Skanda Purana · Chapter 7.83

// īśvara uvāca // //
tato gacchenmahādevi tasya pūrveṇa saṃsthitām //
yogeśvarīṃ mahādevīṃ yogasiddhiphalapradām

tadutpattiṃ pravakṣyāmi śṛṇu śraddhāsamanvitā //
purā dānavaśārdūlo mahiṣākhyo mahābalaḥ

babhūva pravaro devi sarvadevabhayaṃkaraḥ //
kāmarūpī sa lokāṃstrīnvaśīkṛtvā'bhavatsukhī

kasmiṃścidatha kāle tu brahmaṇā lokakāriṇā //
sṛṣṭā manoharā kanyā rūpeṇāpratimā divi

atapatsā tapo ghoraṃ kanyā rūpavatī satī //
nāradena tato dṛṣṭā sā kadācidvarānane

tataḥ sa sahasā devi vismayaṃ paramaṃ gataḥ //
aho rūpamaho dhairyamaho kāntiraho vayaḥ

ityevaṃ cintayaṃstatra nārīṃ vacanamabravīt //
kuruṣvātmapradānaṃ me na me dāraparigrahaḥ //
tavāhaṃ darśanāddevi kāmavāṇena pīḍitaḥ

sā'bravīnna hi me kāryaṃ kāmadharmeṇa sattama//
kaumāraṃ vratamāsādya sādhayiṣye yathepsitam ]/ ८ //
na ca manyustvayā kāryo hyasminnarthe kathaṃcana //
tasyāstadvacanaṃ śrutvā sa munirnāradaḥ priye //

samudrānte'gamaddivyāṃ purīṃ mahiṣapālitām //
arcito hi munistena mahiṣeṇa mahātmanā

pṛṣṭvā hyanāmayaṃ devi dattvā cārghyamanuttamam //
so'bravītprāñjalirbhūtvā kimāgamanakāraṇam //
brūhi yatte vyavasitaṃ sarvaṃ karttāsmi nārada

athovāca munistatra mahiṣaṃ dānaveśvaram//
kanyāratnaṃ samutpannaṃ jaṃbūdvīpe mahāsura

svarge martye ca pātāle na dṛṣṭaṃ na ca me śrutam //
tādṛgrūpamahaṃ yena kāmabāṇavaśīkṛtaḥ

sa śrutvā vacanaṃ tasya kāmasyotpādanaṃ param//
jagāma yatra sā sādhvī kṣetre prābhāsike sthitā

tāmeva prārthayāmāsa balena mahatā vṛtaḥ //
bhāryā bhava tvaṃ me bhīru bhuṃkṣva bhogānmanoramān//
etattapo mahābhāge viruddhaṃ yauvanasya te

tasya tadvacanaṃ śrutvā jahāsa varavarṇinī //
tasyā hasaṃtyā deveśi śataśo'tha sahasraśaḥ

niśvāsātsahasā nāryaḥ śastrahastā bhayānakāḥ //
tābhirvidhvaṃsitaṃ sainyaṃ mahiṣasya durātmanaḥ

tasminnipātyamāne tu sainye dānavasattamaḥ //
krodhaṃ kṛtvā tataḥ śīghraṃ tāmevābhimukho yayau

vidhunvansa hi te tīkṣṇaśṛṃge'bhīkṣṇaṃ bhayānake ///
tayā sārdhaṃ ca sumahatkṛtvā yuddhaṃ mahāsuraḥ

śṛṃgābhyāṃ jagṛhe devīṃ sā tasyopari saṃsthitā //
padbhyāmākramya śūlena nihato daityapuṃgavaḥ

chinne śirasi khaṅgena tadrūpo niḥsṛtaḥ pumān //
raudro'pi sa gataḥ svargaṃ daityo devyastrapātitaḥ

tato devagaṇāḥ sarve mahiṣaṃ vīkṣya nirjitam ///
maheṃdrādyāḥ stutiṃ cakrurdevyāstuṣṭena cetasā

// devā ūcuḥ//
namo devi mahābhāge gambhīre bhīmadarśane//
nayasthite susiddhāṃte trinetre viśvatomukhi

vidyāvidye jaye jāpye mahiṣāsuramardini //
sarvage sarvavidyeśe devi viśvasvarūpiṇi

vītaśoke dhruve devi padmapatrāyatekṣaṇe //
śuddhasattve vratasthe ca caṇḍarūpe vibhāvari

ṛddhisiddhiprade devi kālanṛtye dhṛtipriye //
śāṃkari brāhmaṇi brāhmi sarvadevanamaskṛte

ghaṃṭāhaste śūla haste mahāmahiṣamardini //
ugrarūpe virūpākṣi mahāmāye'mṛte śive

sarvage sarvade devi sarvasattvamayodbhave //
vidyāpurāṇaśalyānāṃ janani bhūtadhāriṇi

sarvadevarahasyānāṃ sarvasattvavatāṃ śubhe //
tvameva śaraṇaṃ devi vidyā'vidye śriye'śriye

evaṃ stutā surairdevi praṇamya ṛṣibhistathā //
uvāca hasatī vākyaṃ vṛṇudhvaṃ varamuttamam

// devā ūcuḥ //
stavenānena ye devi stuvantyatra narottamāḥ //
te saṃtu kāmaiḥ saṃpūrṇā varavarṣā niraṃtaram

asminkṣetre tvayā vāso nityaṃ kāryaḥ śucismite

evamastviti sā devī devānuktvā varānane //
visṛjya ṛṣisaṃghāṃśca tatraiva niratā'bhavat

