Skandapurāṇa: Revākhaṇḍa (revised text) · Chapter 102

iti śrīskandapurāṇe revākhaṇḍe nanditīrthavarṇano nāmaikaśatatamo 'dhyāyaḥ ||
RKS adhyāya 102
mārkaṇḍeya uvāca:
tato gacchet tu rājendra varuṇeśvaram uttamam /
yatra siddhaḥ purā devo varuṇo nṛpasattama

piṇyākaśākaparṇaiś ca kṛcchracāndrāyaṇādibhiḥ /
ārādhya girijānāthaṃ tataḥ siddhiṃ gatā janāḥ

tatra tīrthe naraḥ snātvā saṃtarpya pitṛdevatāḥ /
pūjayec chaṅkaraṃ bhaktyā sa gacchet paramaṃ padam

kuṇḍikāṃ vardhanīṃ vāpi mahadvā jalabhājanam /
annena sahitaṃ pārtha tasya puṇyaphalaṃ śṛṇu

yatphalaṃ labhate martyaḥ satre dvādaśavārṣike /
tatphalaṃ samavāpnoti nātra kāryā vicāraṇā

sarveṣām eva dānānām annadānam anuttamam /
yadyat prītikaraṃ caiva toyaṃ ca nṛpasattama

tatra tīrthe mṛtānāṃ ca narāṇāṃ bhāvitātmanām /
vāruṇe ca pure vāso yāvad āhūta samplavam

bhuktvā tatra bahuṃ kālaṃ martyaloke 'bhijāyate /
annadānaprado nityaṃ jīvec ca śaradāṃ śatam

mārkaṇḍeya uvāca:
tato gacchec ca rājendra agnitīrtham anuttamam /
yatra siddho mahātejās tapaḥ kṛtvā hutāśanaḥ

sarvabhakṣīkṛto yaś ca daṇḍake muninā purā /
narmadātaṭam āśritya pūto jāto hutāśanaḥ

tatra tīrthe naraḥ snātvā samabhyarcya jagadgurum /
umayā sahita bhaktyā sarvapāpaiḥ pramucyate

tatra tīrthe naraḥ snātvā datte vai kāṃcanaṃ nṛpa /
brāhmaṇebhyo jalaṃ dattvā labhate vārbudaṃ phalam

dadhicchande madhucchande nandīśe vāruṇe tathā /
āgneye tatphalaṃ tāta snātvā mucyeta kilbiṣaiḥ

te vandyā mānuṣe loke dhanyāś cāptamanorathāḥ /
yair hi dṛṣṭaṃ mahāpuṇyaṃ narmadātīrthapañcakam

svargalokam avāpuste yāvad indrāś caturdaśa /
tataḥ svargāc cyutāś cāpi rājānaḥ santi dhārmikāḥ

sarvapāpavinirmuktā bhuñjate te 'calāṃ mahīm /
ākhaṇḍalapratāpo 'yaṃ narmadātaṭasevane

gaṅgākanakhale puṇyā kurukṣetre sarasvatī /
grāme vā yadi vāraṇye puṇyā sarvatra narmadā

revātīraṃ vasen nityaṃ toyaṃ yas tu sadā pibet /
snāto 'sau sarvatīrtheṣu somapānaṃ dine dine

gaṅgādyāḥ saritaḥ sarvāḥ samudrāś ca sarāṃsi ca /
kalpānte saṃkṣayaṃ yānti na mṛtaikā ca narmadā