Skandapurāṇa: Revākhaṇḍa (revised text) · Chapter 115

iti śrīskandapurāṇe revākhaṇḍe saubhāgyatīrthamahimānuvarṇano nāma caturdaśādhikaśatatamo 'dhyāyaḥ ||
RKS adhyāya 115
mārkaṇḍeya uvāca:
tato gacchet tu rājendra bhāṇḍāraṃ tīrtham uttamam /
dāridryabhedakaraṇaṃ puruṣāṃś caikaviṃśatim

dhanadena tapastaptaṃ prasannaḥ padmasambhavaḥ /
tatraiva svasvadānena prāptaṃ vittamanantakam

tatra gatvā tu yo bhaktyā snātvā vittaṃ prayacchati /
tasya vittaparicchedo na bhavec ca kadācana

tasyaivānantaraṃ rājan rohiṇītīrtham uttamam /
vikhyātaṃ triṣu lokeṣu sarvapāpaharaṃ param

yudhiṣṭhira uvāca:
rohiṇītīrthamāhātmyaṃ sarvapāpapraṇāśanam /
śrotum icchāmi tat tvena tan me tvaṃ vaktum arhasi

mārkaṇḍeya uvāca:
tasminn ekārṇave ghore naṣṭe sthāvarajaṅgame /
tasyodare śayānasya devadevasya pāṇḍava

nābhyām abhūn mahatpadmaṃ ravimaṇḍalasannibham /
kīrṇakākesarayutaṃ patraiś ca samalaṃkṛtam

tatra brahmā samutpannaś caturvadanapaṅkajaḥ /
kiṃ karomīti deveśa cintyamānaḥ svadehataḥ

bhagavān abhavat tatra marīcir bharatādhipa /
marīceḥ kaśyapo jātaḥ sarvasṛṣṭikaras tataḥ

dakṣasyāpi tadā jātāḥ pañcāśat kanyakās tu vai /
dadau sa daśa dharmāya kaśyapāya trayodaśa

tathaiva ca parāḥ kanyāḥ saptaviṃśatim indave /
rohiṇī nāma yā tāsāṃ madhye tārādhipānanā

abhīṣṭā sarvanārīṇāṃ bhartuścāpi viśeṣataḥ /
punaḥ sā niścayībhūtā tapase bho narādhipa

tataḥ sā narmadātīre cacāra vipulaṃ tapaḥ /
ekarātraṃ dvirātraṃ ca ṣaḍdvādaśa tathāparaiḥ

pakṣamāsopavāsaiś ca karṣayantī kalevaram /
ārādhayantī satataṃ mahiṣāsuramārdinīm

snātvā snātvā jale nityaṃ narmadāyāḥ śuciḥ smitā /
tatas tuṣṭā mahābhāgā devī nārāyaṇī nṛpa

prasannā te mahābhāge vratena niyamena ca /
dadāmi te na sandeho varaṃ vṛṇu yathepsitam

evaṃ śrutvā tu vacanaṃ rohiṇī śaśinaḥ priyā /
varaṃ vavre tato devīm idaṃ vacanam abravīt

sarvāsāṃ ca sapatnīnāmadhikā śaśinaḥ priyā /
yathā bhavāni hy acirāt tvatprasādāt tathā kuru

evam astv iti sā proktā bhavānyā bhaktitatparaiḥ /
stūyamānā suragaṇais tatraivāntaradhīyata

tadā prabhṛti sā devī rohiṇī śaśinaḥ priyā /
saṃjātā sarvalokasya vallabhā nṛpasattama

tatra tīrthe tu yā nārī naro vā snāti bhaktitaḥ /
vallabhā bhavate sā tu bhartur vai rohiṇī yathā

tatra tīrtheṣu yaḥ kaścit prāṇatyāgaṃ karoti ca /
saptajanmani tasyaiva viyogo naiva jāyate

mārkaṇḍeya uvāca:
tato gacchet tu rājendra cakratīrtham anuttamam /
senāpureti vikhyātaṃ sarvapāpakṣayakaram

saināpatye 'bhiṣiktena devadevena cakriṇā /
abhiṣikto mahāsenaḥ sa devendrapurogamaiḥ

dānavasya vadhārthāya vijayāya divaukasām /
bhūmidānena viprendrāṃs tarpayitvā yathā vidhi

śaṅkhabherīninādena paṭahānāṃ ca niḥsvanaiḥ /
vīṇābhiś ca mṛdaṇgaiś ca jhallarīkāṃsyatālakaiḥ

tacchrutvā ninadaṃ ghoraṃ dānavo baladarpitaḥ /
surāṇāmāvighātārtham abhiṣekasya cāgrataḥ

hastyaśvarathapattyādyaiḥ paripūrṇo ravākulaiḥ

tatas tu tām raudravasya vāhinīṃ śaraiḥ suśārṅgojjhitakaiḥ sutīkṣṇaiḥ /
vidhvasya hastyaśvarathān mahātmā cakraṃ vimuktaṃ madhughātinā ca

dṛṣṭvā tu bhīṣaṇaṃ cakramabhivyāptaṃ ṣaḍānanaḥ /
tyaktvā tatrāpy avasthānaṃ cakāra vipulaṃ tapaḥ

cakraṃ muktaṃ vināśāya hariṇā lokadhāriṇā /
vihvalāṃ dāhayāmāsa papāta vimale jale

niṣpāpaṃ tac ca saṃjātaṃ narmadāyāḥ prabhāvataḥ /
prāvṛṭkāle śubhe pakṣe dvādaśyāṃ caiva bhārata

yaś ca yāti jitakrodhaś cakratīrthaṃ haripriyam /
so 'pi pāpaiḥ pramucyeta yamaṃ ghoraṃ na paśyati

rātrau jāgaraṇaṃ kṛtvā dīpaṃ devasya dāpayet /
kathāṃ ca vaiṣṇavīṃ tatra devadevaṃ samāhitaḥ

bhīmavrataṃ ca pārākaṃ kṛcchraṃ cāndrāyaṇaṃ tathā /
vrataṃ sāntapanaṃ deva trirātravratakaṃ bhṛśam

tared vaitaraṇīm ante bhīmaṃ cakramaharniśam /
kūṭaśālmalivṛkṣāṃś ca kadācin naiva paśyati

etat te kathitaṃ sarvaṃ cakratīrthasya yatphalam