Skandapurāṇa: Revākhaṇḍa (revised text) · Chapter 101

iti śrīskandapurāṇe revākhaṇḍe parāśaratīrthamahimānuvarṇano nāma śatatamo 'dhyāyaḥ ||
RKS adhyāya 101
mārkaṇḍeya uvāca:
bhīmeśvaraṃ tato gacchet sarvapāpakṣayaṃkaram /
sevyate ṛṣisaṅghaiś ca bhīmavratadharair api

tatra tīrthe tu yaḥ snātvā sopavāso jitendriyaḥ /
japaṃś caikākṣaraṃ mantram ūrdhvabāhur divākaram

tasya janmārjitaṃ pāpaṃ tatkṣaṇād eva naśyati /
saptajanmārjitaṃ pāpaṃ gāyatryā naśyate dhruvam

daśabhir janmajanitaṃ śatena ca purākṛtam /
trijanmanā sahasreṇa gāyatrī hanti kilbiṣam

vaidikaṃ laukikaṃ cāpi jāpyaṃ japtaṃ janeśvara /
tatkṣaṇād dahate pāpaṃ tṛṇaṃ ca jvalano yathā

tadeva balamāśritya kadācit pāpam ācaret /
ajñānāt tasya tatkṣipraṃ na phalaṃ hi kadācana

tatra tīrthe tu godānaṃ śaktimātreṇa dāpayet /
tad akṣayaṃ phalaṃ sarvaṃ jāyate pāṇḍunandana

mārkaṇḍeya uvāca:
tato gacchet tu rājendra nāradeśvaram uttamam /
tīrthānāṃ paramaṃ tīrthaṃ nirmitaṃ nāradena tu

yudhiṣṭhira uvāca:
nāradena muniśreṣṭha kasya tīrthaṃ vinirmitam /
etad ākhyāhi me sarva prasanno yadi sattama

mārkaṇḍeya uvāca:
parameṣṭhisutaścāpi nārado bhagavānṛṣiḥ /
narmadāyotare kūle tapas tepe purākṛte

navanāḍīnirodhena kāṣṭhāvasthāṃ gatena ca /
toṣitaḥ śrīmahādevo nāradena yudhiṣṭhira

īśvara uvāca:
tuṣṭo 'haṃ tava viprendra yogīśvara ayonija /
varaṃ prārthaya he deva yat te manasi vartate

nārada uvāca:
tvatprasādena bho deva yogaś caiva prasidhyatu /
īśvara uvāca:
yogo bhavatu bhaktis te sarvakālaṃ mamaiva tu

svecchācāro bhave gaccha svargapātālagocare /
martye ca bhramase yogin na kenāpi nivāryase

saptasvarāstrayo grāmā mūrchanās tv ekaviṃśatiḥ /
mama priyakaraṃ divyaṃ nṛtyaṃ gītaṃ ca yoginā

kaliṃ ca paśyase nityaṃ devadānavakinnaraiḥ /
tvat tīrthaṃ bhūtale puṇyaṃ matprasādād bhaviṣyati

ityuktvāntardadhe devo nāradas tatra liṅginam /
sthāpayāmāsa rājendra sarvasattvopakārakam

mārkaṇḍeya uvāca:
pṛthivyām uttamaṃ tīrthaṃ nirmitaṃ nāradena tu /
tasmiṃs tīrthe naraśreṣṭha nāgacched vijitendriyaḥ

māsi bhādrapade ramye kṛṣṇapakṣe caturdaśīm /
upoṣya parayā bhaktyā rātrau kurvīta jāgaram

chatraṃ tatra pradātavyaṃ brāhmaṇe śubhalakṣaṇam /
śastreṇa nihatā ye tu teṣāṃ śrāddhaṃ pradāpayet

yānti te paramaṃ lokaṃ piṇḍadānaprabhāvataḥ /
kapilā caiva dātavyā tatra deśe narādhipa

asya śrāddhaprabhāveṇa brāhmaṇānāṃ narādhipa /
narmadātoyapānasya nyāyārjitadhanasya ca

eteṣāṃ ca prabhāveṇa pretā yāntu parāṃ gatim /
ityuccārya dvije deyā dakṣiṇā ca svaśaktitaḥ

haviṣyānnaṃ viśālākṣa dvijānāṃ caiva dāpayet /
vidyādānena caikena akṣayā gatirāpyate

tasmiṃs tīrthe tu rājendra yo dadyād agrajanmane /
kāṃcanaṃ sa tilaṃ caiva sa gacchec ca triviṣṭapam

mārkaṇḍeya uvāca:
tato gacchettu rājendra tīrthadvayam anuttamam /
dadhichandaṃ madhuchandaṃ sarvapāpakṣayaṃ karam

dadhicchande naraḥ snātvā yo dadyāc ca dvije dadhi /
upatiṣṭhati tasyaitat saptajanmasu bhārata

na vyādhir na jarā tasya na śoko na ca matsaraḥ /
daśacandraśataṃ yāvaj jāyate vipule kule

madhucchande tu madhunā miśritaṃ ca tilodakam /
na ca vaivasvataṃ devaṃ paśyate saptajanmasu

madhunā saha miśraṃ ca tilaṃ yas tu prayacchati /
tasya putrasya pautrasya dāridryaṃ naiva jāyate

madhunā saha saṃmiśraṃ tilaṃ yas tu prayacchati /
madhunā saha saṃmiśraṃ yas tu piṇḍaṃ pradāpayet

tasmiṃs tīrthe tu yaḥ snātvā vidhivad dakṣiṇāmukhaḥ /
pitā pitāmahaś caiva tathaiva prapitāmahaḥ

ṣoḍaśābdāni tuṣyanti nātra kāryā vicāraṇā /
mārkaṇḍeya uvāca:
tato gacchet tu rājendra nanditīrtham anuttamam

yatra siddhaś ca vai nandī tat sarvaṃ kathayāmy aham /
narmadāṃ purataḥ kṛtvā purā nandī maheśvaram

tapas taptaṃ japaṃś caiva tīrthāt tīrthaṃ jagāma ha /
dadhicchandaṃ madhucchandaṃ yāvat tyaktvā ca gacchati

tatas tuṣṭo mahādevo nandinaṃ tamuvāca ha /
maheśvara uvāca:
bho bhoḥ prasanno nandīśa varaṃ vṛṇu yathepsitam

tapasā tena tuṣṭo 'haṃ tīrthayātrākṛtena ca /
nandy uvāca:
na cāhaṃ kāmaye vittaṃ na cāhaṃ kulasantatim

muktiṃ na kāmaye cānyad deveśa caraṇāmbujam /
kṛmikīṭapataṅgeṣu tiryagyonigateṣu ca

janmajanmani yāsyāmi tvadbhaktiracalā ca me /
tatheti cokto devena parameśena nandikaḥ

gṛhītvā taṃ kare śīghraṃ jagāma nilayaṃ haraḥ /
tasmiṃs tīrthe tu yaḥ snātvā bhaktyā tryakṣaṃ prapūjayet

agniṣṭome ca yatpuṇyaṃ phalaṃ prāpnoti mānavaḥ /
tatra tīrthe mahāpuṇye prāṇatyāgaṃ karoti yaḥ

śivasyānucaro bhūtvā modate kalpamakṣayam /
tataḥ kālena mahatā jāyate vipule kule

vedavedāṅgatattvajñe jīvec ca śaradāṃ śatam /
etat te kathitaṃ pārtha sarvatuṣṭipradaṃ śubham

durlabhaṃ satyasaṃjñasya sarvapāpakṣayaṃ karam