Skandapurāṇa: Revākhaṇḍa (revised text) · Chapter 33

iti śrīskandapurāṇe revākhaṇḍe brāhmaṇasya bhāryayā saha svargārohaṇaṃ nāma dvātriṃśo 'dhyāyaḥ ||
RKS adhyāya 33
mārkaṇḍeya uvāca:
paścime nīlagaṅgāyā narmadottarakūlataḥ /
vyatīpāteśvaraṃ nāma liṅgaṃ paramasiddhidam

somanāthaṃ svayaṃ viddhi somamūrtiṃ jagatpatim /
sāvitryā ca tapas taptaṃ tatra saptarṣibhis tathā

sāvitrīkuṇḍam ityetad vikhyātaṃ narmadātaṭaḥ /
narasya snānamātrasya kanyādānaphalaṃ bhavet

tilodakapradānena cānnadānena bhārata /
pitaras tasya tṛpyanti sāvitrīlokam āśritāḥ

dakṣasya duhitā cāsīt kumudā nāma viśrutā /
somāya dattvā tāṃ dakṣo mudā paramayā yutaḥ

tasyā sa janayāmāsa himāṃśuḥ putram adbhutam /
jñātvā 'mṛtamayaṃ taṃ tu surā yajñaphalārthinaḥ

himāṃśuṃ somaputraṃ ca te yayuś ca mudānvitāḥ /
anyā somasya paramā kalā yā ṣoḍaśī smṛtā

adhyāste sā candramasaṃ pitṛṇāṃ tāraṇāya ca /
vanaspatau gate some gavāṃ kṣīre haviḥṣu ca

somapāne mahāyajñe darśe diviṣadāṃ tadā /
pītaṃ śrutvā 'surāḥ sarve himāṃśuṃ pātum udyatāḥ

asurāṇāṃ bhayād vindhyaṃ himāṃśur girimāśrayat /
śrutvā te giridurgastham asurāḥ svabhayāt tadā

graste te rāhuṇā sūrye himāṃśuṃ prati bhārata /
kāyātikāyapramukhāḥ samprāptā dānavās tataḥ

rāhos tu bhrātaraḥ sarve saiṃhikeyā mahābalāḥ /
samāhṛtya himāṃśus taiḥ sudhārthe cirajīvibhiḥ

bhūtale pātitaḥ pāpaiḥ krandanti sma surās tadā /
uvāca sa patan bhūmau himāṃśuḥ somanandana

pātu māṃ deva īśāno dānavānāṃ bhayaṃkaraḥ /
etasminn antare bhūpa himāṃśo rakṣaṇāya vai

pātālād utthitaṃ liṅgaṃ jvalatkālānalaprabham /
tena bāṇena raudreṇa huṅkāreṇa mahāsurāḥ

bhasmīkṛtās tu tatraiva devadevena śūlinā /
tatas tam abravīd devo bhayamāsurajaṃ tyaja

śivabhaktiparo bhūtvā nirbhayas tiṣṭha putraka /
atha somaḥ suraiḥ sārddhaṃ gatvā brahmaniketanam

vṛttāntaṃ kathayāmāsa tatas tad vacanāt tu tāḥ /
brahmādyā devatāḥ sarvā jagmuḥ somapurogamāḥ

oṃkāraḥ kalpagātīre yatra tiṣṭhati bhārata /
dṛṣṭvā tu tryambakaṃ devaṃ ṣaṣṭisaṃhārakārakam

uvāca vacanaṃ devo brahmā lokapitāmahaḥ /
śrīmān amṛtarūpo 'yaṃ himāṃśuḥ somanandanaḥ

rakṣaṇīyas tvayā nātha devadānavaśaṅkayā /
saptaviṃśatiyogānāṃ gatiḥ proktā tu candramāḥ

tvaṃ gatiḥ sarvalokānāṃ tasmāt tvaṃ trātum arhasi /
teṣāṃ tad vacanaṃ śrutvā śiva ūce yathocitam

pūjayitvā tu deveśaṃ somanāthaṃ jagatpatim /
pātāleśvaranāmānaṃ gatāḥ sarve triviṣṭapam

tadā prabhṛti tatsthānaṃ triṣu lokeṣu viśrutam /
sāvitrīkuṇḍatoyena snānaṃ kṛtvā tamarcayet

na tasya punar āvṛttiḥ satyam etacchivoditam /
prabhāse yatphalaṃ rājan dṛṣṭaṃ ca śaśibhūṣaṇe

tatphalaṃ nṛpaśārdūla bhaved eva na saṃśayaḥ /
kālātikramaṇaṃ kuryāt tatra yo bhaikṣamāśritaḥ

na tasya punar āvṛttiḥ satyam etad bravīmyaham /
tilodakapradānena piṇḍapātena bhārata

patitānuddharej jatūn narakān nātra saṃśayaḥ /
śravaṇāt kīrtanād asya somaloke mahīyate