Skanda Purana · Chapter 7.82

//devyuvāca // //
cakratīrtheti kiṃ nāma tvayā proktaṃ vṛṣadhvaja //
kutra tiṣṭhati tattīrthaṃ kiṃ prabhāvaṃ vadasva me

// īśvara uvāca // //
purā devāsure yuddhe hatvā daityāñjanārddanaḥ //
cakraṃ prakṣālayāmāsa tatra vai raktaraṃjitam

aṣṭakoṭisutīrthāni tatrānīya svayaṃ hariḥ //
tīrthe prakalpayāmāsa śuddhiṃ kṛtvā sudarśane //
tīrthasya cakre nāmāpi cakatīrthamiti śrutam

aṣṭāyutāni tīrthānāmaṣṭau koṭyastathaiva ca //
tatra saṃti mahādevi cakratīrthe na saṃśayaḥ

yastatra kurute snānamekacitto narottamaḥ//
sarvatīrthābhiṣekasya sa prāpnotyakhilaṃ phalam

tīrthānāmaṣṭakoṭistu nivasaṃti varānane //
ekādaśyāṃ viśeṣeṇa candrasūryagrahe tathā

tatra snātvā mahādevi yajñakoṭiphalaṃ labhet //
tasyaiva kalpanāmāni śṛṇu te kathayāmyaham

koṭitīrthaṃ pūrvakalpe śrīnidhānaṃ dvitīyake //
tṛtīye śatadhāraṃ ca cakratīrthaṃ caturthake

evaṃ te kalpanāmāni hyatītānyakhilāni vai //
kathitānyevamanyāni jñeyāni vibudhaiḥ kramāt

tatra yaddīyate dānaṃ tasya saṃkhyā na vidyate //
arddhakrośapramāṇaṃ hi viṣṇukṣetraṃ prakīrttitam

brahmahatyā nopasarpetsatyametanmayoditam //
māsopavāsī tatkṣetre agnihotrī yatavrataḥ

svādhyāyī yajñayājī ca tapaścāṃdrāyaṇā dikam //
tilodakaṃ pitṝṇāṃ ca śrāddhaṃ ca vidhipūrvakam

ekarātraṃ trirātraṃ vā kṛcchraṃ sāṃtapanaṃ tathā //
māsopavāsaṃ taccaiva anyadvā puṇyakarma tat

daityārikṣetramāsādya yatkiṃcitkurute naraḥ //
anyakṣetrātkoṭiguṇaṃ puṇyaṃ bhūyānna saṃśayaḥ

sudarśane vare tīrthe godānaṃ tatra dāpayet //
samyagyātrāphalaprepsuḥ sarvapāpaviśuddhaye

caṃḍālaḥ śvapaco vā'pi tiryagyonigatastathā //
tasmiṃstīrthe mṛtaḥ samyagācyutaṃ lokamāpnuyāt

iti saṃkṣepataḥ proktaṃ cakratīrthasamudbhavam //
māhātmyaṃ sarvapāpaghnaṃ sarvakāmaphalapradam

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye daityasūdana māhātmyaprasaṃgena cakratīrthotpattivṛttāntamāhātmyavarṇanaṃnāma dvyaśītitamo'dhyāyaḥ