Skandapurāṇa: Revākhaṇḍa (revised text) · Chapter 105

iti śrīskandapurāṇe revākhaṇḍe somanāthatīrthamahimānuvarṇano nāma caturadhikaśatatamo 'dhyāyaḥ ||
RKS adhyāya 105
mārkaṇḍeya uvāca:
tato gacchet tu rājendra piṅgalāvartakaṃ nṛpa /
saṅgamasya samīpasthaṃ revāyā uttare taṭe

havyavāhena rājendra sthāpitaḥ piṅgaleśvaraḥ /
yudhiṣṭhira uvāca:
havyavāhena viprendra sthāpitaś ceśvaraḥ katham

mārkaṇḍeya uvāca:
retasā yadi rudreṇa tarpito havyavāhanaḥ /
prāpto rudreṇa saumyena dehaṃ prāpya jagāma saḥ

havyavāhamukhe kṣipte rudreṇāmitatejasā /
rudrasya tejasā dagdhaḥ tīrthayātrāṃ karoti saḥ

cacāra parayā bhaktyā dhyānam ugraṃ hutāśanaḥ /
vāyubhakṣaḥ śataṃ sāgraṃ yāvad āsīt hutāśanaḥ

tāvat tuṣṭo mahādevo hutāśanam uvāca ha /
havyavāha varaṃ brūhi yat te manasi vartate

hutāśana uvāca:
namaste sarvalokeśa ugrarūpa namo 'stu te /
yuṣmad retena saṃpluṣṭaḥ kubjo jāto maheśvara

śarīrārto hy ahaṃ kṛṣṇaḥ saṃsthito narmadātaṭe /
ityuktvāntardadhe devo nīrujastvaṃ bhaviṣyasi

havyavāhena rājendra sthāpitaḥ piṅgaleśvaraḥ /
jitakrodho 'pi yas tatra upavāsaṃ samācaret

atirātraphalaṃ tatra ante rudram avāpnuyāt /
guṇānvitāya dīnāya kapilāṃ tatra bhārata

alaṃkṛtvā savastrāṃ ca savatsāṃ rūpasaṃyutām /
yaḥ prayacchati viprāya sa gacchet paramaṃ padam

tato gacchet tu rājendra tīrthaṃ paramaśobhanam /
sthāpitaṃ hy ṛṣisaṅghaiś ca brahmavaṃśodbhavair dvijaiḥ

ṛṇamocanavikhyātaṃ revātaṭasamāśritam /
ṣaṇmāsaṃ manujo bhaktyā tatra yas tarpayet pitṝn

divyaiḥ pitryair manuṣyaiś ca ṛṇair ātmakṛtaiḥ saha /
mucyate tatkṣaṇāt so 'tha snātvā vai narmadājale

pratyakṣaṃ pātakaṃ tatra dṛśyate caiva rūpi ca /
tatra tīrthe tu yo rājann ekacitto jitendriyaḥ

snānaṃ dānaṃ naro dhīmān kārayed bhaktitatparaḥ /
ṛṇatrayavimuktas tu vīryavān modate divi

mārkaṇḍeya uvāca:
tasyaivānantaraṃ pārtha kapilātīrtham uttamam /
sthāpitaṃ kapilenaiva sarvapāpapraṇāśanam

aṣṭamyāṃ ca site pakṣe caturdaśyāṃ nareśvara /
snāpayet parayā bhaktyā kapilākṣīrasarpiṣā

madhunā khaṇḍayuktena dadhyakṣataphalena ca /
kapileśaṃ nṛpaśreṣṭha niśīthe taṃ jagatprabhum

śrīkhaṇḍena sugandhena guṇṭhayec ca maheśvaram /
tataḥ sugandhapuṣpaiś ca śvetaiś ca nṛpanandana

arcayanti jitakrodhā na te yānti yamālayam /
asipatravanaṃ ghoraṃ yamavallīṃ sudāruṇām

te vrajanti sukhaṃ pārtha kapileśe supūjite /
snātvā revājale puṇye pūjayed brāhmaṇaṃ śubham

gopradānena vastreṇa annena kila bhāratā /
chatraśayyāpradānena bhūmau rājā bhavet tu saḥ

nīrogas tīvratejāś ca jīvatputraḥ priyaṃvadaḥ /
śatravo mitratāṃ yānti jāyate nātra saṃśayaḥ