Skandapurāṇa: Revākhaṇḍa (revised text) · Chapter 111

iti śrīskandapurāṇe prabhāsatīrthamahimānuvarṇano nāma daśādhikaśatatamo 'dhyāyaḥ ||
RKS adhyāya 111
mārkaṇḍeya uvāca:
tato gacchet tu rājendra narmadādakṣiṇe taṭe /
sthāpitaṃ vāsuker nāmnā aśeṣāghaughanāśanam

yudhiṣṭhira uvāca:
āḥ kasmāt kāraṇāt tāta sthāpitaṃ dakṣiṇe taṭe /
tattvaṃ sarvaṃ mamākhyāhi tv aśeṣaṃ dharmakāraṇam

mārkaṇḍeya uvāca:
śṛṇu tvaṃ kuruśārdūla yaḥ praśnaḥ kriyate tvayā /
bhairavaṃ rūpamāsthāya nṛtyaṃ śambhuś cakāra ha

tac chramāj jāyate svedo gaṅgātoyavimiśritaḥ /
tatraiva pannagaḥ snāto haratoyavimiśrite

mandākinī tataḥ kruddhā vyālasyopari bhārata /
ajagaratvamāpnoṣi uragaṃ cābravīt tadā

vāsukir uvāca:
anugrāhyo 'smy ahaṃ pāpo bhavatyā harasambhṛte /
trailokyapāvanī puṇyā sarit tvaṃ śubhalakṣaṇe

saṃsāracchedanakarī ārtā nāmārtināśinī /
svargadvārasthite devi dayāṃ kuru mamopari

gaṅgovāca:
cara tvaṃ vipulaṃ nāga tapo vai śaṅkaraṃ prati /
tatas tapaś cacārāsāv īśvarārādhanaṃ param

tataś ca dhyāyato devaṃ damayukto 'bhavat sa ca /
tato varṣaśate pūrṇe uparuddho jagadguruḥ

āgatya tatsamīpasthaḥ ślakṣṇāṃ vāṇīm udāharat /
varaṃ varayatu śreṣṭhaṃ pannaga tvaṃ mahābala

pannaga uvāca:
yadi tuṣṭo 'si me deva varaṃ dātuṃ triśūlabhṛt /
tadā me dīyatāṃ sthānaṃ svakīyaṃ vṛṣavāhana

īśvara uvāca:
prasanno 'haṃ mahābāho revāṃ gaccha śubhāṃ tvaram /
yāmye caiva taṭe puṇye snānaṃ kṛtvā vidhānataḥ

ityuktvā 'ntardadhe devo vāsukis tvaritānvitaḥ /
rūpeṇājagareṇātha viveśa narmadājale

mārgeṇa tasya taj jātaṃ jāhnavyāḥ srota uttamam /
nirdhūtakalmaṣaḥ sarpaḥ sa jāto narmadājale

sthāpitaś ceśvaras tatra narmadāyā yudhiṣṭhira /
tena nāgeśvaro bhūmyāṃ sarvapāpavināśanaḥ

aṣṭamyāṃ ca caturdaśyāṃ madhunā snāpayec chivam /
vimuktaḥ sarvapāpebhyo jāyate hy analo yathā

aputrā ye narāḥ pārtha snānaṃ kurvanti saṃgame /
te labhante śubhān putrān kārtavīryopamān api

śrāddhaṃ tatraiva ye bhaktyā upavāsaparāyaṇāḥ /
kurvanti tārayanti svān narakān nṛpanandana

evam ākhyātavān asmi tava snehād viśeṣataḥ /
mārkaṇḍeya uvāca:
tato gacchec ca rājendra mārkaṇḍeśvaram uttamam

narmadādakṣiṇe kūle gīrvāṇair vanditaṃ śubham /
guhyād guhyataraṃ tīrthaṃ nākhyātaṃ kasyacin mayā

sthāpitaṃ ca mayā puṇyaṃ svargabhogaṃ ca muktidam /
jñānaṃ tatraiva me jātaṃ prasādāc chaṅkarasya ca

anyasūktaṃ ca yo dhyāyed drupadaṃ ca jale japet /
so 'pi ghorād aghaughāc ca mucyate pāṇḍunandana

vācikair mānasaiś cāpi karmajair api pāṇḍava /
pañcendriyāṇyavaṣṭabhya yāmyāmāśāṃ ca saṃsthitaḥ

yo japet salile bhaktyā ityevaṃ śaṅkaro 'bravīt /
śrāddhaṃ tatraiva yo bhaktyā kurute nṛpanandana

pitaras tasya vai tṛptā yāvadāhūtasamplavam /
āmalair badarair bilvair akṣatair vā jalena vā

tarpayet tatra yaḥ pretān pretā yānti śubhāṃ gatim