સ્કંદ પુરાણ · અધ્યાય 7.82

॥દેવ્યુવાચ ॥ ॥
ચક્રતીર્થેતિ કિં નામ ત્વયા પ્રોક્તં વૃષધ્વજ ॥
કુત્ર તિષ્ઠતિ તત્તીર્થં કિં પ્રભાવં વદસ્વ મે

॥ ઈશ્વર ઉવાચ ॥ ॥
પુરા દેવાસુરે યુદ્ધે હત્વા દૈત્યાઞ્જનાર્દ્દનઃ ॥
ચક્રં પ્રક્ષાલયામાસ તત્ર વૈ રક્તરંજિતમ્

અષ્ટકોટિસુતીર્થાનિ તત્રાનીય સ્વયં હરિઃ ॥
તીર્થે પ્રકલ્પયામાસ શુદ્ધિં કૃત્વા સુદર્શને ॥
તીર્થસ્ય ચક્રે નામાપિ ચકતીર્થમિતિ શ્રુતમ્

અષ્ટાયુતાનિ તીર્થાનામષ્ટૌ કોટ્યસ્તથૈવ ચ ॥
તત્ર સંતિ મહાદેવિ ચક્રતીર્થે ન સંશયઃ

યસ્તત્ર કુરુતે સ્નાનમેકચિત્તો નરોત્તમઃ॥
સર્વતીર્થાભિષેકસ્ય સ પ્રાપ્નોત્યખિલં ફલમ્

તીર્થાનામષ્ટકોટિસ્તુ નિવસંતિ વરાનને ॥
એકાદશ્યાં વિશેષેણ ચન્દ્રસૂર્યગ્રહે તથા

તત્ર સ્નાત્વા મહાદેવિ યજ્ઞકોટિફલં લભેત્ ॥
તસ્યૈવ કલ્પનામાનિ શૃણુ તે કથયામ્યહમ્

કોટિતીર્થં પૂર્વકલ્પે શ્રીનિધાનં દ્વિતીયકે ॥
તૃતીયે શતધારં ચ ચક્રતીર્થં ચતુર્થકે

એવં તે કલ્પનામાનિ હ્યતીતાન્યખિલાનિ વૈ ॥
કથિતાન્યેવમન્યાનિ જ્ઞેયાનિ વિબુધૈઃ ક્રમાત્

તત્ર યદ્દીયતે દાનં તસ્ય સંખ્યા ન વિદ્યતે ॥
અર્દ્ધક્રોશપ્રમાણં હિ વિષ્ણુક્ષેત્રં પ્રકીર્ત્તિતમ્

બ્રહ્મહત્યા નોપસર્પેત્સત્યમેતન્મયોદિતમ્ ॥
માસોપવાસી તત્ક્ષેત્રે અગ્નિહોત્રી યતવ્રતઃ

સ્વાધ્યાયી યજ્ઞયાજી ચ તપશ્ચાંદ્રાયણા દિકમ્ ॥
તિલોદકં પિતૄણાં ચ શ્રાદ્ધં ચ વિધિપૂર્વકમ્

એકરાત્રં ત્રિરાત્રં વા કૃચ્છ્રં સાંતપનં તથા ॥
માસોપવાસં તચ્ચૈવ અન્યદ્વા પુણ્યકર્મ તત્

દૈત્યારિક્ષેત્રમાસાદ્ય યત્કિંચિત્કુરુતે નરઃ ॥
અન્યક્ષેત્રાત્કોટિગુણં પુણ્યં ભૂયાન્ન સંશયઃ

સુદર્શને વરે તીર્થે ગોદાનં તત્ર દાપયેત્ ॥
સમ્યગ્યાત્રાફલપ્રેપ્સુઃ સર્વપાપવિશુદ્ધયે

ચંડાલઃ શ્વપચો વાઽપિ તિર્યગ્યોનિગતસ્તથા ॥
તસ્મિંસ્તીર્થે મૃતઃ સમ્યગાચ્યુતં લોકમાપ્નુયાત્

ઇતિ સંક્ષેપતઃ પ્રોક્તં ચક્રતીર્થસમુદ્ભવમ્ ॥
માહાત્મ્યં સર્વપાપઘ્નં સર્વકામફલપ્રદમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે દૈત્યસૂદન માહાત્મ્યપ્રસંગેન ચક્રતીર્થોત્પત્તિવૃત્તાન્તમાહાત્મ્યવર્ણનંનામ દ્વ્યશીતિતમોઽધ્યાયઃ