સ્કંદ પુરાણ · શ્લોક 7.51-2

॥ ઈશ્વર ઉવાચ ॥ ॥
તતો ગચ્છેન્મહાદેવિ કેતુલિંગં મહાપ્રભમ્ ॥
રાહ્વીશાનાદુત્તરે ચ મંગલાયાશ્ચ દક્ષિણે

ધનુષોંતરમાનેન નાતિદૂરે વ્યવસ્થિતમ્ ॥
લિંગં મહાપ્રભાવં હિ સર્વપાતકનાશનમ્

કેતુર્નામ ગ્રહોત્યુગ્રઃ શિવસદ્ભાવભાવિતઃ ॥
વર્તુલોઽતીવ વિસ્તીર્ણો લોચનાભ્યાં સુભીષણઃ

પલાલધૂમસંકાશો ગ્રહપીડાપહારકઃ ॥
તત્રાકરોત્તપશ્ચોગ્રં દિવ્યાબ્દાનાં શતં પ્રિયે

તસ્ય તુષ્ટો મહાદેવો ગ્રહ ત્વં પ્રદદૌ પ્રિયે ॥
એકાદશશતાનાં ચ ગ્રહાણામાધિપત્યતામ્

તત્રસ્થં પૂજયેદ્ભક્ત્યા કેતુલિંગં મહાપ્રભમ્ ॥
કેતૂદયે મહાઘોરે તસ્મિન્દૃષ્ટે વિશેષતઃ

ગ્રહપીડાસુ ચોગ્રાસુ પૂજયેત્તં વિધાનતઃ ॥
પુષ્પૈર્ગંધૈસ્તથા ધૂપૈર્નૈવેદ્યૈર્વિવિધૈઃ શુભૈઃ

તોષયેદ્વિધિવદ્દેવં કેતું કલ્મષનાશનમ્

ઇતિ સંક્ષેપતઃ પ્રોક્તં કેતુલિંગં મહોદયમ્ ॥
ગ્રહપીડોપશમનં સર્વપાતકનાશનમ્

એતાનિ નવ લિંગાનિ ગ્રહાણાં કથિતાનિ તે ॥
યઃ પશ્યતિ નરો નિત્યં તસ્ય પીડાભયં કુતઃ

ન દૌર્ભાગ્યં કુલે તસ્ય ન રોગી નૈવ દુઃખિતઃ ॥
જાયતે પુત્રવદ્દેવિ તં રક્ષંતિ મહાગ્રહાઃ

ઇતિ તે કથિતં સમ્યક્ચતુર્દશાયતનં પ્રિયે ॥
વિઘ્નેશ્વરં સમારભ્ય યાવત્કેતુપ્રતિષ્ઠિતમ્

નવગ્રહેશ્વરાણાં તુ માહાત્મ્યં પાપનાશનમ્ ॥
તથૈવ પંચલિંગાનાં શ્રુત્વા પાપૈઃ પ્રમુચ્યતે

કપર્દ્દિનં સમારભ્ય ચંડનાથાંતકાનિ ચ ॥
પંચૈવ મુદ્રાલિંગાનિ નાપુણ્યો વેદ માનવઃ

સૂર્યેશ્વરં સમારભ્ય કેતુલિંગાંતકાનિ વૈ ॥
નવગ્રહાણાં લિંગાનિ નાન્યો જાનાતિ કશ્ચન

ચતુર્દશવિધા ત્વેવં પ્રોક્તાઽઽયતનસંગતિઃ ॥
યશ્ચૈનાં વેદ ભાવેન સ ક્ષેત્રફલમશ્નુતે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે કેત્વીશ્વરમાહાત્મ્યવર્ણનનામૈકપંચાશોઽધ્યાયઃ