Skandapurāṇa: Revākhaṇḍa (revised text) · Chapter 108

iti śrīskandapurāṇe revākhaṇḍe candrādityeśvaramahimānuvarṇano nāma saptādhikaśatatamo 'dhyāyaḥ ||
RKS adhyāya 108
mārkaṇḍeya uvāca:
tato gacchet tu rājendra yamahāsamanuttamam /
sarvapāpaharaṃ pārtha revāyāstaṭam āśritam

yudhiṣṭhira uvāca:
yamahāsaṃ kathaṃ jātaṃ pṛthivyāṃ munipuṅgava /
etat sarvaṃ samākhyāhi mama kautūhalaṃ param

mārkaṇḍeya uvāca:
sādhu sādhu mahābhāga pṛṣṭaṃ te dharmanandana /
snānārthaṃ narmadāyāṃ tu āgatas te pitā purā

rajakena yathā dhautaṃ nirmalaṃ vasanaṃ bhavet /
tathaiva paśyatā rājan revājalam anuttamam

hāsyaṃ kṛtaṃ yamenātha utthitaṃ liṅgam uttamam /
tatas tadā hi rājendra vāguvācā 'śarīriṇī

yamahāsam idaṃ tīrthaṃ khyātiṃ yāsyati sarvadā /
snāpayitvā śivaṃ tatra yamaḥ svargaṃ jagāma ha

yamahāse tu rājendra jitakrodho jitendriyaḥ /
viśeṣādāśvine māsi kṛṣṇapakṣe caturdaśīm

upoṣya parayā bhaktyā sarvapāpaiḥ pramucyate /
rātrau jāgaraṇaṃ kṛtvā dīpaṃ devasya bodhayet

ghṛtena caiva rājendra śṛṇu tasyaiva yatphalam /
mucyate sarvapāpais tu agamyāgamanodbhavaiḥ

abhakṣyabhakṣaṇaiḥ pāpaiḥ pāpair vā peyasambhavaiḥ /
avāhyavāhaneyac ca adrohya drohaṇe tathā

snānamātreṇa tac caiva naśyet pāpamanekadhā /
yamalokaṃ na paśyec ca na tyajet pāṇḍunandana

bahūnāṃ paramaṃ guptaṃ tīrthaṃ bhūmyāṃ nṛpātmaja /
tad akṣayaphalaṃ teṣāṃ yamahāse pradāyinām

amāvāsyāṃ jitakrodho yas tu pūjayate dvijān /
bhūmidānena yo bhaktyā tiladānena bhārata

kṛṣṇājinapradānena tiladhenupradānataḥ /
vasubhe vṛddhiyoge ca ye pradāsyanti bhaktitaḥ

odanaṃ vāri dhūrvāhaṃ hayaṃ cāpi mahābalam /
kanyāṃ vastramajāṃ gāṃ vai mahiṣīm athavāśvinīm

ye yacchanti nṛpaśreṣṭha nopasarpanti te yamam /
yamo 'pi bhavati prīto janmajanma yudhiṣṭhira

yamasya vāhanaṃ strīṃ ca mahiṣīṃ tatra bhārata /
tasya dānena satataṃ yamaḥ prīto bhaven nṛpa

na sa yāti yame loke yadi pāpaiḥ samāśritaḥ /
etasmāt kāraṇāt pārtha mahiṣīdānaṃ uttamam

aurṇavastradvayaṃ kāryaṃ lohavarṇaṃ ca veṣṭitam /
dāpayed dharmarājāya prīyatāṃ me dvijottama

anenaiva tu dānena yamaḥ prīto 'stu me sadā /
ityuccārya dvijasyāgre yamalokaṃ bhayāvaham

asipatravane ghore yamavallī sudāruṇā /
raudrā vaitaraṇī ceti kumbhīpākaḥ sudāruṇaḥ

kālasūtraṃ mahābhīmaṃ tathā yamalaparvatau /
krakacaṃ tailayantraṃ ca sthāne gṛdhrāḥ sudāruṇāḥ

aniśvāso mahāraudro bhīṣaṇo rauravas tathā /
ete ghorāś ca narakāḥ śrūyante dvijasattama

tatprasādena te saumyās tīrthasyāsya prabhāvataḥ /
dānasyāsya prabhāveṇa yamahāsaprabhāvataḥ

yamalokaṃ na vai yāti narakaṃ naiva paśyati