvaraṃ nāma jalamadhye vyavasthitam

pūjyate nāgakanyābhir na tat paśyanti mānavāḥ /
dārukeśvaraliṅgaṃ tu sarvapāpapraṇāśanam

arcanāt tasya devasya naro vidyādharo bhavet /
bhṛguliṅgaṃ tato gacched bhairavo yatra saṃsthitaḥ

bhṛguṃ gatvā naraśreṣṭha mucyate brahmahatyayā /
jāleśvaraṃ tato gacchet parvatīrthottamottamam

snānamātro naras tatra sa bhave na punar bhavet /
tilodakapradānena pitṝṇām akṣayā gatiḥ

bhairavaṃ rūpamāsthāya bāṇasya ca puratrayam /
pātitaṃ jalamadhye tu narmadāyā hareṇa vai

jvalatpāśupatāstreṇa tatraiva tad anantaram /
tad astrasaṅgamāc chīghraṃ pātālāc cotthitaṃ tataḥ

liṅgaṃ jāleśvaraṃ nāma brahmahatyāṃ vyapohati /
koṭitīrthaṃ tato gacchet snātvā ca vidhipūrvakam

valakṣaṃ bandhayet sūtram oṃkārasya tu bhārata /
oṃkāraṃ ca samabhyarcya dīpamālāṃ ca bodhayet

saphalaḥ sūtrayāgas tu tvatprasādān maheśvara /
yatīṃś ca bhojayet tatra dadyāc chaktyā ca dakṣiṇām

sārddhaṃ ca bandhubhṛtyaiś ca pāraṇaṃ kriyate nṛpa /
yaḥ śārīreṇa kaṣṭena paryaṭec chivaparvatam

pade pade yajñaphala tasya syāc chaṅkaro 'bravīt /
purā devagaṇaiḥ sarvaiḥ siddhagandharvakinnaraiḥ

vidyādharais tathā yakṣair asurair daityadānavaiḥ /
candrādityagrahaiś caiva nakṣatradhruvamaṇḍalaiḥ

viśvedevaiś ca sādhyaiś ca marudbhir vasubhis tathā /
devarājena cendrāṇyā sāvitryā caiva bhārata

arundhatyā sarasvatyā gāyatryā sa ca parvataḥ /
sūtreṇa veṣṭito bhaktyā phalaṃ prāptaṃ śivoditam

ahalyā menakā rambhā ghṛtācī corvaśī tathā /
tilottamā tathā cānyā saritaḥ sāgarāś ca vai

veṣṭanāt parvatasyāsya digdevatvamavāptavān /
yāvac candraś ca sūryaś ca yāvat tiṣṭhati medinī

sūtrayāgaprabhāveṇa tāvac chivapure vaset /
etat te kathitaṃ rājan sūtrayāgasya yatphalam

śravaṇāt kīrtanād asya rudrasyānucaro bhavet