Skanda Purana · Chapter 7.79

// īśvara uvāca// //
tato gacchenmahādevi lakulīśaṃ mahāprabham //
tasya paścimadigbhāge dhanuṣāṃ saptake sthitam

pāpaghnaṃ sarvajaṃtūnāṃ śāṃtaṃ mūrtisthitaṃ prabhum //
samāyātaṃ mahākṣetre tatra kāyāvarohaṇāt

kṛtvā tatra tapaścograṃ dīkṣayitvātmaśiṣya kān //
kuśakādīṃśca catura uktvā śāstrāṇyanekaśaḥ

nyāyavaiśeṣikādīni tataḥ siddhiṃ parāṃ gataḥ//
evaṃ jñātvā tu yaḥ samyaktaṃ samarcayate naraḥ

kārttikyāṃ tu viśeṣeṇa ayane cottarepi vā //
vidyādānaṃ ca tatraiva dadyādviprāya śāline

saptajanmāni viprasya dhanāḍhyasya kule śubhe //
jāyate matimāndhīmāñchrīmānevaṃ punaḥpunaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsa kṣetramāhātmye lakulīśvaramāhātmya varṇanaṃnāmaikonāśītitamo'dhyāyaḥ