Skandapurāṇa: Revākhaṇḍa (revised text) · Chapter 31

iti śrīskandapurāṇe revākhaṇḍe revācarusaṅgamavarṇano nāma triṃśo 'dhyāyaḥ ||
RKS adhyāya 31
yudhiṣṭhira uvāca:
hiraṇyabāhuḥ śāpānte nagarīṃ prāpya nirvṛtaḥ /
dakṣādayaḥ kathaṃ muktās tasmāc chāpāc ca kathyatām

mārkaṇḍeya uvāca:
śṛṇu rājan mahābāho kathyamānaṃ nibodha me /
hiraṇyabāhunā śaptā yāvan muktā dvijottamāḥ

babhramuḥ sarvatīrthāni āsamudrānta gocare /
teṣāṃ brahmādayaḥ śāpaṃ na nivartayituṃ kṣamāḥ

vārāṇasīṃ mahāpuṇyāṃ gaṅgāsāgarasaṅgamam /
himavantaṃ ca kedāramaurvatīrthaṃ ca bhārata

gaṅgā ca naimiṣāraṇyaṃ bhairavaṃ puṣkaraṃ tathā /
māyāpurīṃ tathā ramyām ugraṃ kanakhalaṃ tathā

raudraṃ caiva tatheśānaṃ surāsuranamaskṛtam /
gaṅgādvāraṃ himasthānaṃ prabhāsaṃ śaśibhūṣaṇam

rudrakoṭisamāyogaṃ gaṅgābhedaṃ sarasvatīm /
sthāneśvaraṃ tathā puṇyaṃ kurukṣetraṃ tathaiva ca

kurukṣetraṃ gamiṣyāmi kurukṣetre vasāmyaham /
kurukṣetrasya nāmnāpi naraḥ pāpaiḥ pramucyate

bhrameṇaivaṃ viṣaṇṇāste śāpasyānta na lebhire /
ninditāni ca tīrthāni pāpakarmaratais tataḥ

ākāśavacanaṃ śrutvā mahātīrthāni nindata /
haraṃ hariṃ ca yo dveṣṭi nābhinandati yaḥ surān

sa yāti yatra yatraiva duḥkhaṃ prāpnoty asaṃśayaḥ /
etasminn antare prāpto nārado devapūjitaḥ

dakṣaśaunakagargādīn sarvāṃstān munisattamān /
brahmarakṣastanūn dṛṣṭvā nārado vākyam abravīt

bhavantaḥ karmaṇā kena sañjātā brahmarākṣasāḥ /
tasyātha vacanaṃ śrutvā nāradasya mahāmuneḥ

so 'bhivādya namaskṛtya dakṣo vacanam abravīt /
yathotsavaṃ kṛtaṃ karma brahmalokahitāya yat

tadviparyāsamāpannaṃ gahanā karmaṇo gatiḥ /
karmopadiśa me kiṃcid yena muñcāpi duṣkṛtam

yatra yatra ca gacchāmo jalamannaṃ na vidyate /
anāvṛṣṭirabhūd ghorā tatra tatraiva nārada

nārada uvāca:
prasādyatāṃ muniśreṣṭhāḥ śāpasyāntaṃ kariṣyati /
hiraṇyabāhur dharmātmā hiraṇyapuramāsthitaḥ

yajñaṃ kartuṃ samāyāto revācarukasaṅgame /
pañcaliṅgāni cābhyarcya śāpāntaṃ ca kariṣyati

evamuktvā sa devarṣir brāhmaṇaiḥ śāpakarṣitaiḥ /
ājagāma tato divyāṃ hiraṇyanagarīṃ śubhām

hiraṇyabāhur nṛpatir vaśiṣṭhaś ca mahāmuniḥ /
vilokya tān munīn sarvān sa devarṣipurogamān

abhivādya yathā nyāyam arghapādyair apūjayat /
nāradas tu tato vākyaṃ rājānam idam abravīt

kuśalaṃ te nṛpaśreṣṭha sukhaṃ tiṣṭhasi suvrata /
nāradasya vacaḥ śrutvā sarvadharmaparāyaṇaḥ

uvāca vacanaṃ rājā nāradaṃ ślakṣṇayā girā /
adya me kuśalaṃ brahmaṃstavapādābjadarśanāt

kiṃ kartavyaṃ mayā te 'dya brahman me 'nugrahaṃ kuru /
nārada uvāca:
kuru brahmamunīnāṃ tvaṃ śāpāntaṃ rājadarśanāt

nipātaya mahāduṣṭān daityān duṣkṛtakāriṇaḥ /
bandhanasthā hi moktavyā brāhmaṇās tu viśeṣataḥ

rājovāca:
vedaṃ paṭhanti ye 'jñānād vadantyarthaṃ na tasya ca /
pramāṇaṃ bhūtalokasya tadvat karma ca kurvataḥ

brahman vedena vidhivat te tu svargaṃ prayānti vai /
ahaṃkaravimūḍhāś ca mithyadānena yājakāḥ

patanti narake viṣṇuśaṅkaradveṣaṇe ratāḥ /
agastyaṃ ca vaśiṣṭhaṃ ca kṛtvā tau yājakau mune

kratumiṣṭvā vidhānena revācarukasaṅgame /
mocayiṣyāmyahaṃ śāpāt pañcaliṅgārcanād dvija

vedamantrahutaṃ tatra svayaṃ viṣṇur grahīṣyati /
rudraḥ kālāgnirūpeṇa grāhakaś ca bhaviṣyati

evaṃ yajñe tu sampūrṇe tuṣṭe nārāyaṇe śive /
dvijānāṃ mokṣaṇaṃ tatra bhaviṣyati na saṃśayaḥ

na mune devatā yatra śaṅkhacakragadādharaḥ /
ihaloke pare caiva gatis tasya na vidyate

evam uktvā yayau rājā sarvasaṃbhārasaṃbhṛtaḥ /
yajñopaskaram ādāya brāhmaṇair vedapāragaiḥ

revācarukasaṃbhede yajñamiṣṭvā vidhānataḥ /
vihāya pāpaṃ śaptāṃs tān mocayāmāsa sa dvijān

pañcaliṅgasamāyoge tīrthasyāsya prabhāvataḥ /
brahmayānasamārūḍho vījyamāno 'psarogaṇaiḥ

dhriyamāṇātapatrastu stūyamānaś ca vandibhiḥ /
prāyācchivapuraṃ divyamumāmāheśvaraṃ nṛpa

etat te kathitaṃ rājan purāṇākhyānam uttamam /
śrutvākhyānām idaṃ puṇyaṃ pañcaliṅgasamāgamam

yamalokaṃ na paśyed vai pāpayoniṃ na gacchati /
hayamedhaphalaṃ prāpya śivaloke mahīyate

pāpagrasto vimūḍhātmā viṣṇumāyāvimohitaḥ /
kathaṃ prayāti tat tīrthaṃ kālagrahavaśīkṛtaḥ

śravaṇāt kīrtanād asya mucyate bhavabandhanāt