Skanda Purana · Verses 7.37-3

// devyuvāca // //
kimarthaṃ kaṃkaṇaṃ deva kṣipyate lavaṇāṃbhasi //
tasyā puṇyaṃ na pūrvoktaṃ yathāvadvaktumarhasi

ke maṃtrāḥ kiṃ vidhānaṃ tatkasminkāle mahatphalam //
kiṃ purābhūcca tadvṛttaṃ bhagavankaṃkaṇāśritam

//
// īśvara uvāca // //
āsītpurā mahīpālo bṛhadratha iti śrutaḥ //
tasya bhāryā'bhavatsādhvī nāmnā ceṃdumatī priyā

na devī na ca gandharvī nāsurī na ca kiṃnarī //
tādṛgrūpā mahādevi yādṛśī sā sumadhyamā

śīlarūpaguṇopetā nityaṃ sā tu pativatā //
sarvayoṣidguṇairyuktā yathā sādhvī hyarundhatī

pradhāna (?)hasrasya saubhāgyamadagarvitā //
na vinā sa tayā reme muhūrttamapi pārthivaḥ

ekadā tasyarājarṣerarddhāsanagatā satī//
yāvattiṣṭhati rājeṃdramṛṣistāvadupāgataḥ//
kaṇvo nāma mahātejāstapasvī vedapāragaḥ

tamāgatamatho dṛṣṭvā sahasotthāya pārthivaḥ//
pūjāṃ kṛtvā yathānyāyaṃ dattvā cārghyamanuttamam

sukhāsīnaṃ tato matvā viśrāṃtaṃ munipuṃgavam//
āpṛcchatkuśalaṃ rājā sa sarvaṃ cānvamodayat

tato dharmakathāṃ cakre sa ṛṣirnṛpasannidhau

tataḥ kathāvasāne sā bhāryā tasya mahīpateḥ //
abravīdamṛtaṃ vākyaṃ kṛtāṃjalipuṭā satī

// indumatyuvāca // //
tvaṃ vetsi bhagavansarvamatītānāgataṃ vibho //
pṛcche tvāṃ kautukāviṣṭā tasmāttvaṃ kṣaṃtumarhasi //

anyadehodbhavaṃ karma mama sarvaṃ prakīrttaya //
īdṛśaṃ mama saubhāgyaṃ patirdevasutopamaḥ

saubhāgyaṃ patidevatvaṃ śīlaṃ trailokyaviśrutam//
kiṃ prabhāvo vratasyaiṣa utāhopoṣitasya vā

dānasya vā muniśreṣṭha yanme saubhāgyamuttamam//
vaśo rājā mahābāhurmama vākyānugaḥ sadā //

etanme sarvamācakṣva paraṃ kautūhalaṃ hi me

// sūta uvāca // //
tasyāstadvacanaṃ śrutvā dhyātvā ca suciraṃ muniḥ //
abravītprahasanvākyaṃ kaṇvo vedavidāṃ varaḥ

// kaṇva uvāca // //
śṛṇu rājñi pravakṣyāmi anyadehodbhavaṃ tava //
na roṣaśca tvayā kāryo lajjā vāpi sumadhyame

tvamāsīdanyadehe tu ābhīrī paṃcabhartṛkā //
saurāṣṭraviṣaye hīnā devaṃ someśvaraṃ gatā

tataḥ snātuṃ praviṣṭā ca sāgare lavaṇāṃbhasi //
hatā kallolamālābhirvihvalatvamupāgatā

tava hastāccyutaṃ tatra haimaṃ kaṃkaṇameva ca //
naṣṭaṃ samudrasalile paścāttāpastu te sthitaḥ

atha kālena mahatā paṃcatvaṃ tvamupāgatā //
daśārṇādhipatergehe tato jātāsi sundari

bṛhadrathena coḍhāsi kaṃkaṇasya prabhā vataḥ//
na vrataṃ na tapo dānaṃ tvayā cīrṇaṃ purā śubhe

etatte sarvamākhyātaṃ yanmāṃ tvaṃ paripṛcchasi //
tacchrutvā sā viśālākṣī trapayā'dho mukhī tathā //
āsīttūṣṇīṃ tadā devī śrutvā vākyaṃ ca tādṛśam

evaṃ nivedya sa munī rājapatnīṃ varānane //
jagāma bhavanaṃ svaṃ ca āmaṃtrya vasudhādhipam

jñātvā phalaṃ kaṃkaṇasya munestasya prabhāvataḥ //
gatvā someśvaraṃ devaṃ snātvā ca lavaṇāṃbhasi

prākṣipatkaṃkaṇaṃ tatra prativarṣaṃ(?) mahāprabhe //
tato devatvamāpannā prabhāvāttasya bhāmini

īśvara uvāca // //
eṣa prabhāvaḥ sumahānkaṃkaṇasya prakīrtitaḥ //
sarvakāmaprado devi sarvapāpapraṇāśanaḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmye someśvaramāhātmye kaṃkaṇamāhātmyavarṇanaṃnāma saptatriṃśo'dhyāyaḥ