Skanda Purana · Chapter 7.59

// pulastya uvāca // //
tato mahaujasaṃ gacchettīrthaṃ pātakanāśanam //
yasminsnāto naro rājaṃstejasā yujyate dhruvam //
brahmahatyāgninā śakraḥ purā dainyaṃ paraṃ gataḥ

niḥśrīkastejasā hīno durgandhena samanvitaḥ //
parityaktaḥ suraiḥ sarvairviṣādaṃ paramaṃ gataḥ

tataḥ papraccha devendro dvijaśreṣṭhaṃ bṛhaspatim //
bhagavaṃstejaso vṛddhiḥ kathaṃ syānme yathā purā

// bṛhaspatiruvāca // //
tīrthayātrāṃ suraśreṣṭha kuruṣva dharaṇītale //
tīrthaṃ vinā dhruvaṃ vṛddhistejaso na bhaviṣyati

tatastīrthānyanekāni bhrāṃtvā śakro narādhipa //
krameṇaivārbudaṃ prāptastatra dṛṣṭvā jalāśayam //
snānaṃ cakre tataḥ śrānto mahaujāḥ pratyapadyata

durgandhena vinirmuktastato devaiḥ samāvṛtaḥ //
uvāca prahasanvākyaṃ śṛṇudhvaṃ sarvadevatāḥ

ye'tra snānaṃ kariṣyanti prāpte śakrocchraye sadā //
āśvine śuklapakṣāṃte te yāsyaṃti parāṃ gatim //
suśrīkāśca bhaviṣyaṃti sadā janmanijanmani

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe mahaujasatīrthaprabhāvavarṇanaṃnāmaikonaṣaṣṭitamo'dhyāyaḥ