Skanda Purana · Chapter 7.52

// pulastya uvāca // //
tato gacchennṛpaśreṣṭha īśānīśikharaṃ mahat //
yatra gauryā tapastaptaṃ supuṇyaṃ lokaviśrutam

yasya saṃdarśanenāpi naraḥ pāpātpramucyate //
labhate cātisaubhāgyaṃ saptajanmāṃtarāṇi ca

// yayātiruvāca // //
kasminkāle tapastaptaṃ devyā tatra munīśvara //
kimarthaṃ ca mahattvetatkautukaṃ vaktumarhasi

// pulastya uvāca // //
śṛṇu rājankathāṃ divyāmadbhutāṃ lokaviśrutām //
yasyāḥ saṃśravaṇādeva mucyate sarvapātakaiḥ

purā gauryā samāsaktaṃ jñātvā devāḥ savāsavāḥ //
maṃtraṃ cakrurbhayāviṣṭā ekāṃte samupāśritāḥ

vīryaṃ yadi trinetrasya kṣetre gauryāḥ patiṣyati //
asmākaṃ patanaṃ nūnaṃ jagataśca bhaviṣyati

saṃtatestu vināśāya tato gacchāmahe vayam

evaṃ saṃmaṃtrya devāste kailāsaṃ parvataṃ gatāḥ //
tatastu naṃdinā sarve niṣiddhāḥ samayaṃ vinā

// naṃdyuvāca // //
ekāṃte bhagavānrudraḥ sahagauryā vyavasthitaḥ //
tasmāddevagaṇāḥ sarve gacchadhvaṃ nilayaṃ svakam

atha devagaṇāḥ sarve vañcayitvā ca taṃ gaṇam//
praiṣayaṃstatra vāyuṃ ca guptamūcurvacastvidam

gatvā vāyo bhavaṃ brūhi na kāryā saṃtatistvayā //
evaṃ devagaṇā deva prārthayaṃti bhayāturāḥ

tato vāyurdrutaṃ gatvā sthito yatra maheśvaraḥ //
uccairjagāda tadvākyaṃ yaduktaṃ tridaśālayaiḥ

tatastu bhagavāñcharvo vrīḍayā parayā yutaḥ //
gaurīṃ tyaktvā samuttasthau bāḍhamityeva cābravīt

tato gaurī suduḥkhārtā śaśāpa tridaśālayān

// gauryuvāca // //
yasmādahaṃ kṛtā devaiḥ putrahīnā samāgataiḥ //
tasmātte'pi bhaviṣyanti santānena vivarjjitāḥ

yasmādvāyo samāyātaḥ sthāne'smiñjanavarjite //
tasmātkāyavinirmuktastvaṃ bhaviṣyasi sarvadā

evamuktvā tato dīrghaṃ bhartuḥ kopaparāyaṇā //
tyaktvā pārśvaṃ gatā rājannarbudaṃ nagasattamam

sutārthaṃ sā tapastepe yatavākkāyamānasā //
tato varṣasahasrānte devadevo maheśvaraḥ

indrādyairvibudhaiḥ sārddhaṃ tadaṃtikamupāgamat//
atha śakro vinītātmā devīṃ tā pratyabhāṣata

eṣa devaḥ śivaḥ prāptastava pārśvaṃ svalajjayā //
nāyāti tatprasādo'sya kriyatā mahatī bhava

// devyuvāca // //
tyaktā'haṃ tava vākyena patinā samayānvitā //
putraṃ labdhvā prayāsyāmi tasya pārśve sureśvara

tasyāstaṃ niścayaṃ jñātvā svayaṃ devaḥ samāyayau //
abravītprahasanvākyaṃ prasādaḥ kriyatāmiti

dṛṣṭidānena deveśi bhāṣaṇena varānane //
mayā devahitaṃ kāryaṃ sarvāvasthāsu pārvati

akāle tena muktā'si nivṛttiḥ surate kṛtā //
putrārthaṃ te samāraṃbho yataścāsītsureśvari

tasmātte bhavitā putro nijadehasamudbhavaḥ //
matprasādādasaṃdigdhaṃ caturthe divase priye

nijāṃgamalamādāya yādṛgrūpaṃ sureśvari //
kariṣyasi na sandehastādṛgeva bhaviṣyati

sadyo devagaṇānāṃ ca daityānāṃ ca viśeṣataḥ //
tathā vai sarvamarttyānāṃ siddhido bahurūpadhṛk

evamuktā trinetreṇa parituṣṭā sureśvarī //
ālāpaṃ patinā cakre sārddhaṃ harṣasamanvitā

caturthe divase prāpte tataḥ snātvā śivā nṛpa //
tadodvarttanajaṃ lepaṃ gṛhītvā kautukātkila //
caturbhujaṃ cakārā'tha haravākyādvināyakam

tataḥ sajīvatāṃ prāpya haravākyena taṃ tadā //
viśeṣeṇa mahārāja nāyako'sau kṛtaḥ kṣitau //
sarveṣāṃ caiva martyānāṃ tataḥ khyāto babhūva ha

vināyaka iti śrīmānpūjyastrailokyavāsinām //
sarveṣāṃ devamukhyānāṃ babhūva hi vināyakaḥ

tato devagaṇāḥ sarve devīpriyahite ratāḥ //
tasmai dadurvarāndivyānprocurdevīṃ ca pārthiva

//
// devā ūcuḥ // //
tavāyaṃ tanayo devi sarveṣāṃ naḥ puraḥsaraḥ //
prathamaṃ pūjite cāsminpūjā grāhyā tataḥ suraiḥ

etacchṛṃgaṃ gire ramyaṃ tava saṃsevanācchubhe //
sarvapāpaharaṃ nṛṇāṃ darśanācca bhaviṣyati

ye'tra snānaṃ kariṣyanti supuṇye salilāśraye //
te yāṃsyaṃti paraṃ sthānaṃ jarāmaraṇavarjitam

māghamāse tṛtīyāyāṃ śuklāyāṃ ye samāhitāḥ //
saptajanmāṃtarāṇyeva bhaviṣyanti sukhānvitāḥ

evamuktvā surāḥ sarve svasthānaṃ tu tato gatāḥ //
devo'pi sahito devyā kailāsaṃ parvataṃ gataḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍa īśānīśikharamāhātmyavarṇanaṃnāma dvipañcāśattamo'dhyāyaḥ