Skanda Purana · Verses 7.37-2

// śrīprahlāda uvāca // //
kṛṣṇakṛṣṇeti kṛṣṇeti śvapaco jāgaranniśi //
japedapi kalau nityaṃ kṛṣṇarūpī bhaveddhi saḥ

kṛṣṇakṛṣṇeti kṛṣṇeti kalau vadatyaharniśam //
nityaṃ yajñāyutaṃ puṇyaṃ tīrthakoṭisamudbhavam

saṃpūrṇaikādaśī bhūtvā dvādaśyāṃ varddhate yadi //
unmīlinīti vikhyātā tithīnāmuttamā tithiḥ

vaṃjulīvāsare ye vai rātrau kurvaṃti jāgaram//
yajñāyutāyutaṃ puṇyaṃ muhūrtārddhena jāyate

saṃpūrṇā dvādaśī bhūtvā varddhate cāpare dine //
trayodaśyāṃ muniśreṣṭhā vaṃjulī durllabhā kalau

unmīlinīmanuprāpya ye prakurvaṃti jāgaram //
nimiṣārddhena tatpuṇyaṃ gavāṃ koṭiphalapradam

saṃpūrṇaikādaśī bhūtvā pratya'haṃ varddhate yadi //
darśaśca paurṇamāsī ca pakṣavṛddhistathocyate

pakṣavṛddhikarīṃ prāpya ye prakurvaṃti jāgaram //
nimiṣārddhārddhamātreṇa gavāṃ koṭiphalapradam

// śrīprahlāda uvāca // //
cakratīrthe naraḥ snātvā mucyate sarva kilbiṣaiḥ //
sa yāti paramaṃ sthānaṃ dāhapralayavarjitam

cakraṃ prakṣālitaṃ yatra kṛṣṇena svayameva hi //
tena vai cakratīrthaṃ hi puṇyaṃ ca paramaṃ hareḥ //
bhavaṃti tatra pāṣāṇāścakrāṃkā muktidāyakāḥ

tatraiva yadi labhyaṃte cakrairdvādaśabhiḥ saha //
dvādaśātmā sa vijñeyo mokṣadaḥ parikīrtitaḥ //

ekacakreṇa pāṣāṇo dvāravatyāṃ suśobhanaḥ //
sudarśanābhidheyosau mokṣaikaphaladāyakaḥ

lakṣmīnārāyaṇau dvau tau bhuktimuktiphalapradau //
tribhiścaivācyutaṃ devaṃ sadendrapadadāyakam

bhūtido vighnahaṃtā ca catuścakro janārddanaḥ //
pañcabhirvāsudevastu janmamṛtyubhayāpahaḥ

pradyumnaḥ ṣaḍbhirevāsau lakṣmīṃ kāṃtiṃ dadāti ca //
saptabhirbaladevastu gotrakīrtivivarddhanaḥ

vāṃchitaṃ cāṣṭabhirbhaktyā dadāti puruṣottamaḥ //
sarvaṃ dadyānnavavyūho durllabho yaḥ surottamaiḥ

rājyaprado daśabhistu daśāvatāra eva ca //
ekādaśabhiraiśvaryyamaniruddhaḥ prayacchati

nirvāṇaṃ dvādaśātmā tu cakrairdvādaśabhiḥ smṛtam //
ata ūrdhvamanaṃto'sau saukhyamokṣapradāyakaḥ

ye kecittatra pāṣāṇāḥ kṛṣṇacakreṇa mudritāḥ//
teṣāṃ sparśanamātreṇa mucyate sarvakilbiṣaiḥ

brahmahatyādikaṃ pāpaṃ manovākkāyakarmajam //
tatsarvaṃ vilayaṃ yāti cakrāṃkitaprapūjanāt

mlecchadeśe śubhe vā'pi cakrāṃko yatra tiṣṭhati //
yojanāni daśa dve ca mama kṣetraṃ ca sundari

mṛtyukāle ca saṃprāpte hṛdaye yastu dhārayet //
cakrākaṃ pāpadalanaṃ sa yāti paramāṃ gatim

gomatīsaṃgame snātvā bhṛgutīrthe tathaiva ca //
na māturvasate kukṣau yadyapi syātsa pātakī //

tāmasaṃ rājasaṃ vāpi yatkṛtaṃ viṣṇupūjanam //
tatsāttvikatvamabhyeti nimnagāṃbho yathārṇave

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye dvārakākṣetrasthasudarśanapramukhānantāntacakracihnāṃkita pāṣāṇamāhātmyavarṇanapūrvakatatpūjanaphalādikathanaṃnāma saptatriṃśattamo'dhyāyaḥ