Skandapurāṇa: Revākhaṇḍa (revised text) · Chapter 110

iti śrīskandapurāṇe revākhaṇḍe dvīpeśvaravyāsatīrthavarṇano nāma navādhikaśatatamo 'dhyāyaḥ ||
RKS adhyāya 110
mārkaṇḍeya uvāca:
tato gacchet tu rājendra prabhāseśvaram uttamam /
vikhyātāṃ triṣu lokeṣu svargasopānam uttamam

yudhiṣṭhira uvāca:
prabhāsaṃ nāma tīrthaṃ tu yathājātaṃ mahāphalam /
svargasopānamārgaṃ ca saṃkṣepāt kathayasva me

mārkaṇḍeya uvāca:
durbhagā ravipatnī ca prabhā nāmeti viśrutā /
tayā cārādhitaḥ śambhur ugreṇa tapasā purā

vāyubhakṣā sthitā varṣaṃ śivadhyānaparāyaṇā /
tatas tuṣṭo mahādevaḥ prabhāṃ tāṃ pāṇḍunandana

uvāca kliśyate kasmād bāle tvaṃ brūhi ceṣṭitam /
ahaṃ ca bhāskaropetaś cāntaraṃ naiva vidyate

prabhovāca:
nānyo devas tathā śambho bhartā puṣyati na kvacit /
saguṇo vāpi cākhyāto nirguṇo dravyavarjitaḥ

priyo vā yadi vā dveṣyaḥ strīṇāṃ bhartā hi devatā /
durbhagā tvena dagdhāhaṃ lokamadhye maheśvara

alabdhasaukhyā bhartuś ca tena kliśye maheśvara /
deva uvāca:
vallabhā bhāskarasya tvaṃ matprabhāvād bhaviṣyasi

pārvaty uvāca:
vallabhā tava vākyena bhāskare na bhaviṣyati /
vṛthā kleśo bhaved eva prabhāyās tatra kā kathā

devīvākyena rudreṇa dhyātas timiranāśanaḥ /
āgato gaganād bhānur narmadāyottare taṭe

bhānur uvāca:
kasmād āhvānito deva andhakāsuranāśana /
deva uvāca:
prabhāṃ pālaya he bhāno santoṣeṇa pareṇa ca

prabhāyā mandire nityaṃ sthīyatāṃ himanāśana /
evaṃ labdhavarā devāt prabhā sthāpyāha śaṅkaram

svāṃśena sthīyatām atra tīrthamunmīlayānagha /
mārkaṇḍeya uvāca:
sarvadevam ayaṃ liṅgaṃ sthāpitaṃ pāṇḍunandana

prabhāseśvaranāmedaṃ sarvaloke ca durlabham /
anyāni yāni tīrthāni kāle te 'pi phalanti vai

prabhāsaṃcāpi rājendra sadyaḥ puṇyaphalapradam /
māghamāse ca saptamyāṃ viśeṣaphaladaṃ bhavet

aśvaṃ yo dāpayet tatra yathoktaṃ brāhmaṇe nṛpa /
indrasya prāpyate lokam athavā bhāskaraṃ vrajet

daurbhāgyaṃ naśyate tatra snānamātreṇa pāṇḍava /
tatra tīrthe tu yo bhaktyā kanyādānaṃ prayacchati

brāhmaṇāya vivāhārthe dāpeyat pāṇḍunandana /
samānavayase vipre kulīne dhanine tathā

yo dadāti mahārāja mahāpātakasaṃyutaḥ /
tasya pāpaṃ ca naśyeta udake lavaṇaṃ yathā

svāmidrohodbhavaṃ pāpaṃ yatpāpaṃ steyasambhavam /
kūṭasākṣyapradaṃ pāpaṃ cāṇḍālavratacāriṇām

dāmbhikaṃ vṛkṣakacchedam agamyāgamanodbhavam /
grāmakūṭodbhavaṃ yac ca garadaṃ vā pravārakam

vidyāvikrayaṇe yac ca saṃsargodbhavapātakam /
patnīdrohodbhavaṃ ghoraṃ sarvadrohodbhavaṃ nṛpa

brahmahatyā ca yatpāpaṃ yatpāpaṃ bhūmihāriṇaḥ /
govadhe caiva yatpāpaṃ gurvagnibrāhmaṇeṣu ca

jambūplakṣāhvayau dvīpau śālmaliś ca bhaven nṛpa /
kuśakrauñcas tathā śākaḥ puṣkaraś caiva saptamaḥ

tatpāpaṃ vilayaṃ yāti kanyādānena pāṇḍava /
bhittvātha bhāskaraṃ lokaṃ śubhaṃ vrajet

krīḍate rudralokastho yāvad indrāś caturdaśa /
sarvapāpakṣaye jāte śivo bhavati bhāvataḥ

tāvad bhramati tattīrthaṃ prabhāsaṃ pāṇḍunandana /
so 'śvamedhaphalaṃ prāpya satyam īśvarabhāṣitam

godānaṃ ca mahatpuṇyaṃ sarvapāpakṣayaṃkaram /
pratyakṣaṃ surabhīṃ tatra jaladhenuṃ tathādṛtaḥ

tiladhenupradātā ca aśvadātā tathaiva ca /
kanyāvidyāpradātā ca akṣayaṃ lokam āpnuyāt

bhūrivastrāṃ kṣīrayuktāṃ dhānyopaskarasaṃyutām /
dāpayet sarvakāmo 'tha surabhīṃ nṛpasattama

saptasāgaraparyantā veṣṭitā tena bhārata /
dvīpeśvare tu rājendra vṛṣotsargaṃ jitendriyaiḥ

sarvakālaṃ tu kartavyaṃ caturdaśyāṃ viśeṣataḥ