Skanda Purana · Chapter 7.81

// īśvara uvāca // //
tato gacchenmahādevi deveśaṃ daityasūdanam //
pāpaghnaṃ sarvajaṃtūnāṃ prabhāsakṣetravāsinām

anādiyugasaṃsthānaṃ sarva kāmapradaṃ śubham//
saṃsārasāgare ghore sthitaṃ nauriva tāraṇe

anye sarve'pi naśyaṃti kalpāṃte brahmaṇo dine //
etāni muktvā deveśi nyagrodhaṃ sapta kalpagama

kalpavṛkṣaṃ tathā'gāraṃ vaiḍūryaṃ parvatottamam//
śrīdaityasūdanaṃ devaṃ mārkaṃḍeyaṃ mahāmunim

akṣayāścāvyayāścaite saptakalpāni sundari //
devi kiṃ bahunoktena varṇitena punaḥpunaḥ

śrīdaityasūdanāddevi nānyāsti bhuvi devatā //
yavākāraṃ tu tasyaiva kṣetrapātakanāśanam

sevitaṃ carṣibhiḥ siddhairyakṣavidyādharoragaiḥ //
tasya sīmāṃ pravakṣyāmi viṣṇukṣetrasya bhāmini

pūrve yameśvaraṃ yāvacchrīsomeśaṃ tu paścime //
uttare tu viśālākṣī dakṣiṇe saritāṃ patiḥ

etatkṣetraṃ yavākāraṃ vaiṣṇavaṃ pāpanāśanam

atra kṣetre mṛtā ye tu pāpino'pi narā dhruvam //
svargaṃ gacchaṃti te sarve saṃtaḥ sukṛtino yathā

atra dattaṃ hutaṃ japtaṃ tapastaptaṃ kṛtaṃ hi yat //
tatsarvaṃ cākṣayaṃ proktaṃ saptakalpāvadhi priye

tatraikamapi yo devi brāhmaṇaṃ bhojayiṣyati //
vidhinā viṣṇumuddiśya koṭirbhavati bhojitā

tatropavāsaṃ yaḥ kuryānnaro bhaktisamanvitaḥ //
ekenaivopavāsena upavāsāyutaṃ phalam //
cakratīrthe naraḥ snātvā sopavāso jiteṃdriyaḥ

dvādaśyāṃ kārttike māsi dadyādvipreṣu kāṃcanam //
viṣṇuṃ saṃpūjya vidhivanmucyate sarvapātakaiḥ

// devyuvāca // //
daityasūdananāmeti kathaṃ tasya prakīrtitam //
kasminkāle tu deveśa tanme vistarato vada

// īśvara uvāca // //
śṛṇu devi pravakṣyāmi māhātmyaṃ pāpanāśanam //
daityasūdanadevasya purā vṛttaṃ mahodayam

devi tasyaiva nāmāni kalpekalpe bhavaṃti vai//
anādinidhanānyeva saṃbhavanti punaḥpunaḥ

pūrvakalpe śriyā vṛtto vāmanastu dvitīyake//
vajrāṃgastu tṛtīye vai turīye kamalāpriyaḥ

paṃcame duḥkhaharttā ca ṣaṣṭhe tu puruṣottamaḥ//
śrīdaityasūdano devaḥ kalpe vai saptame smṛtaḥ

tasyaiva nāma cotpattiṃ kathayāmi yathārthataḥ

purā devāsure yuddhe dānavairdevakaṃṭakaiḥ //
nirjitā devatāḥ sarve jagmuste śaraṇaṃ harim //
kṣīrodavāsinaṃ devamastuvanpraṇatāḥ sthitāḥ

// devā ūcuḥ// //
jaya deva jagannātha daityāsuravimarddana //
vārāharūpamāsthāya uddhṛtā vasudhā tvayā

uddhṛtā matsyarūpeṇa vedā udadhimadhyataḥ //
kūrmarūpī tathā bhūtvā kṣīrodārṇavamaṃthanam

kṛtvā tvayā jagannātha uddhṛtā śrīrnamo 'stu te //
śrīpatiḥ śrīdharo deva ārttānāmartināśanaḥ

balirvāmanarūpeṇa tvayā baddho'surāriṇā //
hiraṇyākṣo mahādaityo hiraṇyakaśipurhataḥ

nārasiṃhena rūpeṇa antarikṣe dhṛtastvayā //
devamūla mahādeva uddhṛtaṃ bhuvanaṃ tvayā

tvayā vinā jagannātha bhuvanaṃ niṣprabhī kṛtam //
sūryeṇeva tu vikrāntaṃ tamobhiriva dānavaiḥ

