Skanda Purana · Verses 7.51-2

// īśvara uvāca // //
tato gacchenmahādevi ketuliṃgaṃ mahāprabham //
rāhvīśānāduttare ca maṃgalāyāśca dakṣiṇe

dhanuṣoṃtaramānena nātidūre vyavasthitam //
liṃgaṃ mahāprabhāvaṃ hi sarvapātakanāśanam

keturnāma grahotyugraḥ śivasadbhāvabhāvitaḥ //
vartulo'tīva vistīrṇo locanābhyāṃ subhīṣaṇaḥ

palāladhūmasaṃkāśo grahapīḍāpahārakaḥ //
tatrākarottapaścograṃ divyābdānāṃ śataṃ priye

tasya tuṣṭo mahādevo graha tvaṃ pradadau priye //
ekādaśaśatānāṃ ca grahāṇāmādhipatyatām

tatrasthaṃ pūjayedbhaktyā ketuliṃgaṃ mahāprabham //
ketūdaye mahāghore tasmindṛṣṭe viśeṣataḥ

grahapīḍāsu cogrāsu pūjayettaṃ vidhānataḥ //
puṣpairgaṃdhaistathā dhūpairnaivedyairvividhaiḥ śubhaiḥ

toṣayedvidhivaddevaṃ ketuṃ kalmaṣanāśanam

iti saṃkṣepataḥ proktaṃ ketuliṃgaṃ mahodayam //
grahapīḍopaśamanaṃ sarvapātakanāśanam

etāni nava liṃgāni grahāṇāṃ kathitāni te //
yaḥ paśyati naro nityaṃ tasya pīḍābhayaṃ kutaḥ

na daurbhāgyaṃ kule tasya na rogī naiva duḥkhitaḥ //
jāyate putravaddevi taṃ rakṣaṃti mahāgrahāḥ

iti te kathitaṃ samyakcaturdaśāyatanaṃ priye //
vighneśvaraṃ samārabhya yāvatketupratiṣṭhitam

navagraheśvarāṇāṃ tu māhātmyaṃ pāpanāśanam //
tathaiva paṃcaliṃgānāṃ śrutvā pāpaiḥ pramucyate

kaparddinaṃ samārabhya caṃḍanāthāṃtakāni ca //
paṃcaiva mudrāliṃgāni nāpuṇyo veda mānavaḥ

sūryeśvaraṃ samārabhya ketuliṃgāṃtakāni vai //
navagrahāṇāṃ liṃgāni nānyo jānāti kaścana

caturdaśavidhā tvevaṃ proktā''yatanasaṃgatiḥ //
yaścaināṃ veda bhāvena sa kṣetraphalamaśnute

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye ketvīśvaramāhātmyavarṇananāmaikapaṃcāśo'dhyāyaḥ