Skanda Purana · Chapter 7.51

// pulastya uvāca // //
tato gacchennṛpaśreṣṭha caṃdrodbhedamanuttamam //
tīrthaṃ pāpaharaṃ nṛṇāṃ niśānāthena nirmitam

pratijñātaṃ yadā rājangrahaṇe caṃdrasūryayoḥ //
rāhuṇā kṛtavaireṇa cchinne śirasi viṣṇunā

tadā bhayānvitaścandro matvā daityaṃ durāsadam//
pīyūṣabhakṣaṇodyuktaṃ tataścārbudamabhyagāt

tatra bhittvā gireḥ śṛṃge kṛtvā vivaramuttamam//
praviṣṭastasya madhye tu tapastepe suduścaram

tataḥ kālena mahatā tuṣṭastasya maheśvaraḥ //
abravīdvṛṇu bhadraṃ te varaṃ yatte hṛdisthitam

// caṃdra uvāca // //
pratijñātaṃ suraśreṣṭha rāhuṇā grahaṇaṃ mama //
balavāneṣa durdharṣaḥ prakṛtyā siṃhikāsutaḥ

sāṃprataṃ bhakṣitaṃ tena pīyūṣaṃ surasattama //
ahaṃ madhye dhṛtaścāpi rāhuṇā'sau durāsadaḥ

pīyamāne'mṛte deva devaiḥ pūrvaṃ parājitaiḥ //
daivataṃ rūpamāsthāya dānavo'sau samāgataḥ

apibaccāmṛtaṃ rāhustenāsya mṛtyuvarjitam //
amṛtaṃ cākṣayaṃ jātaṃ śiro devabhayapradam

tato devaiḥ kṛtaṃ sāma grahamadhye pratiṣṭhitaḥ //
pratijñāte grahe'smākaṃ tato me bhayamāviśat

bhayāttasya suraśreṣṭha bhittvā śṛṃgaṃ gireridam //
kṛtaṃ śvabhramagādhaṃ ca tapo'rthaṃ surasattama //
tasmādatra prasādaṃ me kuru kāmaniṣūdana

// bhagavānuvāca // //
avadhyaḥ sarvadevānāmajeyaḥ sa mahābalaḥ //
kariṣyati grahaṃ nūnaṃ rāhuḥ kopaparāyaṇaḥ //
paraṃ tava niśānātha kariṣye'haṃ pratikriyām

grahaṇe tava saṃprāpte snānadānādikāḥ kriyāḥ //
kariṣyaṃti janā loke samyakchreyaḥsamanvitāḥ

tābhistava na saṃtāpaḥ svalpo'pyevaṃ bhaviṣyati //
akṣayaṃ sukṛtaṃ teṣāṃ kṛtaṃ karma bhaviṣyati

grahaṇe tava saṃjāte mama vākyādasaṃśayam //
etadbhinnaṃ tvayā yasmāttapo'rthaṃ śikharaṃ gireḥ //
candrodbhedamiti khyātaṃ tīrthaṃ loke bhaviṣyati

grahaṇe tava saṃprāpte yo'tra snānaṃ kariṣyati //
na tasya punarevātra janma loke bhaviṣyati

yo vā somadine snānaṃ darśanaṃ tatra cācaret //
tava loke dhruvaṃ vāsastasya caṃdra bhaviṣyati

evamuktvā sa bhagavāṃstataścāṃtardadhe haraḥ//
candro'pi prayayau hṛṣṭaḥ svasthānaṃ nṛpasattama

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe candrodbhedatīrthamāhātmyavarṇanaṃnāmaikapaṃcāśattamo'dhyāyaḥ //