Skandapurāṇa: Revākhaṇḍa (revised text) · Chapter 114

iti śrīskandapurāṇe revākhaṇḍe eraṇḍītīrthamahimānuvarṇano nāma trayodaśādhikaśatatamo 'dhyāyaḥ ||
RKS adhyāya 114
mārkaṇḍeya uvāca:
etasyānantaraṃ pārtha sauvarṇaṃ tīrtham uttamam /
vikhyātaṃ triṣu lokeṣu sarvapāpakṣayaṃkaram

revāyāṃ durlabhaṃ snānaṃ saṅgamasya samīpataḥ /
vibhaktaṃ hastamātraṃ ca puṇyakṣetre narādhipa

suvarṇaśilake snātvā śāntiṃ yāti parāṃ śubhām /
nirmitvā bhāskaraṃ devaṃ hotavyaṃ tu hutāśane

bilvena ghṛtamiśreṇa bilvapatreṇa bhūriṇā /
prīyatāṃ hi jagannātho vyādhir naśyatu me sadā

dvijebhyaś cet prayuktaṃ syād yāgasya phalam āpnuyāt /
tatra dānena prītātmā mṛtaḥ svargam avāpnuyāt

śuklapakṣe tathāṣṭamyāṃ sopavāso jitendriyaḥ /
yas tatra kurute śrāddhaṃ nṛdevabhaktito naraḥ

samuddharet kule tatra daśapūrvān daśāparān /
kāṃcanaṃ vāpi yo dadyād dhenuṃ caiva suśobhanām

sa yāti paramaṃ sthānaṃ yatra devo maheśvaraḥ /
pūjayitvā śivaṃ tatra śatrūṇāṃ vijayo bhavet

putravān guṇavāṃś caiva sarvavyādhi vivarjitaḥ /
ity evaṃ kathitaṃ rājan sauvarṇaṃ tīrtham uttamam

mārkaṇḍeya uvāca:
etasminn antare tīrthaṃ karaṇḍeśvaram uttamam /
prakhyātaṃ sarvalokeṣu narmadāyottare taṭe

sarvapāpaharaṃ proktaṃ sarvaduḥkhaghnam uttamam /
tato gacchec ca rājendra tīrthaṃ paramaśobhanam

saubhāgyakaraṇaṃ divyaṃ narāṇāṃ pāpanāśanam /
tatra yā durbhagā nārī naro vā nṛpanandana

snātvā 'rcayed umāṃ rudraṃ saubhāgyaṃ tasya jāyate /
tṛtīyāyām ahorātraṃ sopavāso jitendriyaḥ

nimantrayed dvijaṃ tatra sapatnīkaṃ surūpiṇam /
gandhamālyair alaṃkṛtya puṣpadhūpādhivāsitam

bhojayet pāyasānnena kṛśareṇātha bhaktitaḥ /
bhojayitvā yathā nyāyaṃ pradakṣiṇam athācaret

tvaṃ tu devo mahādeva sapatnīko vṛṣadhvaja /
yathā te deva deveśa na viyogaḥ kadācana

somanāthākhyakārpaṇyāt taṃ dhyāyām īha cintayan /
jyeṣṭhe śukle tṛtīyāyāṃ saubhāgye narmadājale

snātvā dattvā ca subhagā na priyeṇa viyujyate /
yudhiṣṭhira uvāca:
na daurbhāgyaṃ na dāridryaṃ na śoko na ca durgatiḥ

etat sarvaṃ bhaved yena tatsarvaṃ kathayasva me /
mārkaṇḍeya uvāca:
daurbhāgyaṃ durgatiṃ caiva dāridryaṃ śokavardhanam

vaidhavyaṃ saptajanmani jāyate na yudhiṣṭhira /
karmaṇā yena pāpānāṃ kṣayas tac ca vadāmi te

jyeṣṭhe māse site pakṣe tatīyāyāṃ viśeṣataḥ /
tatra snātvā tu yo bhaktyā pañcāgniṃ sādhayet tapaḥ

so 'pi pāpair aśeṣais tu mucyate nātra saṃśayaḥ /
gugguluṃ dāhayed yas tu gaurī śivasamīpataḥ

tasmin karmaṇi viprasya uktāni bhavate tataḥ /
dehapāte kṛte svargam ity evaṃ śaṅkaro 'bravīt

śvetairaktais tathā pītair vastraiś ca vividhaiḥ śubhaiḥ /
brāhmaṇīrbrāhmaṇāṃś caiva pūjayitvā yathāvidhi

puṣpair nānāvidhaiś caiva gandhadhūpaiḥ suśobhanaiḥ /
kaṇṭhe sūtraṃ samādhāya kuṅkumena vilepayet

kalpayitvā striyaṃ gaurīṃ brāhmaṇaṃ śivarūpiṇam /
tābhyāṃ dadyāt samādṛtya dānam utsṛjya vāriṇā

karṇaveṣṭaṃ tvaṅgadaṃ ca kāñcanīṃ mudrikāṃ tathā /
saptadhānyaṃ tathā deyaṃ bhojanaṃ nṛpasattama

anyāni caiva dānāni tasmiṃs tīrthe narottama /
sarvadānaiś ca yatpuṇyaṃ tatpuṇyaṃ triguṇaṃ bhavet

tatra sāhasraguṇitaṃ nātra kāryā vicāraṇā /
śaṅkareṇa samaṃ tatra bhuṅkte bhogān anuttamān

saubhāgyaṃ tasya vipulaṃ jāyate nātra saṃśayaḥ /
aputro labhate putraṃ nirdhano dhanam āpnuyāt

kāmadaṃ tīrtharājaṃ tu narmadāyāṃ vyavasthitam