Skanda Purana · Chapter 7.50

// pulastya uvāca // //
koṭitīrthaṃ tato gacchetsarvapātakanāśanam //
tīrthānāṃ yatra saṃjātā koṭiḥ pārthiva helayā

yadā syātkalikālastu raudro rājanmahītale //
mlecchabhūtā janāḥ sarve tatsparśāttīrthaviplavaḥ

tisraḥ koṭyo'rdhakoṭiśca tīrthānāṃ bhūmivāsinām //
teṣāṃ koṭistato'vātsītparvate'rbudasaṃjñake

puṣkare ca tathā koṭiḥ kurukṣetre ca pārthiva //
vārāṇasyāmardhakoṭiḥ stutā devaiḥ savāsavaiḥ //
rājannetāni rakṣaṃti sarve devāḥ savāsavāḥ

yadā yadā bhayārttāni mlecchasparśātsamaṃtataḥ //
sthāneṣveteṣu tiṣṭhaṃti tīrthānyukteṣu satvaram

koṭitīrthāni trīṇyeva tatra jātāni bhūtale //
ardha koṭisametāni sarvapāpaharāṇi ca

tasmātsarvaprayatnena snānaṃ tatra samācaret //
kṛṣṇapakṣe trayodaśyāṃ nabhasye ca viśeṣataḥ

tatra snānādikaṃ sarvaṃ japahomādikaṃ ca yat //
sarvaṃ koṭiguṇaṃ rājaṃstatprasādādasaṃśayam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe koṭitīrthaprabhāvavarṇanaṃnāma paṃcāśattamo'dhyāyaḥ