Skandapurāṇa: Revākhaṇḍa (revised text) · Chapter 27

iti śrīskandapurāṇe revākhaṇḍe gardabhītīrthavarṇano nāma ṣaḍviṃśo 'dhyāyaḥ ||
RKS adhyāya 27
mārkaṇḍeya uvāca:
gaurīkhaṇḍaṃ tato gacchet sarvadevanamaskṛtam /
tatra snānena labhate sarvatīrthaphalaṃ naraḥ

tilodakapradānena pitṝṇāṃ tṛptirakṣayā /
jāyate ca nṛpaśreṣṭha nātra kāryā vicāraṇā

gaurīkhaṇḍeśvaraṃ nāma liṅgaṃ pāpaharaṃ param /
tatrajñeyaṃ maṇimayaṃ jalamadhye vyavasthitam

na tat paśyanti manujāḥ sarvair devais tu pūjitam /
yudhiṣṭhira uvāca:
gaurīkhaṇḍeśvaraṃ nāma tasmiṃs tīrthe kathaṃ mune

kathyatāṃ ca yathā nyāyaṃ viditaṃ yat tu sāmpratam /
mārkaṇḍeya uvāca:
purādevagaṇaiḥ sarvaiḥ kumāraḥ śaṅkarātmaja

saināpatye niyuktaś ca tārakasya vadhaṃ prati /
kāmitās tena tatraiva sarvās tāḥ surayoṣitaḥ

upālabdhās tataḥ sarvā umāmāheśvare pure /
upālabdhaṃ tu taṃ śrutvā viṣaṇṇā caiva pārvatī

kāmitaṃ yatra yatraiva tatra tatreśvareśvarī

dṛṣṭvā 'tha lajjitaḥ so 'pi pakṣiṇā 'sau samāyayau /
devaiḥ parivṛtaḥ śrīmān mayūrastho mahābalaḥ

pṛṣṭhato 'nugatā mātā rudatīva sureśvarī /
uttīrṇā kalpagāṃ devī pūjayitvā maheśvaram

gaurīkhaṇḍaṃ tu vikhyātaṃ triṣu lokeṣu tena tat /
liṅgaṃ pratiṣṭhitaṃ tatra kumāreśvarasaṃjñitam

mayūreśvaraliṅgaṃ tu bhuktimuktiphalapradam /
yasya devasya māhātmyāt mayūrās tridivaṅgatāḥ

arcanāt tasya devasya tiryagyonirna jāyate /
tato gacchet mahārāja karamardāsamāgamam

tatra snāto mahārāja sa bhave na punar bhavet /
karamardeśvaraṃ liṅgaṃ pūjayet tatra bhārata

pitṝṇāṃ tarpaṇāt tatra svargaṃ prāpnoti mānavaḥ /
yudhiṣṭhira uvāca:
kathayasva mahābhāga karamardāsamudbhavam

bhāviṣyabhūtatattvajñas trikālajñas trivedavit /
mārkaṇḍeya uvāca:
kathayāmi yathādṛṣṭaṃ śṛṇu caikamanā nṛpa

maitreyasyāśramaṃ puṇyaṃ ṛṣibhis tu niṣevitam /
munīnāṃ tu sahasrāṇi kandāmūlaphalāśinām

nivasanti yadā tatra tapaḥ kartuṃ nirantaram /
kasmiṃścid anyakāle tu tasmin munivarāśrame

rājā kuśadhvajo nāma ekacchatrādhipo nṛpa /
āgamat kalātīraṃ rāhusūryasamāgame

avatīrṇān munīnsarvān yathārhaṃ praṇipatya ca /
pitṝṇāṃ śrāddhakālo 'dya prasādaḥ kriyatāṃ mayi

ṛṣaya ūcuḥ:
gavāṃ daśāyutānyekaprasūtānāṃ payomucām /
savatsānāṃ suvarṇānāṃ ghaṇṭābharaṇaśobhinām

yadi śaknoṣi dātuṃ tvaṃ homārthe pitṛdevayoḥ /
tatra pravartatāṃ śrāddhaṃ satyam etat tavoditam

teṣāṃ tadvacanaṃ śrutvā munīnāmūrdhvaretasām /
kuśadhvajo 'bravīd vākyaṃ brāhmaṇāṃs tān yathārthataḥ

anugrahamimaṃ manye yathoktaṃ brahmacāribhiḥ /
dadāmyahaṃ na sandeha ihaiva munipuṅgavāḥ

bhojayitvā tataḥ śrāddhe brāhmaṇāṃs tān nṛpottamaḥ /
sakuśaṃ jalam ādāya tebhyo dattā tu gās tadā

dattvā dāna mudāyuktaḥ sa jagāma svakaṃ puram /
sthitās tu brāhmaṇās tatra homakāryārthasiddhaye

ekasmin vāsare prāptā rākṣasā ghorarūpiṇaḥ /
bubhukṣitā mahādaṃṣṭrā vikṛtāsyā bhayānakāḥ

brāhmaṇānāṃ tadā gā vai bhakṣituṃ samupāgatān /
dṛṣṭvā tān vikṛtākārāṃs tīvranādaparāyaṇān

praṇaṣṭās tu tataḥ sthānān narmadājalam āviśan /
tatkṣaṇād divyalokasthāḥ sarvās tāḥ kāmadhenavaḥ

tatas te kṣudhitās sarve brāhmaṇān bhakṣituṃ gatāḥ /
hariṃ smaranti te sarve brāhmaṇāḥ śaṃsitavratāḥ

revājalaṃ praviṣṭā vai rākṣasaiḥ paripīḍitāḥ /
viṣṇoḥ prasvedajas tatra pravāho narmadāṃ gataḥ

gopadaṃ dṛśyate tatra sarvāmaranamaskṛtam /
karamardeśvaraṃ liṅgaṃ viṣṇucakrād viniḥsṛtam

pratiṣṭhitaṃ ca tatraiva viṣṇunā prabhaviṣṇunā /
gāvaś ca brāhmaṇāś caiva satyam etad bravīmi te

brahmalokaṃ gatāḥ sarve tīrthasyāsya prabhāvataḥ /
karamardeśvaraṃ tīrthaṃ sarvapāpapraṇāśanam /
kīrtitaṃ karmaṇā tena mahyām amitatejasā

tatra snātā divaṃ yānti ye mṛtā na punarbhavāḥ /
śravaṇāt kīrtanād asya gosahasraphalaṃ labhet