Skandapurāṇa: Revākhaṇḍa (revised text) · Chapter 16

iti śrīskandapurāṇe revākhaṇḍe kārtavīryākhyāne pañcadaśo 'dhyāyaḥ ||
RKS adhyāya 16
mārkaṇḍeya uvāca:
athānyaṃ saṃpravakṣyāmi saṅgamaṃ lokaviśrutam /
bṛhatyā narmadāyās tu surāsuraniṣevitam

nānādrumalatākīrṇaṃ vindhyaparvatasevitam /
campakair bakulair yuktamaśokaiḥ stabakair api

punnāgaiḥ kiṅkirātaiś ca sugandhair nāgakeśaraiḥ /
mallikotpalajātībhiḥ pāṭalaiḥ pārijātakaiḥ

āmrajambūkapitthaiś ca śrīphalaiḥ panasais tathā /
kharjūrair badarībhiś ca dāḍimair bījapūrakaiḥ

aruṣkaraiḥ kṣīravṛkṣair nāraṅgair upaśobhitaiḥ /
bharaṇāyātmavargasya saṃvidhāya vanecaraḥ

mukhagaṇḍūṣasalilaṃ śivāya sa samāharat /
ajñānabhaktigarbhas tu snāpayitvā phalaṃ dadau

vāsare vāsare caiva niṣādo dharmatatparaḥ /
saumyāyane ca cakṣur vai dattvā saumyaṃ tathātmanaḥ

evaṃ sampūjayāmāsa tryambakaṃ vidhipūrvakam /
etat te kathitaṃ rājan kalpagā netrasaṅgamam

yudhiṣṭhira uvāca:
bhagavan chrotum icchāmi mahākautūhalaṃ hi me /
saṃjāto muniśārdūla sa kathaṃ netrasaṅgamaḥ

mārkaṇḍeya uvāca:
ekasmin vāsare prāpte vyatīpāte ca saṃkrame /
sa puṣpabhāramādāya praviveśa śivālaye

tṛtīyam īkṣaṇaṃ tatra devasya ca na paśyati /
tadā tu cintayāmāsa vismayāviṣṭa cetanaḥ

kenāpahṛtam etasya netraṃ devasya pāpmanā /
ity uktvā ca svakaṃ netraṃ tīkṣṇabāṇena bhārata

lalāṭe devadevasya utkṛtya saṃnyaveśayat /
na kampo na ca kārpaṇyaṃ nā 'nyathā tasya mānasam

tatas tuṣṭaḥ sureśāno niṣādaṃ prati bhārata /
prahasan na bravīd devo varaṃ vṛṇu yathepsitam

śivaprasādasampannā buddhir anyā pracakrame /
mārkaṇḍeya uvāca:
śrutvā tu vacanaṃ śambhoḥ sāṣṭāṅgaṃ praṇipatya saḥ

yadi tuṣṭo 'si deveśa varaṃ dātuṃ mamecchasi /
niṣādāsta ime sarve mṛgapakṣigaṇaiḥ saha

saputradārapaśavo ye cānye pāpayonayaḥ /
tvat prasādān maheśāna śivalokaṃ prayāntu te

etad varam ahaṃ manye bhūtānāṃ hitakāmyayā /
etacchrutvā vacas tasya niṣādādhipateḥ śivaḥ

uvāca sarvakāmāptiṃ matprasādāt tvamāpsyasi /
evam uktvā śivo rājaṃs tatraivāntaradhīyata

divyayānasamārūḍho niṣādo 'nucaraiḥ saha /
dhṛtasvarṇātapatraṃ tu vījyamāno 'psarogaṇaiḥ

divyābharaṇaśobhāḍhyaḥ sarvālaṅkārabhūṣitaḥ /
divyavastraparīdhāno divyagandhānulepanaḥ

surāsuraiḥ stūyamāno veṇuvīṇāpuras saraḥ /
prāyācchivapuraṃ kṣipraṃ tīrthasyāsya prabhāvataḥ

etat te kathitaṃ rājan chivanetrahradāśritam /
anekaśatasaṃkhyātāḥ pāpayoniratā narāḥ

narmadāśivasaṃyoge saṃsiddhiṃ paramāṃ gatāḥ /
avaśa svavaśo vā 'pi yas tu prāṇān parityajet

vased varṣasahasrāṇi umāmāheśvare pure /
śravaṇāt kīrtanāc cāpi mucyate bhavabandhanāt

dhanyās te puruṣā rājan ye mriyante śivāyane /
na teṣāṃ garbhabhūtiś ca janma caiva yudhiṣṭhira

putradāraparigrastā mohajālasamāvṛtāḥ /
kalpagāṃ tu na paśyanti pāpopahatacetasaḥ