Skandapurāṇa: Revākhaṇḍa (revised text) · Chapter 116

iti śrīskandapurāṇe revākhaṇḍe cakratīrthamahimānuvarṇano nāma pañcadaśādhika śatatamo 'dhyāyaḥ ||
RKS adhyāya 116
mārkaṇḍeya uvāca:
dhūmapātaṃ tato gacchen mahāpātakanāśanam /
samīpe cakratīrthasyā viṣṇunā nirmitaṃ purā

mekalāṃ paramāṃ devīm imāṃ trailokyapāvanīm /
kadācit payasāṃ rājā sāntaḥpuraparicchadaḥ

śiṣṭair iṣṭair bandhubhiś ca arghapātreṇa saṃyutaiḥ /
hastābharaṇasaṃyuktaiḥ puṇyair amalakāntibhiḥ

candramaṇḍalamānaiś ca yuktair muktāphalais tathā /
pravālalatikābhiś ca indranīlasamanvitaiḥ

arghaṃ dadau tadā tasyai varuṇaḥ saritāṃ patiḥ /
gaṅgādyāḥ saritaḥ sarvās tāpī cāpi payoṣṇikā

nandinī nalinī puṇyā sarvam arghaṃ dadus tadā /
narmadovāca:
madīye saṅgame divye snātvā santarpayanti ye

tasya saptakulotpannāṃs tārayāmi na saṃśayaḥ /
jalāñjaliṃ tato dattvā samudro vākyam abravīt

dhanyo 'haṃ kṛtakṛtyo 'haṃ tvayā devi varānane /
samāyātāsi bhadraṃ te māṃ cātra pāvanaṃ kuru

narmadovāca:
pavitro 'si mahābhāga ekākī tvaṃ mahodadhe /
mārkaṇḍeya uvāca:
evaṃ bhagavatī rājan narmadā mekalā śubhā

pūjitā sāgareṇāpi śubhe siṃhāsane sthitā /
pāṇigrahaṃ gṛhītā sā purukutsena bhārata

purukutsasya bhāryā sā gṛhadharmeṇa saṃyutā /
sadā vai vartate rājaṃs tatraiva saṅgame śubhe

puṣpavṛṣṭis tadā hy āsīt tridaśānāṃ mahotsave /
tatra svayaṃvaraścāsīt saritaḥ pṛthivīpate

tatra yaḥ kurute śrāddhaṃ sthānaṃ ca pitṛtarpaṇam /
lakṣayajñaphalaṃ prāpya sa mukto nātra saṃśayaḥ

evaṃ trailokyapūjyā te narmadā lokapāvanī /
tasyā māhātmyam atulaṃ kīrtitaṃ hi mahābhuja

bhaktyā śrutvā mahābhāga rudraloke mahīyate /
ādimadhyāvasāneṣu revāmāhātmyam uttamam

yaḥ kaścic chṛṇuyād bhaktyā tasya syād vāñchitaṃ phalam /
śrutvā māhātmyam atulaṃ yo naro hi jitendriyaḥ

dānaṃ kuryāt tadā tasya sarvakāmārthasiddhayaḥ /
pustakaṃ pūjayitvā tu dhūpadīpakacandanaiḥ

dānaṃ tatra prakartavyaṃ brāhmaṇāṃś cāpi pūjayet /
śravaṇena tu dānena suprītā narmadā bhavet

tīrthe tīrthe ca kathitaṃ tatpūrvaṃ pāṇḍunandana /
puṇyaṃ śrutvā tu māhātmyaṃ tad dānenaiva pāṇḍava

etasmāt kāraṇād dānaṃ śrutvā dānaṃ hi kāraṇam /
tac chrutvā rājaśārdūlo mārkaṇḍeyasya bhāṣitam

arghaṃ dattvā yathānyāyaṃ pūjayitvā ṛṣīn sadā /
aśvairgajais tathā rathair bhrātṛbhiḥ saha dharmarāṭ

tīrthayātrāṃ cakārāśu narmadāyāṃ yudhiṣṭhira /
uttare dakṣiṇe tīre snānapānāvagāhanam