Skanda Purana · Verses 7.59-2

// īśvara uvāca // //
atha vacmi tṛtīyāṃ te jñānaśaktiṃ śivātmikām //
prabhāsakṣetramadhyasthāṃ dāridryaughavināśinīm

ajeti nāmnīṃ tāṃ devīṃ rāhvīśāddakṣiṇe sthitām //
mama vaktrādviniṣkrāṃtā ṣaṣṭhādvai viṣṇupūjitāt

// devyuvāca // //
paṃcavaktrāṇi deveśa prasiddhāni tava prabhau //
ṣaṣṭhaṃ yadvadanaṃ deva tasya kiṃ nāma saṃsmṛtam //
samutpannā kathaṃ tasmādajādevīti yā śrutā

// īśvara uvāca // //
sādhu pṛṣṭaṃ tvayā devi yadgopyaṃ svasuteṣvapi //
tatte'haṃ saṃpravakṣyāmi aprasiddhāgamoditam

vaktrāṇi mama deveśi saptāsanpūrvameva hi //
sadyojātādipaṃcaiva ṣaṣṭhaṃ smṛtamajeti ca

saptamaṃ picunāmeti saptaivaṃ vadanāni me //
tebhyo'jaṃ brahmaṇe dattaṃ picuvaktraṃ tu viṣṇave

tasmādahaṃ mahādevi paṃcavaktro'dhunā'bhavam //
ajastu brahmā sañjajñe picurviṣṇurajāyata

ajavaktrānmahādevi ajā jātā mahāprabhā //
andhāsuraraṇe ghore mama krodhena bhāmini

khaḍgacarmadharādevī surūpā siṃhavāhinī //
marddayantī mahādaityāndevīkoṭisamanvitā

tasyā bhayena ye daityā vidrutā dakṣiṇārṇavam //
pṛṣṭhato'nuyayau tānvai sā devī siṃhavāhinī

itastataste dhāvanto māryamāṇāśca tadgaṇaiḥ //
prabhāsa kṣetrasaṃprāptā naśyamānā mahārṇavam

kecittatra hatā daityāḥ kecitpātālamāyayuḥ //
niḥśeṣānnihatāndṛṣṭvā sā devī siṃhavāhinī

kṣetraṃ pavitramājñāya tatra sthāne sthitā śubhā //
someśādīśakoṇasthā saurīśāduttare sthitā

yastāṃ tatra sthitāṃ paśyedyoṣidvātha naro'pi vā //
sa bhūyātsattvasaubhāgyaiḥ saptajanmāni saṃyutaḥ

gītavādyādikaṃ nṛtyaṃ yastatra kurute naraḥ //
tasyānvaye na daurbhāgyaṃ bhūyāttasyāḥ prasādataḥ//

ghṛtena dīpakaṃ tatra yā nārī saṃprayacchati//
raktavartyā mahādevi yāvaṃtastatra taṃtavaḥ //
tāvajjanmāṃtarāṇyeva sā saubhāgyamavāpnuyāt

yaścaitattu paṭhennityaṃ tṛtīyāyāṃ viśeṣataḥ //
śṛṇuyādvā'pi yo bhaktyā sa kāmānakhilāllam̐bhet

iti saṃkṣepataḥ prokto rudraśaktitrayakramaḥ

etāḥ śaktīḥ pūjayitvā someśaṃ pūjayettataḥ //
samyagyātrāphalāpekṣī ekāṃ vā varadāmatha

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye'jādevīmāhātmyavarṇanaṃnāmaikonaṣaṣṭitamo'dhyāyaḥ