Skanda Purana · Verses 7.50-2

// īśvara uvāca // //
tato gacchenmahādevi liṃgaṃ rāhupratiṣṭhitam //
śanaiścareśvarāddevi vāyavye saṃpratiṣṭhitam

ajādevyāścottarato dhanuṣāṃ saptake sthitam //
maṃgalāyāḥ samīpasthaṃ nātidūre vyavasthitam

liṃgaṃ mahāprabhāvaṃ tu saiṃhikeyapratiṣṭhitam //
tatra varṣasahasraṃ tu vaipracittistapo'karot

svarbhānuḥ sa mahāvīryo vaktrayodhī mahāsurāḥ //
samārādhya mahādevaṃ divyena tapasā prabhum

liṃge'vatārayāmāsa jagaddīpaṃ maheśvaram //
yaścainaṃ pūjayedbhaktyā naraḥ samyakca paśyati //
tasya pāpaṃ kṣayaṃ yāti api brahmavadhodbhavam

nāṃdho na badhiro mūko na rogī na ca nirddhanaḥ //
kadācijjāyate martyastena dṛṣṭena bhūtale

sukhasaubhāgyasaṃpannastadā bhavati rūpavān //
sarvakāmasamṛddhātmā modate divi devavat

iti te kathitaṃ devi māhātmyaṃ rāhudaivatam //
śrutvā tu mohaniryāto naro niṣkalmaṣo bhavet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye rāhvīśvaramāhātmyavarṇanaṃnāma paṃcāśo'dhyāyaḥ