śrutvā stotramidaṃ devi viṣṇuḥ kamalalocanaḥ //
uvāca devānbrahmādyānkṣīrodārṇava bodhitaḥ

bhayaṃ tyajadhvaṃ vai devā dānavānprati sarvathā //
acireṇaiva kālena ghātayiṣyāmi dānavān

evamuktvātha taiḥ sārddhamā jagāma janārddanaḥ //
dānavānghātayāmāsa sa cakreṇa pṛthakpṛthak

bhayārttā dānavāḥ sarve palāyanaparāyaṇāḥ //
prabhāsaṃ kṣetramāsādya samudrābhimukhā bhavan

naśyamānāstato dṛṣṭvā daityāndaityavināśanam //
saṃjaghne tānsa cakreṇa niḥśeṣānsarvadānavān

hateṣu sarvadaityeṣu devabrāhmaṇatāpasaiḥ //
kalyāṇamabhavattatra jagatsvasthamanākulam

tatprabhṛtyeva devasya daityasūdananāma tat //
etanmāhātmyamatulaṃ kathitaṃ tava sundari //
daityasūdanadevasya mahābhāgyaṃ mahodayam

taṃ dṛṣṭvā na jaḍo nāṃdho na daridro na duḥkhitaḥ //
jāyate sapta janmāni satyaṃsatyaṃ varānane

śravaṇadvādaśīṃ puṇyāṃ rohiṇyāṃ cāṣṭamīṃ śubhām //
śayanotthāpanīṃ caiva naraḥ kṛtvā prayatnataḥ

ekaikenopa vāsena upavāsāyutaṃ phalam //
labhate nātra sandeho daityasūdanasannidhau

caṇḍālaḥ śvapaco vāpi tiryagyonigato'pi vā //
prāṇatyāge kṛte tasminnācyutaṃ lokamāpnuyāt

kārtikyāṃ caiva vaiśākhyāṃ māsamekamupoṣayet //
daityasūdanamadhyasthaḥ samyakchraddhāsamanvitaḥ

/
ekaikenopavāsena koṭikoṭi pṛthakpṛthak //
labhate tatphalaṃ sarvaṃ viṣṇukṣetraprabhāvataḥ

dīpaṃ dadāti yastatra māsaṃ vā pakṣameva vā //
ekaika dīpadānena koṭidīpaphalaṃ labhet

paṃcāmṛtena saṃsnāpya devadevaṃ caturbhujam //
ekādaśyāṃ nirāhāraḥ pūjayitvā'cyuto bhavet

cāturmāsyaṃ vidhānena daityasūdanasannidhau //
niyamena kṣipedyastu tasya tuṣyati keśavaḥ

anyakṣetreṣu yatkṛtvā cāturmāsyāni koṭiśaḥ //
tatphalaṃ labhate sarvaṃ daityasūdanadarśanāt

brahmāṇḍaṃ sakalaṃ dattvā yatpuṇyaphalamāpnuyāt //
tatpuṇyaṃ labhate sarvaṃ daityasūdanadarśanāt

ekādaśyāṃ tu yastatra kurute jāgaraṃ naraḥ //
gītanṛtyaistathā vādyaiḥ prekṣaṇīyaistathāvidhaiḥ //
sa yāti vaiṣṇavaṃ lokaṃ yaṃ gatvā na nivarttate

hatyā'yutānīha susaṃcitāni steyāni rukmasya na santi saṃkhyā //
nihaṃti kenāpi purā kṛtāni sarvāṇi bhadrā niśi jāgareṇa

mārgā na te pretapurī na dūtā vanaṃ ca tatkhecarakhaḍgapatram //
svapne na paśyaṃti ca te manuṣyā yeṣāṃ gatā jāgaraṇena bhadrā

kanyāsahasraṃ vidhivaddadāti ratnairalaṃkṛtya svadharmabuddhyā //
gavāṃ sahasraṃ kurujāṃgale tu teṣāṃ paraṃ jāgaraṇena viṣṇoḥ

kṛtvā caivopavāsaṃ ca yo'śnāti dvādaśīdine //
naivedyaṃ tulasīmiśraṃ hatyākoṭivināśanam

iti te kathitaṃ devi māhātmyaṃ pāpanāśanam //
daityasūdanadevasya kimanyatparipṛcchasi //

pītavastrāṇi devasya gāṃ hiraṇyaṃ ca dāpayet //
snātvā cakravare tīrthe mucyate sarvapātakāt

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe prathameprabhāsakṣetramāhātmye śrīdaityasūdanamāhātmyavarṇanaṃnāmaikāśītitamo'dhyāyaḥ