Skanda Purana · Chapter 7.60

// pulastya uvāca // //
tato gacchennṛpaśreṣṭha jaṃbūtīrthamanuttamam //
tatra snāto naraḥ samyagiṣṭaṃ phalamavāpnuyāt/ //
jaṃbūdvīpasamutthānāṃ tīrthānāṃ nṛpasattama

āsītpurā nimirnāma kṣatriyaḥ sūryavaṃśajaḥ //
vayasaḥ pariṇāme sa parvataṃ cārbudaṃ gataḥ

prāyopaveśanaṃ kṛtvā sthitastatra samāhitaḥ //
athājagmurmunigaṇāstasya pārśve sahasraśaḥ

cakrurdharmakathāṃ puṇyāṃ rājarṣīṇāṃ mahātmanām //
devarṣīṇāṃ purāṇānāṃ tathānyeṣāṃ mahātmanām

tataḥ kaścitkathāṃte ca lomaśo nāma sanmuniḥ //
kīrttayāmāsa māhātmyaṃ sarvatīrthasamudbhavam

tacchrutvā pārthivo rājannimiḥ paramadurmanāḥ //
babhūva na kṛtaṃ pūrvaṃ yatastīrthāvagāhanam

tataḥ provāca taṃ vipramastyupāyo dvijottama //
kaścidyena ca sarveṣāṃ tīrthānāṃ labhyate phalam

//
// lomaśa uvāca // //
dayā me nṛpa sañjātā tvāṃ dṛṣṭvā duḥkhitaṃ bhṛśam //
tīrthayātrākṛte yasmātkariṣye'haṃ tava priyam

atraiva cānayiṣyāmi jaṃbūdvīpodbhavāni ca //
sarvatīrthāni rājendra mantraśaktyā na saṃśayaḥ

snānaṃ kuru mahārāja hyekībhūteṣu tatra ca //
asmiñjalāśaye puṇye satyametadbravīmyaham

evamuktvā sa viprarṣirdhyānaṃ cakre samāhitaḥ //
tatastīrthāni sarvāṇi tatrāyātāni tatkṣaṇāt

pratyayārthaṃ ca rājarṣe jaṃbūvṛkṣo vyajāyata //
tatra snānaṃ nṛpaścakre sarvatīrthamaye dhruve

sadehaśca gataḥ svarge tīrthasnānādanantaram //
tataḥ prabhṛti tattīrthaṃ jaṃbūtīrthamanusmṛtam

kanyāgate ravau tatra yaḥ śrāddhaṃ kurute naraḥ //
gayāśīrṣasamaṃ tasya puṇyamāhurmaharṣayaḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍe jaṃbūtīrthaprabhāvavarṇanaṃnāma ṣaṣṭitamo'dhyāyaḥ