Skandapurāṇa: Revākhaṇḍa (revised text) · Chapter 112

iti śrīskandapurāṇe revākhaṇḍe mārkaṇḍeśvaramahimānuvarṇano nāmaikādaśādhikaśatatamo 'dhyāyaḥ ||
RKS adhyāya 112
mārkaṇḍeya uvāca:
tato gacchet tu rājendra tīrthaṃ paramaśobhanam /
uttare narmadākūle yajñavāṭasya madhyataḥ

saṃkarṣaṇaṃ ca vikhyātaṃ pṛthivyāṃ pāpanāśanam /
tapaścīrṇaṃ purā rājan narmadāyās taṭe śubhe

balabhadreṇa rājendra prāṇinām upakārakam /
gīrvāṇaiś caiva tatraiva sannidhau nṛpanandana

umayā sahitaḥ śambhuḥ sthitas tatraiva keśavaḥ /
yas tatra snāpayed bhaktyā jitakrodho jitendriyaḥ

ekādaśyāṃ site pakṣe mantreṇa snāpayec chivam /
śrāddhaṃ tatra ca yo bhaktyā pretānāṃ vai pradāpayet

sa yāti paramaṃ sthānaṃ balabhadravaco yathā /
tato gacchec ca rājendra manmatheśvaram uttamam

snānamātro naro rājan yamalokaṃ na paśyati /
anapatyā tu yā nārī snāpayet pāṇḍunandana

putraṃ sā labhate pārtha satyavantaṃ dṛḍhavratam /
tatra snātvā naro rājan muniḥ prayatamānasaḥ

upoṣya parayā bhaktyā gosahasraphalaṃ labhet /
tatra nṛtyaṃ prakurvanti ye narā bhaktimānasāḥ

gītavāditrasaṃyuktaṃ rātrau jāgaraṇaṃ śubham /
sahāmbiko mahādevas tuṣṭo vai manmatheśvaraḥ

kiṃ kariṣyati saṃruṣṭo yamas taṃ na ca paśyati /
kāmena sthāpitaṃ tatra etasmāt kāraṇāt nṛpa

annadānena bho rājan kīrtitaṃ phalam uttamam /
sopānaṃ svargamārgasya pṛthivyāṃ manmatheśvaraḥ

viśeṣāt tatra saṃkhyātaṃ śrāddhadānena bhārata /
annadānena bho rājan kīrtitaṃ phalam uttamam

etat te sarvam ākhyātaṃ tava bhaktyā tu bhārata