āśvayukchuklapakṣasya navamyāṃ yo varānane //
upavāsaparo bhūtvā tāṃ prapaśyati bhaktitaḥ //
tasya pāpaṃ kṣayaṃ yāti tamaḥ sūryodaye yathā

ya etatpaṭhati stotraṃ prātarutthāya mānavaḥ //
na bhīḥ saṃpadyate tasya yāvajjīvaṃ narasya vai

āśvayukchuklapakṣe yā aṣṭamī mūlasaṃyutā //
sā mahānāmikā prāṇā yeṣāṃ tasyāṃ gatāḥ śubhe

teṣāṃ svarge dhruvaṃ vāso vīrāste'psarasāṃ priyāḥ

manvantareṣu sarveṣu kalpādiṣu sureśvari //
eṣa eva kramaḥ prokto viśeṣaṃ śṛṇu sāṃpratam

āśvayukchuklapakṣe yā paṃcamī pāpanāśinī //
tasyāṃ saṃpūjayedrātrau khaḍgamaṃtrairvibhūṣitam

maṃḍapaṃ kārayettatra navasaptakaraṃ tathā //
prāgudakpravaṇe deśe patākābhiralaṃkṛtam //
yogeśvaryāḥ saṃnidhāne vidhinā kārayeddvijaḥ

/
āgneyyāṃ kārayetkuṇḍaṃ hastamātraṃ suśobhanam//
mekhalātrayasaṃyuktaṃ yonyā'śvatthadalābhayā

śāstroktaṃ mantrasaṃyuktaṃ hotavyaṃ pāyasaṃ tataḥ//
tataḥ khaḍgaṃ tu saṃsnāpya paṃcāmṛtarasena vai//
pūjayedvividhaiḥ puṣpairmaṃtrapūrvaṃ dvijottamaiḥ

abhīrviśasanaṃ khaḍgaḥ prāṇibhūto durāsadaḥ //
agamyo vijayaścaiva dharmādhārastathaiva ca //
ityaṣṭau tava nāmāni svayamuktāni vedhasā

nakṣatraṃ kṛttikā tubhyaṃ gururdevo maheśvaraḥ //
hiraṇyaṃ ca śarīraṃ te dhātā devo janārdanaḥ //
pitā pitāmaho deva svena pālaya sarvadā

// iti khaḍgamantraḥ // //
evaṃ saṃpūjya vidhinā taṃ khaṅgaṃ brāhmaṇottamaiḥ //
bhrāmayennagare rātrau nāndīghoṣapuraḥsaram

sarvasainyena saṃyuktastatra brāhmaṇapuṃgavaiḥ //
evaṃ kṛtvā vidhānaṃ tu punaryogeśvarīṃ nayet //
uccārya mantramevaṃ vai khaṅgaṃ tasyai samarpayet

añjanena samālekhya candanena vilepitam //
bilvapatrakṛtāṃ mālāṃ tasyai devyai nivedayet

durge durgārtihe devi sarva durgatināśini //
trāhi māṃ sarvadurgeṣu durge'haṃ śaraṇaṃ gataḥ

dattvaivamarghyaṃ deveśi tatra khaṅgaṃ ca jāgṛyāt //
nityaṃ saṃpūjya vidhinā aṣṭamyāṃ yāvadeva hi

tadrātrau jāgaraṃ kṛtvā prabhāte hyaruṇodaye //
pātayenmahiṣānmeṣānagrato gatakaṃdharān

śatamardhaśataṃ vāpi tadardhārdhaṃ yathecchayā //
surāsavabhṛtaiḥ kuṃbhaistarpayetparameśvarīm

kāpālikebhyastaddeyaṃ dāsīdāsajane tathā //
tato'parāhnasamaye navamyāṃ syandane sthitām

yogeśīṃ bhrāmayedrāṣṭre svayaṃ rājā svasainyavān //
nadadbhiḥ śaṃkhapaṭahaiḥ paṭhadbhirbaṭucāraṇaiḥ

bhūtebhyaśca baliṃ dadyānmaṃtreṇānena bhāmini //
saraktaṃ sajalaṃ sānnaṃ gandhapuṣpākṣatairyutam

trīnvārām̐stu triśūlena digvidikṣu kṣipedbalim //
baliṃ gṛhṇantvime devā ādityā vasavastathā

maruto'thāśvinau rudrāḥ suparṇāḥ pannagā grahāḥ //
saumyā bhavaṃtu tṛptāśca bhūtāḥ pretāḥ sukhāvahāḥ

ya evaṃ kurvate yātrāṃ brāhmaṇāḥ kṣetravāsinaḥ //
na teṣāṃ śatravo nāgnirna caurā na vināyakāḥ //
vighnaṃ kurvaṃti deveśi yogeśvaryāḥ prasādataḥ

sukhino bhogabhoktāraḥ sarvātaṃkavivarjitāḥ //
bhavanti puruṣā bhaktā yogeśvaryā niraṃtaram

ityeṣa te samākhyāto yogeśvaryā mahotsavaḥ //
paṭhatāṃ śṛṇvatāṃ caiva sarvāśubhavināśanaḥ

śūlāgrabhinnamahiṣāsurapṛṣṭhapīṭhāmutkhātakhaḍga rucirāṃgadabāhudaṃḍām //
abhyarcya paṃcavadanānugataṃ navamyāṃ durgāṃ sudurgagahanāni taraṃti martyāḥ

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye yogeśvarīmāhātmyavarṇanaṃnāma tryaśītitamo'dhyāyaḥ